Mysaa | 29 ఏళ్ల తర్వాత మళ్లీ కలిసిన వందేమాతరం – సుద్దాల.. ‘మైసా’ నుంచి పవర్‌ఫుల్ విప్లవ గీతం నేడే!

20 November 2026 - 14:00
0 0
Mysaa | 29 ఏళ్ల తర్వాత మళ్లీ కలిసిన వందేమాతరం – సుద్దాల.. ‘మైసా’ నుంచి పవర్‌ఫుల్ విప్లవ గీతం నేడే!
Mysaa

Iconic Duo | నేషనల్ క్రష్ రష్మిక మందన్న ప్రధాన పాత్రలో నటిస్తున్న ప్రతిష్టాత్మక చిత్రం ‘మైసా’ (Mysaa) నుంచి సినీ అభిమానులను ఆకట్టుకునే క్రేజీ అప్‌డేట్ వెలువడింది. తెలుగు సినీ సంగీత, సాహిత్య రంగాల్లో తమదైన ముద్ర వేసిన దిగ్గజ జోడీ వందేమాతరం శ్రీనివాస్, సుద్దాల అశోక్ తేజ దాదాపు 29 ఏళ్ల సుదీర్ఘ విరామం తర్వాత ఈ సినిమా కోసం మరోసారి చేతులు కలపడం విశేషంగా మారింది. ఎన్నో మరపురాని గీతాలను అందించిన వీరిద్దరి కలయిక మరోసారి తెరపైకి వస్తుండటంతో సంగీత ప్రియులు, సినీ వర్గాల్లో ఆసక్తి నెలకొంది.

వీరిద్దరి కాంబినేషన్‌లో రూపుదిద్దుకున్న ఓ పవర్‌ఫుల్ విప్లవ గీతాన్ని నేడు (నవంబర్ 20) మధ్యాహ్నం 3 గంటలకు హైదరాబాద్‌లోని AAA సినిమాస్‌లో నిర్వహించనున్న ప్రత్యేక కార్యక్రమంలో విడుదల చేయనున్నారు. కథా నేపథ్యానికి తగ్గట్టుగా ఈ విప్లవ గీతం శక్తిమంతమైన సాహిత్యం, భావోద్వేగాలతో ప్రేక్షకులను ఉర్రూతలూగిస్తుందని చిత్రబృందం ధీమా వ్యక్తం చేస్తోంది. విడుదల వేడుకతో సినిమా ప్రమోషన్లలో మరింత వేగం పెరగనుంది.

రవీంద్ర పుల్లె దర్శకత్వంలో తెరకెక్కుతున్న ఈ చిత్రానికి జేక్స్ బిజోయ్ సంగీతం అందిస్తున్నారు. రష్మిక మందన్న గతంలో ఎన్నడూ కనిపించని శక్తివంతమైన, భిన్నమైన పాత్రలో కనిపిస్తున్న ఈ ప్రాజెక్ట్‌ను అన్‌ఫార్ములా ఫిల్మ్స్ బ్యానర్‌పై భారీ స్థాయిలో నిర్మిస్తున్నారు. ఇప్పటికే విడుదలైన ప్రచార చిత్రాలతో ‘మైసా’పై మంచి అంచనాలు ఏర్పడగా, ఈ సినిమా నవంబర్ 27న ప్రపంచవ్యాప్తంగా గ్రాండ్‌గా థియేటర్లలో విడుదల కానుంది.

Comments (0)

User