UG Cable Tenders | కేబుల్ టెండర్లలో మేతకు రెడీ.. మినిస్టర్ టెన్ పర్సెంట్ స్కెచ్.. నగరంలోనే బడా కంపెనీల ప్రతినిధుల మకాం!

UG Cable Tenders | హైదరాబాద్‌లో అండర్‌గ్రౌండ్‌ కేబుల్‌ టెండర్ల ప్రక్రియ మొదలైనప్పటి నుంచీ నగర కాంట్రాక్టర్లకు వేరే రాష్ర్టాలకు చెందిన పెద్ద కంపెనీల ప్రతినిధుల నుంచి ఫోన్లు వస్తున్నాయి. టెండర్లకు సంబంధించి కార్యాచరణ మొదలైననాటి నుంచే టీజీఎస్పీడీసీఎల్‌కు చెందిన ప్రభుత్వ, ప్రైవేట్‌ కాంట్రాక్టర్లలో హడావుడి నెలకొన్నది. యూజీ కేబులింగ్‌కు సంబంధించిన టెండర్లు తమకే వస్తాయంటూ కొందరు బడా కంపెనీల ప్రతినిధులు స్థానిక కాంట్రాక్టర్లతో మంతనాలు జరుపుతున్నారు. తమకు సబ్‌ కాంట్రాక్ట్‌ పనులు చేయాలంటూ ఒప్పందాలు కుదుర్చుకోవడానికి హైదరాబాద్‌లోనే మకాం వేసినట్టు తెలిసింది.

హైదరాబాద్‌ సిటీబ్యూరో, అక్టోబర్‌ 6 (నమస్తే తెలంగాణ): స్థానిక కాంట్రాక్టర్లకు పనులు దక్కకుండా, నిబంధనలు మార్చారు. పొరుగు రాష్ర్టాల కంపెనీలకు టెండర్లు దక్కేలా చర్యలు చేపట్టారు. భూగర్భ కేబుల్‌ టెండర్లలో పర్సంటేజీల కోసమే ఇదంతా చేస్తున్నారన్న ప్రచారం జరుగుతున్నది. ‘హైదరాబాద్‌లో యూజీ కేబుల్‌ వేయాలి.. పనులు చేస్తావా.. గతంలో ఉన్న రేట్లతోనే మాట్లాడుకుందాం’ అంటూ ఇటీవల ప్రీ బిడ్డింగ్‌కు వచ్చిన సందర్భంలో కొన్ని కంపెనీల ప్రతినిధులు స్థానిక కాంట్రాక్టర్లతో మాట్లాడి వెళ్లారు.

ఆ తర్వాత ఫోన్లలో రోజూ మాట్లాడుతూనే వారిని డివిజన్లు కోరుకోమంటున్నారు. ఏయే డివిజన్లపై అవగాహన ఉన్నదో చెప్తే ఆ ప్రాంతాలకు టెండర్లు ఖరారు చేసుకునేందుకు సార్లతో మాట్లాడుతామని చెప్తున్నారు. ఎక్కడో ఆంధ్రా, ముంబై నుంచి ఫోన్లు చేసి తమను పనులు చేయాలని అడుగుతున్నారంటూ స్థానిక కాంట్రాక్టర్లు ఒకరికొకరు చెప్పుకొంటున్నారు. ఉప్పల్‌, గచ్చిబౌలి తదితర చోట్ల డిస్కమ్‌ పనులు చేస్తున్న కాంట్రాక్టర్‌కు ముంబై నుంచి ఫోన్లు వచ్చాయి. ‘కేబుల్‌ మేము సైప్లె చేస్తే పనులు మీరు చేస్తారా’ అని అడిగారని, ఆంధ్రప్రదేశ్‌లోని రాయలసీమ ప్రాంతానికి చెందిన ఓ కంపెనీ కూడా సంప్రదించిందని సదరు కాంట్రాక్టర్‌ చెప్పారు.

నిబంధనలు మార్చి.. టెండర్లు ఏమార్చి!

టీజీఎస్పీడీసీఎల్‌ యూజీ కేబుల్‌ టెండర్‌లో చిన్న తయారీదారులకు గేట్లు మూసేశారు. అర్హత నిబంధనల్లో పెద్ద ఎత్తున ఆర్థిక సామర్థ్యంతో పాటు సాంకేతిక సామర్థ్యం కలిగిన కంపెనీలు అంటే దేశవ్యాప్తంగా పెద్ద కంపెనీలకే టెండర్‌లో అవకాశం కల్పించేలా నిబంధనలు రూపొందించారనే విమర్శలు వెల్లువెత్తుతున్నాయి. అందుకే యూజీ కేబుల్‌ టెండర్‌ను నేషనల్‌ బిడ్‌గా చెప్తున్నారని కొందరు అధికారులు తెలిపారు. టెండర్‌ నిబంధనల ప్రకారం కంపెనీలకు ఆరు సీవీ లైన్లు, లేదా మూడేండ్ల సగటు రూ.1,500 కోట్ల టర్నోవర్‌ ఉండాలి.

