ఆలయ ప్రాంగణంలో పేకాట స్థావరంపై పోలీసుల దాడి.. రూ.13,200 నగదు స్వాధీనం

కారేపల్లి,నవంబర్ 11: ఖ‌మ్మం జిల్లా కారేప‌ల్లి మండలం ఉసిరికాయలపల్లి శ్రీ కోట మైసమ్మ ఆలయ ప్రాంగణంలోని జామ తోటలో నిర్వహిస్తున్న పేకాట స్థావరంపై బుధవారం రాత్రి పోలీసులు మెరుపు దాడి చేశారు. విశ్వసనీయ సమాచారం మేరకు స్థానిక ఎస్సై వి. రమేష్ బ్లూకోల్ట్స్, పోలీసు సిబ్బందితో కలిసి ఆకస్మిక తనిఖీలు నిర్వహించారు. ఈ దాడిలో పేకాట ఆడుతున్న ఆరుగురిని గుర్తించగా, ఇద్దరిని అదుపులోకి తీసుకున్నారు.

మరో నలుగురు పోలీసులను గమనించి పరారయ్యారు. అదుపులోకి తీసుకున్న వారి నుంచి రూ.13,200 నగదు, ఒక ఆటో, రెండు సెల్‌ఫోన్లు, పేకముక్కలను స్వాధీనం చేసుకున్నట్లు ఎస్సై తెలిపారు. మండలంలో పేకాట, జూదం వంటి అసాంఘిక కార్యకలాపాలకు పాల్పడితే కఠిన చర్యలు తీసుకుంటామని, ఇలాంటి కార్యకలాపాలపై ప్రజలు పోలీసులకు సమాచారం అందించాలని ఎస్సై రమేష్ హెచ్చరించారు.