ఎమ్మెల్యే బీర్ల అయిలయ్యను నిలదీసిన రైతులు

• ధాన్యం కొనుగోళ్ల తీరుపై ఆగ్రహం
• ఆలేరు ఏఎంసీలో రైతుల ఆందోళన

ఆలేరు టౌన్‌, నవంబర్‌ 11: యాదాద్రిభువనగిరి జిల్లా ఆలేరు వ్యవసాయ మార్కెట్‌ యార్డుల్లో ధాన్యం కొనుగోళ్లలో జాప్యంపై ఎమ్మెల్యే బీర్ల అయిలయ్యను రైతులు నిలదీశారు. బుధవారం ప్రభుత్వ విప్‌, ఆలేరు ఎమ్మెల్యే బీర్ల అయిలయ్య బీఆర్‌ఎస్‌ హయాంలో ఆలేరులో రూ.275 లక్షలతో నిర్మించిన గోదామును ప్రారంభించడానికి వచ్చిన సందర్భంగా రైతులు ధాన్యం కొనుగోళ్లపై జరుగుతున్న ఆలస్యాన్ని ఎమ్మెల్యేకు వివరించారు. అన్నం తిందామంటూ ఎమ్మెల్యే బుజ్జగించగా.. తామే పది మందికి అన్నం పెడుతాం అంటూ రైతులు సమాధానం ఇవ్వడంతో ఆయన విస్తుపోయారు.

ఆలేరు మండలం , శ్రీనివాసపురం గ్రామానికి చెందిన రైతు చౌడబోయిన సంజీవులు మాట్లాడుతూ.. మార్కెట్‌ యార్డుల్లో గత 20 రోజులుగా ధాన్యాన్ని ఉదయం ఎండపోస్తూ.. సాయంత్రం కుప్పపోస్తూ ధాన్యంపై ప్లాస్టిక్‌ కవర్‌ కప్పి రోజూ సాయంత్రం ఇంటికిపోయి వస్తున్నానని, కనీసం తేమ చూడటానికి సూపర్‌వైజర్‌ కూడా రావడం లేదని ఎమ్మెల్యే ముందు ఆవేదన వెలిబుచ్చారు. బీర్ల అయిలయ్య స్పందించి రేపటి నుంచి మార్కెట్‌లో వరి ధాన్యాన్ని కొనుగోలు చేస్తామని వెల్లడించారు.