పండుగ వేళ విషాదాలు.. 23 మంది మృతి

• దేశవ్యాప్తంగా అగ్ని ప్రమాదాలు.. వందల మందికి గాయాలు
• హైదరాబాద్‌లో దీపావళి వేడుకల్లో 60 మందికి కంటి గాయాలు

న్యూఢిల్లీ : దీపావళి పండుగ అనేక ఇండ్లలో విషాదాలు నింపింది. అగ్ని ప్రమాదాలు, పటాకులు పేలుళ్లు, చేతులు, ముఖాల మీద బాంబులు పేలడంతో 23 మంది ప్రాణాలు కోల్పోయారు. మధ్యప్రదేశ్‌లో జరిగిన వేర్వేరు ఘటనల్లో రెండు కుటుంబాలకు చెందిన 12 మంది చనిపోయారు. ఢిల్లీలో చేతిలోనే పటాకులు పేలి పదేండ్ల బాలుడు చనిపోయాడు.

హైదరాబాద్‌లో 60 మందికి కంటిగాయాలు..
హైదరాబాద్‌లో పటాకుల ప్రమాదాల వల్ల 60 మందికి కంటిగాయాలయ్యాయి.

మహారాష్ట్రలో ఏడుగురు మృతి..
మహారాష్ట్రలోని ధారాశివ్‌ జిల్లాలో కిరాణా దుకాణం ఉన్న ఇంట్లో అగ్ని ప్రమాదం జరిగి ఒకే కుటుంబానికి చెందిన ఆరుగురు మరణించారు. ఖండ్‌వాలా ప్రాంతంలో పటాకులు పేలి మరొకరు చనిపోయారు.

తమిళనాడులో 4వేల మందికి గాయాలు..
తమిళనాడు వ్యాప్తంగా నవంబర్‌ 7 నుంచి 9 వరకు దీపావళి వేడుకల్లో భారీగా ప్రమాదాలు జరిగాయి. ఆ రాష్ట్ర ఆరోగ్యశాఖ నివేదిక ప్రకారం మూడురోజుల్లో 4,098 మంది వివిధ ప్రమాదాల్లో గాయపడి దవాఖానల్లో చేరారు. ఇందులో ఇద్దరు మరణించారు. రాజస్థాన్‌లోని బుండీలో టపాసులు కాలుస్తుండగా 12 ఏండ్ల బాలుడు సజన్‌ తీవ్రగాయాలై చనిపోయాడు.

ముంబైలో బాణసంచాపై నిషేధం..
ముంబైలో వరుస ప్రమాదాల నేపథ్యంలో అధికారులు కీలక నిర్ణయం తీసుకున్నారు. నవంబర్‌ 25 వరకు నగరంలో రాకెట్‌ టపాకులు, ఆకాశంలోకి ఎగిరే టపాకులు కాల్చడంపై నిషేధం విధించారు.