డార్క్‌ చాక్లెట్‌ ఓ విభిన్న ప్రయత్నం

విశ్వదేవ్‌ రాచకొండ, బిందుమాధవి లీడ్‌ రోల్స్‌ చేసిన చిత్రం ‘డార్క్‌ చాక్లెట్‌’. శశాంక్‌ శ్రీవాస్తవయ దర్శకుడు. రానా దగ్గుబాటి స్పిరిట్‌ మీడియా, వాల్టెయిర్‌ ప్రొడక్షన్స్‌ కలిసి సమర్పిస్తున్న ఈ చిత్రం ఈ నెల 13న విడుదల కానున్నది. ఈ సందర్భంగా ఈ సినిమా కర్టెన్‌రైజర్‌ ఈవెంట్‌ని మంగళవారం హైదరాబాద్‌లో నిర్వహించారు. ఇది ప్యాషన్‌తో తీసిన సినిమా అని, ప్రేక్షకులకు ఈ సినిమా గుర్తుండిపోతుందని, తాము క్రియేట్‌ చేసిన మ్యాజిక్‌ని ఈ నెల 13న ప్రేక్షకులు చూడబోతున్నారని, సినిమా అనే ఫార్మాట్‌కే ఛాలెంజ్‌ చేసేంత కొత్తగా దర్శకుడు శశాంక్‌ ఈసినిమాను తెరకెక్కించారని హీరో విశ్వదేవ్‌ రాచకొండ చెప్పారు.

ఈ సినిమాలో భాగం కావడం పట్ల కథానాయిక బిందు మాధవి ఆనందం వెలిబుచ్చారు. ‘చూసిన వారంతా ఇలాంటి సినిమా చేయాలంటే గట్స్‌ ఉండాలంటున్నారు. కథ రాసేటప్పుడు నేనలా అనుకోలేదు. విశ్వదేవ్‌ లేకపోతే ఈ ప్రయాణం లేదు. తన నటనతో సినిమాను మరోస్థాయికి తీసుకెళ్లాడు. ఈ సినిమా మూడురోజులకు ముందే యూఎస్‌లో విడుదల అవుతున్నది. ప్రేక్షకులందరికీ కచ్చితంగా నచ్చుతుంది’ అని దర్శకుడు శశాంక్‌ శ్రీవాస్తవయ నమ్మకం వ్యక్తం చేశారు. ఇంకా దర్శకులు రవికాంత్‌, ఆదిత్య, మల్లిక్‌రామ్‌ కూడా మాట్లాడారు.