‘నీటి ల‌భ్య‌త ఆధారంగా పంట‌లు సాగు చేయాలి’

– గుర్రంపోడు ఏవో కంచ‌ర్ల మాధ‌వ‌రెడ్డి

గుర్రంపోడు, నవంబర్ 12 : ఎల్‌నినో ప్రభావంతో రాబోయే యాసంగి సీజ‌న్‌లో తీవ్ర వర్షాభావం, నీటి కొరతతో భూగర్భ జలాలు క్షీణించే ముప్పు ఉన్నందున, రైతులు వరి పంట సాగుకు దూరంగా ఉండాలని గుర్రంపోడు మండల వ్యవసాయ అధికారి కంచర్ల మాధవరెడ్డి తెలిపారు. గురువారం మండలంలోని బొల్లారం గ్రామంలో రైతులకు అవగాహన కల్పించారు. ఈ సందర్భంగా ఏఓ మాట్లాడుతూ.. ఎల్‌నినో ప్రభావం కారణంగా యాసంగి సీజన్‌లో వర్షపాతం తగ్గి, నీటి లభ్యతపై ప్రభావం పడే అవకాశం ఉన్నందున రైతులు వరికి బదులుగా ఆరుతడి పంటలను సాగు చేయాలని సూచించారు. దాని ప్రభావంతో వాతావరణ పరిస్థితుల్లో మార్పులు సంభవించే అవకాశం ఉన్నందున రైతులు ముందస్తు జాగ్రత్తలు తీసుకోవాలన్నారు.

భూగర్భ జలాలు తగ్గే పరిస్థితులను దృష్టిలో ఉంచుకుని, నీటి లభ్యత ఆధారంగానే పంటలు ఎంపిక చేసుకోవాలని సూచించారు. రైతులు తమ భూముల స్వభావం, నేలలో తేమ, అందుబాటులో ఉన్న నీటి వనరులు, స్థానిక వాతావరణ పరిస్థితులను పరిగణనలోకి తీసుకుని పంటల ప్రణాళిక రూపొందించుకోవాలని తెలిపారు. నీటి పొదుపు పద్ధతులు, ప్రత్యామ్నాయ పంటల సాగుపై రైతులు అవగాహన పెంచుకోవాలని పేర్కొన్నారు. ఈ కార్యక్రమంలో వ్యవసాయ విస్తరణ అధికారి నేతాజీ, గ్రామస్థాయి అధికారులు, గ్రామ రైతులు పాల్గొన్నారు.