గతంలో ఇదే తరహా టెండర్‌లో మొత్తం కేబుల్‌ పరిమాణంలో 20 శాతం కోట్‌ చేసే అవకాశం ఉండగా, తాజా టెండర్‌లో మొత్తం 100 శాతం పరిమాణానికి బిడ్‌ వేయడం తప్పనిసరి చేశారు. ఒకప్పుడు టెండర్‌ మొత్తం పరిమాణంలో కొంతభాగానికి మాత్రమే బిడ్‌ చేసే అవకాశం ఉండేది. ఇప్పుడు ప్రతి లైన్‌ ఐటమ్‌కూ వంద శాతం పరిమాణాన్ని కోట్‌ చేయాల్సిందే. తాజా 33 కేవీ, 11 కేవీ యూజీ కేబుల్‌ సరఫరా, లేయింగ్‌ టెండర్లలో అన్ని షెడ్యూల్‌ లైన్‌ ఐటమ్స్‌కు 100 శాతం కోట్‌ చేయాలని నిబంధన పెట్టారు. గత టెండర్లతో పోలిస్తే ఇది పెద్ద మార్పు కాగా గతంలో కనీసం కోటింగ్‌ పరిమితి 20 శాతంగా ఉండగా, ప్రస్తుత నిబంధనలో అన్ని లైన్‌ ఐటమ్స్‌కు పూర్తిగా కోట్‌ చేయాల్సి ఉంటుంది.

ఇది కేవలం చిన్న నిబంధనగా కనిపించినా కోట్ల రూపాయల టెండర్‌లో ఇది అతి పెద్దదే. ఒక సంస్థకు అవసరమైన కొన్ని కేబుల్‌ రకాల్లో సామర్థ్యం ఉన్నా, మొత్తం షెడ్యూల్‌లోని ప్రతి ఐటమ్‌కూ వందశాతం కోట్‌ చేయాల్సి వస్తే ఆ సంస్థకు బిడ్‌ వేయడం కష్టమవుతుంది. ఫలితంగా పూర్తి స్థాయి తయారీ సామర్థ్యం, పెద్ద ఆర్థిక సామర్థ్యం ఉన్న కంపెనీలకే ఈ టెండర్లలో అవకాశం కనిపిస్తున్నదని విద్యుత్తురంగ నిపుణులు చెప్తున్నారు. ఈ మార్పు వల్ల ఏదైనా నిర్దిష్ట సంస్థకు లేదా ప్రత్యేకంగా లోపాయికారీ ఒప్పందాలు ఉన్న సంస్థలకే ప్రయోజనాలు కలిగే అవకాశం ఉన్నది. ప్రధానంగా ఈ నిబంధన మార్చడానికి సంస్థ టెక్నికల్‌గా ఏ అంశాలు పాటించిందనేది కూడా చర్చనీయాంశమైంది. యూజీ టెండర్‌ రూపొందించేటప్పుడు కేబుల్‌ పరిమాణం, కేబుల్‌ సైజు, సరఫరాదారుల అర్హత వంటి అంశాలకు సాధారణంగా ప్రాధాన్యత ఇస్తారు. కానీ ఈ అర్హత ప్రమాణాలు అవసరానికి మించి కఠినంగా ఉన్నాయనే చర్చ జరుగుతున్నది.

ఈ నిబంధనలు ఎవరి కోసం!

యూజీ కేబులింగ్‌ టెండర్లలో భారీగా అవినీతికి పాల్పడేందుకు మినిస్టర్‌ టెన్‌ పర్సెంట్‌ స్కెచ్‌ వేసిన నేపథ్యంలో టెండర్‌ నిబంధనలు కొన్ని ప్రత్యేక కంపెనీలకు అనుకూలంగా మార్చారన్న ఆరోపణలు వినిపిస్తున్నాయి. ముఖ్యంగా టెండర్‌ విషయంలో నిబంధనలన్నీ గ్లోబల్‌ టెండర్లుగా చెప్తున్నప్పటికీ వాటికి సంబంధించి దేశవ్యాప్తంగా కంపెనీలు పాల్గొంటాయని చెప్పిన అధికారులు ఈవోఐ నుంచే కొన్ని కంపెనీలతో టచ్‌లో ఉన్నారనే చర్చ జరుగుతున్నది. ఈ క్రమంలో అంచనా వ్యయం 42 శాతం పెరిగిన తర్వాత ఎందుకు పెరిగింది? ఎవరికోసం పెంచారు? ఏఏ సందర్భాల్లో రేట్లు పెంచారనే అంశాలు బహిరంగంగా చెప్పాల్సిన దక్షిణ డిస్కమ్‌ ఉన్నతాధికారి మాత్రం డీపీఆర్‌లో కొన్ని అంశాలు మాత్రమే అధికారులతో చర్చించి పబ్లిక్‌ డొమైన్‌లో పెడుతామని తెలిపారు.

