జనానికి జవాబుఇవ్వండి రాహుల్‌!

అసెంబ్లీ ఎన్నికల ప్రచారంలో భాగంగా కాంగ్రెస్‌ నేత రాహుల్‌ గాంధీ తెలంగాణ ప్రజలకు ఎన్నో హామీలు ఇచ్చారు. ‘పాలనను మార్చండి..ఆరు హామీల బహుమతి పొందండి’ అంటూ పలు నియోజకవర్గాలు తిరుగుతూ బస్సు యాత్రలు చేశారు. 2023 సెప్టెంబర్‌లో విజయభేరి పేరిట హైదరాబాద్‌ నగర శివారులో కాంగ్రెస్‌ ఏర్పాటు చేసిన సభలో ఆయన ఆరు గ్యారెంటీలను ప్రకటించారు.

రాష్ట్రంలో కాంగ్రెస్‌ ప్రభుత్వం ఏర్పడగానే తొలి క్యాబినెట్‌ మీటింగ్‌లో ఈ ఆరు హామీల అమలుకు నిర్ణయాలు తీసుకుంటామని ఆయన భరోసా ఇచ్చారు. ఆసరా పింఛన్‌ రూ.4,000 చేస్తామని, వ్యవసాయ కూలీలకు ఏడాదికి రూ.12 వేలు ఇస్తామని ఆయన నోటనే అన్నారు. సభలో తన మాటలు వింటున్న వారిలో ఎవరికి ఇల్లు లేకున్నా కాంగ్రెస్‌ సర్కార్‌ అధికారంలోకి రాగానే ఇస్తుందని ప్రకటించారు. కాంగ్రెస్‌ సీనియర్‌ నాయకురాలు ప్రియాంక గాంధీ మాట్లాడుతూ మహిళలకు నెలకు రూ.2,500 ఇస్తామన్నారు. కానీ రాష్ట్రంలో కాంగ్రెస్‌ ప్రభుత్వం రాష్ట్రంలో ఏర్పడి మూడేండ్లు కావస్తున్నా వాటిలో ఏ హామీ కూడా కార్యరూపం దాల్చలేదు. సభాముఖంగా ప్రజలకు ఇచ్చిన హామీలు అమలు చేయకపోవడంతో అందుకు జవాబు చెప్పడానికైనా రాహుల్‌ గాంధీ తెలంగాణ ప్రజల ముందుకు రావలసిన అవసరం ఉన్నది.

కాంగ్రెస్‌ పాలనా కాలంలో రాహుల్‌ గాంధీ తెలంగాణకు రావడమే తక్కువ. వచ్చినా ఏవో రాచకార్యాలు ముగించుకొని వెళ్లిపోవడమే జరుగుతున్నది. 2025 లో రైతు రుణమాఫీ ప్రకటించిన రేవంత్‌ ప్రభుత్వం తమ ఘనతను అధిష్టానానికి చూపించాలని అనుకొన్నది. అందుకోసం రాహుల్‌ గాంధీని పిలిచి ఫిబ్రవరి 11న వరంగల్‌లో ఓ రైతు సదస్సు నిర్వహిస్తామని ప్రకటించింది. అనంతరం జరిగిన పరిణామాల్లో రుణమాఫీ సరిగ్గా కాలేదని, తమకు మాఫీ సొమ్ము అందలేదని రాష్ట్ర వ్యాప్తంగా రైతులు ఆగ్రహంతో రోడ్ల మీదికి వచ్చారు. ఈ సమయంలో రాహుల్‌ గాంధీని పిలిస్తే జనాగ్రహానికి గురికావలసి వస్తుందని పాలకులు ఆ సదస్సును వాయిదా వేశారు. చివరికి ఆ సదస్సు జరుగనే లేదు.

