పట్నం మహేందర్‌ రెడ్డి మెడికల్‌ కళాశాలలో ఫుడ్‌ పాయిజన్‌

చేవెళ్లటౌన్‌, నవంబర్‌ 9: రంగారెడ్డి జిల్లా చేవెళ్ల పట్టణ కేంద్రంలోని పట్నం మహేందర్‌ రెడ్డి మెడికల్‌ కళాశాల నర్సింగ్‌ హాస్టల్‌లో ఫుడ్‌ పాయిజన్‌ కలకలం రేపింది. భోజనం చేసిన సుమారు 80మంది నర్సింగ్‌ విద్యార్థినులు అస్వస్థతకు గురయ్యారు. వీరిలో 16 మంది చికిత్స పొందుతున్నారు. శనివారం ఉదయం వండిన చికెన్‌ రాత్రి భోజనంలో వడ్డించడం వల్లే ఫుడ్‌ పాయిజన్‌ అయినట్టు విద్యార్థులు తెలిపారు. భోజనం చేసిన కొద్ది సేపటికే పలువురు విద్యార్థినులకు విరోచనాలు, వాంతులు కావడంతో భయాందోళనకు గురయ్యారు.

ఆదివారం ఉదయం మరికొంత మంది అస్వస్థతకు గురికావడంతో దవాఖానలో చేర్చారు. దవాఖానను సందర్శించిన డీఎంహెచ్‌వో ఫుడ్‌ పాయిజన్‌ విషయం తెలుసుకున్న రంగారెడ్డి జిల్లా వైద్యాధికారి (డీఎంహెచ్‌వో)కళ్యాణ్‌ చక్రవర్తి ఆదివారం రాత్రి దవాఖానను సందర్శించి, చికిత్స పొందుతున్న విద్యార్థుల ఆరోగ్య పరిస్థితిని అడిగి తెలుసుకున్నారు. ఫుడ్‌ పాయిజన్‌కు గల కారణాలపై ఆరాతీశారు. అనంతరం నర్సింగ్‌ హాస్టల్‌ను సందర్శించి వంటగదిని, ఆహార పదార్థాలను, వంటకు వినియోగిస్తున్న కూరగాయలను పరిశీలించారు.