బీసీల ఆత్మగౌరవానికి కేసీఆర్‌ పెద్దపీట 

21 November 2026 - 07:30
0 0
బీసీల ఆత్మగౌరవానికి కేసీఆర్‌ పెద్దపీట 
01
  • బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌  
  • ఓబీసీ కుల గణనకు మద్దతిస్తున్నట్టు ప్రకటన   
  • మాజీ మంత్రి శ్రీనివాస్‌ గౌడ్‌ ఆధ్వర్యంలో కేటీఆర్‌ను కలిసిన ఓబీసీ స్టూడెంట్స్‌ ప్రతినిధులు   

హైదరాబాద్‌, నవంబర్‌ 20 (నమస్తే తెలంగాణ): బీసీల ఆత్మగౌరవం, ఆర్థిక స్వావలంబన, రాజకీయ ప్రాధాన్యతలకు కేసీఆర్‌ పెద్ద పీట వేశారని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ గుర్తుచేశారు. మాజీ మంత్రి శ్రీనివాస్‌గౌడ్‌ ఆధ్వర్యంలో ఓబీసీ కుల గణనకు మద్దతివ్వాలని ఓబీసీ స్టూడెంట్‌ ఆర్గనైజేషన్‌ ప్రతినిధులు శుక్రవారం కేటీఆర్‌ను కలిశారు. ఈ సందర్భంగా కేటీఆర్‌ మాట్లాడుతూ.. బీసీల అభివృద్ధే రాష్ట్ర అభివృద్ధి అని నమ్మిన నాయకుడు కేసీఆర్‌ అని కొనియాడారు. బీసీలకు చట్టసభల్లో రిజర్వేషన్లు కల్పించాలని కేసీఆర్‌ నాడు అసెంబ్లీలో తీర్మానం చేసి కేంద్రానికి పంపారని గుర్తుచేశారు.

స్థానిక సంస్థలు, రాజ్యసభ సభ్యులుగా బీసీలకు అవకాశాలు కల్పించినట్టు వివరించారు. శాసనమండలి మొట్టమొదటి చైర్మన్‌గా బీసీకి అవకాశం ఇచ్చారని, ఎమ్మెల్సీ, నామినేటెడ్‌ పదవుల్లో బీసీలు, ఎంబీసీలకు అవకాశం కల్పించినట్టు తెలిపారు. బీసీల్లో రాజకీయ చైతన్యం తేవాలన్నదే కేసీఆర్‌ తపన అని చెప్పారు. రిజర్వేషన్లు అమలు చేయాలంటే కులగణన తప్పకుండా చేయాలని, బీఆర్‌ఎస్‌ పార్టీ తరఫున పార్లమెంట్‌లో ఎంపీ వద్దిరాజు రవిచంద్ర ఈ అంశంపై మాట్లాడి, కులగణన చేయాలని డిమాండ్‌ చేశారని గుర్తుచేశారు. ఓబీసీ కులగణన జరిగితేనే జనాభా ప్రాతిపదికన రిజర్వేషన్లు కల్పించడానికి అవకాశం ఉంటుందని అన్నారు.

బీసీ వర్గాల అభివృద్ధికి ప్రత్యేక కార్యక్రమాలు 

కేసీఆర్‌ ఆధ్వర్యంలో బీసీలు, బహుజనులకు విద్య, ఉపాధి, ఆర్థిక సహాయం, కులవృత్తుల అభివృద్ధి, సామాజిక గౌరవం వంటి అనేక రంగాలను పటిష్టం చేసినట్టు కేటీఆర్‌ వివరించారు. దాదాపు వెయ్యి గురుకుల విద్యాసంస్థలను విస్తరించి పేద బీసీ విద్యార్థులకు నాణ్యమైన విద్య అందించే అవకాశం కల్పించినట్టు తెలిపారు. హైదరాబాద్‌లో బీసీ కుల సంఘాలకు వేల కోట్ల రూపాయల భూములు కేటాయించి, వారి ఆత్మగౌరవానికి ప్రతీకలుగా భవనాల నిర్మాణానికి నిధులు కేటాయించారని గుర్తు చేశారు. బీసీ విద్యార్థులకు ప్రీ-మెట్రిక్‌, పోస్ట్‌ మెట్రిక్‌ సాలర్‌షిప్‌లు, ఫీజు రీయింబర్స్‌మెంట్‌, వసతి సదుపాయాలు కల్పించారని అన్నారు. స్టడీ సరిల్స్‌ ఏర్పాటు చేసి పరీక్షలకు సిద్ధమయ్యే బీసీ యువతకు ఉచిత శిక్షణ అందించే కార్యక్రమాలను ప్రోత్సహించారని వివరించారు. ముదిరాజ్‌, గౌడ, యాదవ, కురుమ, మత్స్యకార, రజక, నాయీ బ్రాహ్మణ, విశ్వబ్రాహ్మణ, కుమ్మరి, వడ్డెర, వృత్తి ఆధారిత అన్ని కులాలకు, బీసీ వర్గాల అభివృద్ధికి ప్రత్యేక కార్యక్రమాలు చేపట్టారని తెలిపారు.

నాయీ బ్రాహ్మణులకు ఉచిత కరెంటు, మద్యం షాప్స్‌లో గౌడ్స్‌, ఎస్సీ, ఎస్టీలకు రిజర్వేషన్లు కల్పించిన ఘనత కేసీఆర్‌కే దక్కుతుందని వ్యాఖ్యానించారు. ముదిరాజ్‌, గంగపుత్రులకు ఉచితంగా చేపల పిల్లల పంపిణీ, మోపెడ్లు, వాహనాలు, యాదవులకు ప్రభుత్వ సబ్సిడీతో గొర్రెల పంపిణీ వంటి కార్యక్రమాలు చేపట్టారని గుర్తుచేశారు. చేనేత కార్మికులకు రుణాల మాఫీ, బతుకమ్మ చీరల తయారీ ద్వారా నేతన్నలకు ఉపాధి కల్పించారని వివరించారు. చేనేత రంగాన్ని ప్రభుత్వ కొనుగోళ్ల ద్వారా ప్రోత్సహించినట్టు తెలిపారు. వివిధ బీసీ కులాల సహకార సంఘాలు, ఫెడరేషన్ల ద్వారా వృత్తిదారులకు ఆర్థిక చేయూత అందించే కార్యక్రమాలు చేపట్టారని కేటీఆర్‌ తెలిపారు. కార్యక్రమంలో ఓబీసీ స్టూడెంట్స్‌ ఆర్గనైజేషన్‌ కో ఆర్డినేటర్స్‌ జయంత్‌ యాదవ్‌, రజినీకాంత్‌ గౌడ్‌, మురళీకృష్ణ, చిద్విలాస్‌, కిరణ్‌, లోకేశ్‌ తదితరులు ఉన్నారు.

Comments (0)

User