Yadagirigutta | యాదగిరిగుట్టలో వైభవంగా ప్రారంభమైన సహస్రనామావళి సహిత కోటి పుష్పార్చన

20 November 2026 - 14:00
0 0
Yadagirigutta | యాదగిరిగుట్టలో వైభవంగా ప్రారంభమైన సహస్రనామావళి సహిత కోటి పుష్పార్చన
Gutta

యాదాద్రి భువనగిరి, నవంబర్ 20(నమస్తే తెలంగాణ) : యాదగిరిగుట్ట శ్రీ లక్ష్మీనరసింహస్వామివారి దేవస్థానంలో నిర్వహిస్తున్న కార్తీక వైభవోత్సవాల్లో భాగంగా శుక్రవారం ఉదయం శ్రీ స్వామివారి సహస్రనా మావళి సహిత కోటి పుష్పార్చన కార్యక్రమం అత్యంత వైభవంగా ప్రారంభమైంది. ఈ సందర్భంగా ముందుగా దేవస్థాన అర్చకులు, వేద పండితులు శాస్త్రోక్తంగా అంతరాలయంలో శ్రీ స్వామివారికి ప్రత్యేక పూజలు, ఆరాధనలు నిర్వహించారు.

అనంతరం కోటి పుష్పార్చన కోసం భక్తిశ్రద్ధలతో సేకరించిన వివిధ రకాల పుష్పాలను ఆలయంలో ప్రత్యేకంగా ఏర్పాటు చేసి స్వామివారికి పూజలు నిర్వహించారు. తదుపరి స్వామివారిని ప్రత్యేకంగా అలంకరించి మేళతాళాలు, వేదమంత్రోచ్ఛారణల నడుమ శోభాయమానంగా ఊరేగింపు సేవ నిర్వహించారు. ఈ ఊరేగింపు ఆలయ మాడవీధుల మీదుగా కొనసాగి, అక్కడ ఏర్పాటు చేసిన కోటి పుష్పార్చన మండప ప్రాంగణానికి చేరుకుంది. సహస్రనామావళి పారాయణంతో కోటి పుష్పార్చన పూజా కార్యక్రమాలు ప్రారంభమయ్యాయి.

ఈ పవిత్ర కార్యక్రమంలో వేద పండితులు, వేద విద్యార్థులు, దేవస్థానం సంస్కృత విద్యాపీఠం విద్యార్థులు, మహిళలు, భక్తులు పెద్ద సంఖ్యలో పాల్గొన్నారు. భక్తులు స్వామివారికి సమర్పించేందుకు తీసుకువచ్చిన పుష్పాలను భక్తిశ్రద్ధలతో అందజేసి పుష్పార్చనలో భాగస్వాములయ్యారు. ఈ కార్యక్రమంలో ప్రభుత్వ విప్, ఆలేరు శాసనసభ్యులు బీర్ల ఐలయ్య, దేవస్థాన కార్యనిర్వహణాధికారి జె. భవానీ శంకర్, డీఈవో దొర్బాల భాస్కర్ శర్మ, స్థానిక ప్రజాప్రతినిధులు పాల్గొన్నారు.

 

Comments (0)

User