పెళ్లికొడుకు, పెళ్లికూతురు ఇద్దరూ పురుషులే.. హిమాచల్‌ ప్రదేశ్‌లో వింత పండుగ!

భారతీయ సంప్రదాయంలో పెళ్లంటే అమ్మాయి అబ్బాయి ఉంటారు.. కానీ ఇద్దరు మగాళ్లకే పెళ్లిళ్లు చేయడం ఎప్పుడైనా చూశారా! పెళ్లంటే ఏదో అల్లాటప్పగా జరగదు.. ఒక అబ్బాయి పెళ్లికూతురిలా రంగురంగుల దుస్తులు, నగలు ధరించి అందంగా ముస్తాబైతే.. ఇంకో అబ్బాయి పెళ్లి కొడుకులా తయారవుతాడు. వీరిద్దరికీ మేళతాళాలతో పెళ్లి చేయడమే కాదు.. ఊరంతా ఘనంగా ఊరేగిస్తారు కూడా!! వినడానికి విచిత్రంగా ఉన్నప్పటికీ.. హిమాచల్ ప్రదేశ్‌లోని ఓ గ్రామంలో తరతరాలుగా ఈ సంప్రదాయం కొనసాగుతోంది. ప్రతి ఏడాది వసంతకాలానికి ముందు ఈ రౌలాణే ఉత్సవాన్ని నిర్వహిస్తారు.

ఏమిటీ రౌలాణే పండుగ?

హిమాచల్‌ప్రదేశ్‌లోని కిన్నౌర్‌ జిల్లాలో కల్పా అనే చారిత్రక గ్రామం ఉంది. ఇక్కడి ప్రజలకు ప్రకృతితో ముడిపడిన అనేక సంప్రదాయాలు ఉన్నాయి. వాటిలో రౌలాణే ఉత్సవం ఒకటి. స్థానికుల నమ్మకం ప్రకారం.. శీతాకాలంలో ‘సౌణి’ అనే పర్వత ఆత్మలు గ్రామ పరిసరాల్లో సంచరిస్తూ ప్రజలను, పశువులను ఆపదల నుంచి కాపాడుతాయి. వసంతకాలం ప్రారంభం కాగానే అవి తిరిగి పర్వత ప్రాంతాలకు వెళ్లిపోతాయని విశ్వసిస్తారు. వాటికి కృతజ్ఞతలు తెలుపుతూ ఐదు నుంచి ఏడు రోజుల పాటు ఈ వేడుక నిర్వహిస్తారు.

వధూవరులుగా ఇద్దరు పురుషులు

ఈ పండుగలో ఇద్దరు పురుషులు వరుడు, వధువు పాత్రలు పోషిస్తారు. వరుడిని ‘రౌలా’ అని, వధువును ‘రౌలాణే’ అని పిలుస్తారు. రౌలా ఎరుపు రంగు గచ్చీ, ఉన్ని దుస్తులు ధరించి ముఖానికి ముసుగు వేసుకుంటాడు. చేతిలో రక్షణకు ప్రతీకగా ‘రాకస్‌’ అనే కత్తిని పట్టుకుంటాడు. ఇక రౌలాణే వధువు తరహాలో కత్తీ, చోళీ, నడుము బెల్టు ధరించి పూలతో అలంకరించిన కిరీటాన్ని పెట్టుకుంటాడు. డాగ్లో, బిట్రీ, కౌంతాయ్‌ వంటి వెండి ఆభరణాలను ధరిస్తాడు.

నాగిన్‌ నారాయణ ఆలయం వద్ద ఈ ఉత్సవానికి సంబంధించిన కార్యక్రమాలు జరుగుతాయి. సంప్రదాయ దుస్తుల్లో సిద్ధమైన రౌలా, రౌలాణే నెమ్మదిగా అడుగులు వేస్తూ ప్రత్యేకమైన ‘రోలాణీ’ నృత్యం చేస్తారు. డోలు, దమౌ వాయిద్యాల మోత మధ్య గ్రామమంతా ఊరేగింపు సాగుతుంది. ఈ సందర్భంగా బార్లీ పిండిని చల్లుతూ వేడుకకు మరో ప్రత్యేకతను తీసుకొస్తారు. దీంతో అక్కడి వాతావరణం హోలీ పండుగను తలపిస్తుంది. గ్రామస్థులంతా సంప్రదాయ హిమాచలి దుస్తులు ధరించి ఈ వేడుకల్లో పాల్గొంటారు.

ఇలా వధూవరులుగా ఇద్దరు పురుషులు మారడం, పరిలకు కృతజ్ఞతలు చెప్పడం, ఊరంతా కలిసి నృత్యాలు చేయడం.. రౌలాణే ఉత్సవాన్ని హిమాచల్‌ప్రదేశ్‌లోని ప్రత్యేక సాంస్కృతిక వేడుకల్లో ఒకటిగా నిలబెట్టాయి