మరణంలోనూ వీడని మూడుముళ్ల బంధం

– భర్త మృతిని తట్టుకోలేక భార్య కన్నుమూత
– స్టేషన్ ఘనపూర్ మండలం చాగల్లులో విషాదం
స్టేషన్ ఘన్పూర్, నవంబర్ 21 : మూడు ముళ్లతో ఒక్కటైన ఆ జంట.. ఆరు దశాబ్దాలకు పైగా కష్టసుఖాల్లో ఒకరికొకరు తోడుగా నిలిచారు. జీవితాంతం కలిసిమెలిసి సాగిన వారి ప్రయాణం. చివరకు మరణంలోనూ విడదీయలేని బంధంగా మిగిలింది. ముందుగా భర్త కన్నుమూయగా ఆయన మరణాన్ని తట్టుకోలేక భార్య కూడా ఐదు గంటల వ్యవధిలోనే తనువు చాలించింది. ఈ హృదయ విదారక ఘటన స్టేషన్ ఘనపూర్ మండలం చాగల్లు గ్రామంలో చోటుచేసుకుంది. గ్రామానికి చెందిన వడ్లకొండ లోకనాథం (84), రామక్క (75) దంపతులు సుమారు 65 ఏళ్లుగా అన్యోన్యంగా జీవిస్తున్నారు. శుక్రవారం రాత్రి 10 గంటలకు లోకనాథం మృతి చెందగా.. భర్త మరణంతో తీవ్ర మనోవేదనకు గురైన రామక్క శనివారం తెల్లవారుజామున సుమారు 3 గంటలకు తుదిశ్వాస విడిచింది. గతంలో ప్రమాదంలో కాలుకు గాయమై, ఇన్ఫెక్షన్ కారణంగా రామక్క అనారోగ్యంతో బాధపడుతుంది. భార్య ఆరోగ్య పరిస్థితిపై లోకనాథం ఆందోళన చెందేవారని స్థానికులు తెలిపారు. వీరికి ఒక కుమారుడు, ఒక కుమార్తె ఉన్నారు. ఒకే రాత్రిలో తల్లిదండ్రులిద్దరినీ కోల్పోవడంతో కుటుంబ సభ్యులు కన్నీరుమున్నీరయ్యారు.
Comments (0)