కరెంట్‌ షాక్‌తో రైతు మృతి.. వనపర్తి జిల్లాలో విషాదం
పాన్‌గల్‌, నవంబర్‌ 9 : విద్యుదాఘాతంతో రైతు మృతి చెందిన ఘటన వనపర్తి జిల్లాలో చోటుచేసుకున్నది. ఎస్సై కుర్మయ్య తెలిపిన వివరాల ప్రకారం.. పాన్‌గల్‌ మండలం అన్నారం గ్రామానికి చెందిన గడ్డం పెద్ద గట్టయ్య (60) తనకున్న రెండెకరాల పొలంతోపాటు మూడేండ్లుగా వెంగళాయపల్లిలో 2.25 ఎకరాలు కౌలుకు తీసుకొని వరి సాగు చేస్తున్నాడు.
ఆదివారం ఉదయం పొలం వద్దకు వెళ్లిన గట్టయ్య సాయంత్రమైనా ఇంటికి తిరిగి రాకపోవడంతో అతడి కుమారుడు మద్దిలేటి, గ్రామస్తులు బాలపీరు, నరేశ్‌ కలిసి పొలం వద్దకు వెళ్లి చూడగా.. మోటర్‌ వద్ద విగతజీవిగా కనిపించాడు. విద్యుత్తు మోటర్‌ వైర్‌ ఇన్సులేషన్‌ దెబ్బదినగా.. టేపు చుట్టే క్రమంలో విద్యుత్తు షాక్‌ తగిలి మృతి చెందినట్టు గుర్తించారు. కేసు నమోదుచేసి,దర్యాప్తు చేస్తున్నట్టు ఎస్సై తెలిపారు.
Comments (0)