ఆ తర్వాత రాహుల్‌ గాంధీ హైదరాబాద్‌లో 2025 ఏప్రిల్‌ 25, 26లో జరిగిన భారత్‌ సమ్మిట్‌లో పాల్గొన్నారు. ప్రజల గొంతుక వినడంలో రాజకీయ నాయకులు విఫలమయ్యారని, కొత్త రాజకీయ విధానాలు రావాలని ఆయన ఆ సభలో పిలుపునిచ్చారు. ఆ సమ్మేళనం తర్వాతైనా తెలంగాణ ప్రజలను కలిసేందుకు ఆయన సిద్ధపడలేదు. అదే ఏడాది జూలై 14న సూర్యాపేట జిల్లా తుంగతుర్తి సభలో రాహుల్‌ గాంధీ చేతుల మీదుగా కొత్త రేషన్‌ కార్డుల పంపిణీ జరుగుతుందని ప్రభుత్వం ప్రకటించింది. అయితే, ఆ మాట కూడా నిలబడలేదు. చివరికి ముఖ్యమంత్రి రేవంత్‌ రెడ్డి అదే సభలో తానే కొత్త రేషన్‌ కార్డులను పంపిణీ చేశారు. 2025 డిసెంబర్‌ 13న రాహుల్‌ గాంధీ హైదరాబాద్‌ వచ్చి ఉప్పల్‌ స్టేడియంలో అర్జెంటీనా ఫుట్‌బాల్‌ దిగ్గజం మెస్సీని కలిశారు. అంతటితో రాహుల్‌ రాక ముగిసింది.

ఈ సంవత్సరం మార్చి 2న హైదరాబాద్‌ వచ్చిన రాహుల్‌ గాంధీ విమానాశ్రయం నుంచి సరాసరి వికారాబాద్‌కు వెళ్లిపోయారు. అనంతగిరిలో ఆంధ్రప్రదేశ్‌, తెలంగాణ రాష్ర్టాల జిల్లా కాంగ్రెస్‌ కమిటీ అధ్యక్షులకు ఏర్పాటు చేసిన పది రోజుల శిక్షణ తరగతుల కార్యక్రమంలో చివరి రోజున ఆయన పాల్గొన్నారు. అదే సమయంలో లగచర్లలో ప్రభుత్వ నిర్ణయానికి వ్యతిరేకంగా రైతుల ఆందోళన, హైదరాబాద్‌ సెంట్రల్‌ యూనివర్సిటీకి చెందిన కంచె గచ్చిబౌలి భూఆక్రమణ చర్యలపై విద్యార్థుల తీవ్ర నిరసనలు సాగుతున్నాయి. ఇవేవీ పట్టించుకోకుండా ఆయన అదేరోజు సాయంత్రం ఢిల్లీకి పయనమయ్యారు. ఈ నెల 13, 14 తేదీల్లో జరిగే భారత్‌ సమ్మిట్‌ 2026లో పాల్గొనేందుకు రాహుల్‌ గాంధీ హైదరాబాద్‌ వస్తున్నట్లు కాంగ్రెస్‌ వర్గాలు ప్రకటించాయి. హామీలను సాకారం చేయలేని పరిస్థితిలో కాంగ్రెస్‌ ప్రభుత్వం లేదన్న విషయం ఆయనకు స్పష్టంగా తెలుసు. అందుకే ఆయనతో కనీసం ఒక్క బహిరంగ సభనైనా రాష్ట్రంలో నిర్వహించేందుకు పార్టీ సిద్ధంగా లేదు. రాజ్యాంగం ప్రతిని పట్టుకొని కేంద్ర ప్రభుత్వ విధానాలను విమర్శిస్తూ భారత్‌ జోడో యాత్ర, చాత్రోంకి గూంజ్‌ అంటూ దేశంలో చక్కర్లు కొడుతున్న రాహుల్‌ తనను నమ్మిన తెలంగాణ ప్రజల ముందుకు రావలసిన అవసరం ఉన్నది. ఈసారైనా కాంగ్రెస్‌ ఇచ్చిన హామీలపై ఆయన సమీక్షిస్తారో లేదో చూడాలి.

బద్రి నర్సన్‌