గాంధీనగర్‌లో అంగన్‌వాడీ నూతన భవన నిర్మాణానికి భూమి పూజ

బూర్గంపహాడ్, నవంబర్ 12 : బూర్గంపహాడ్ మండల పరిధిలోని సారపాక పంచాయతీ గాంధీనగర్‌లో అంగన్‌వాడీ నూతన భవన నిర్మాణానికి సర్పంచ్ గుగులోత్ కిశోర్ నాయ‌క్ గురువారం భూమిపూజ నిర్వహించారు. గ్రామంలో గర్భిణులు, బాలింతలు, చిన్నారులకు మెరుగైన పౌష్టికాహారం, నాణ్యమైన సేవలు అందించడంలో అంగన్‌వాడీ కేంద్రాలు కీలకపాత్ర పోషిస్తున్నాయని, గత కొంతకాలంగా సరైన వసతిలేక ఇబ్బందులు పడుతున్న తల్లులు, చిన్నారులకు శాశ్వత ప్రాతిపదికన భవన నిర్మాణానికి భూమిపూజ చేసి పనులు ప్రారంభించడం జరిగిందన్నారు. గ్రామాభివృద్ధికి, మౌలిక సదుపాయాల కల్పనకు తమ పాలకవర్గం నిరంతరం కట్టుబడి ఉంటుందని సర్పంచ్ స్పష్టం చేశారు. ఈ కార్యక్రమంలో సీడీపీవో తార, పంచాయతీ ఈవో గుగులోత్ రవికుమార్, పాలకవర్గ సభ్యులు తిరుపతి ఏసోబు, శిరీష, హైమావతి, కొమరం సావిత్రి, భీమా, మాజీ ఎంపీటీసీ బాలి శ్రీహరి, దామెర ఆదినారాయణ, పేరాల శ్రీనివాస్, నాగరాజు, చందునాయక్, సూపర్‌వైజ‌ర్‌, ఐటీసీ అధికారులు, అంగన్‌వాడీ కార్యకర్తలు పాల్గొన్నారు.