కానీ అది కూడా ఇప్పటివరకు జరుగలేదు. ఈ నిబంధనలు పక్కరాష్ట్రంలోని ముఖ్యనేత నియోజకవర్గానికి సంబంధమున్న ఒక కంపెనీకి అవకాశం కల్పించడానికే చేశారా అనే చర్చ జరుగుతున్నది. ఆ నేతతో మినిస్టర్‌ టెన్‌ పర్సెంట్‌ పలుమార్లు యూజీ విషయంలో మాట్లాడుకున్నట్టు డిస్కమ్‌లోనే గుసగుసలు వినిపిస్తున్నాయి. డీపీఆర్‌ తయారు చేసే సమయంలో అనుభవమున్న ఓ కీలక అధికారి తన బృందంతో రూ.4,051 కోట్లకు తయారుచేయగా అందుకు ప్రభుత్వం పాలనా అనుమతి ఇచ్చింది. ఆ తర్వాత మళ్లీ అంచనాలు పెంచి ఎవరికీ చిక్కకుండా పకడ్బందీ ప్రణాళికతో రూ.1000 కోట్ల భారీ దోపిడీకి ప్లాన్‌ చేసిన కమీషన్‌ మాస్టర్లు కంపెనీలతో మాట్లాడుకున్నట్టు తెలిసింది. ఈ నేపథ్యంలో ఈ ప్రొక్యూర్‌మెంట్‌లో ఆయా కంపెనీలు బిడ్‌ వేస్తే వారికి అనుకూలమైన డివిజన్లు అప్పగించేలా.. కేబుల్‌ సరఫరాలో కూడా ఒక ఒప్పందానికి వచ్చినట్టు డిస్కమ్‌లో ఒక కీలక అధికారి చెప్పారు.

ఈ విషయంలో తాము వ్యతిరేకించే పరిస్థితి లేదని, ఒకవేళ తమ దగ్గరకు ఎవరైనా వచ్చినట్టు తెలిసినా తమను టార్గెట్‌ చేస్తున్నారంటూ ఆ కీలక అధికారులు ‘నమస్తే తెలంగాణ’తో వాపోయారు. కేబుల్‌ ప్రాజెక్టు విషయంలో పక్కరాష్ట్ర ముఖ్యనేత, ఆంధ్రాకు చెందిన కీలక కంపెనీ, మరో రెండు కంపెనీలతో ఇప్పటికే ఒప్పందాలు కుదిరాయని, టెండర్ల నిబంధనలు రూపకల్పన చేసే సమయంలోనే వారికి అనుకూలంగానే అర్హతలు పెట్టినట్టు ఆ అధికారులు చెప్పారు. ఈ విషయంలో కొంత వ్యతిరేకించినందుకు చివరివరకు ఈ ప్రాజెక్టులో పనిచేసిన ఒక కీలక అధికారిని అప్రాధాన్య పోస్టుకు బదిలీ చేయడం కూడా చర్చకు దారితీసింది. ముఖ్యంగా సబ్జెక్టుతో సంబంధం లేని ఓ కీలక పోస్టులో ఉన్న వ్యక్తి ఈ మొత్తం వ్యవహారాన్ని నడిపిస్తుండగా తనకు రావాల్సిన కమీషన్‌ విషయంలో రాజీ పడే ప్రసక్తే లేదంటూ మినిస్టర్‌ టెన్‌ పర్సెంట్‌ సదరు అధికారులకు చెప్పారని మింట్‌ కాంపౌండ్‌తో పాటు విద్యుత్తు సంస్థల్లో పనిచేసే కొందరు కీలక అధికారులు చర్చించుకుంటున్నారు. ఈ నిబంధనలు కేవలం బడా కంపెనీలతో ఉపనేతలు, ముఖ్య అధికారులు కుదుర్చుకున్న ఒప్పందాల మేరకే మార్చారంటూ అధికారులు చెవులు కొరుక్కుంటున్నారు.

తెలంగాణ కాంట్రాక్టర్ల ఆగ్రహం!

టీజీఎస్పీడీసీఎల్‌లో కాంట్రాక్టర్లకు, అధికారులకు మధ్య కోల్డ్‌వార్‌ నడుస్తున్నది. ఈ ప్రాంతానికి సంబంధించిన వ్యక్తులుగా తాము పనులు చేసుకునే అవకాశమే లేకుండా పెద్దపెద్ద కంపెనీలు మాత్రమే అవకాశం దక్కించుకునేలా నిబంధనలు పెట్టడంపై తెలంగాణ కాంట్రాక్టర్లు మండిపడుతున్నారు. తెలంగాణలో ఇప్పటికే విద్యుత్తు కేబులింగ్‌, లైన్ల నిర్మాణం, లేయింగ్‌, జాయింటింగ్‌ తదితర పనులు చేసే విషయంలో కొందరు కాంట్రాక్టర్లు ఇప్పటికే చాలా అనుభవం కలిగి ఉన్నారు.

అయితే వీరి టర్నోవర్‌ సంస్థ విధించిన నిబంధనల మేరకు లేకపోవడంతో చాలామంది ఈ నిబంధనలపై ఆగ్రహం వ్యక్తంచేస్తున్నారు. ఇంతపెద్ద పనిలో తమ భాగస్వామ్యమే లేకపోవడమే కాకుండా స్థానిక కాంట్రాక్టర్లకు సబ్‌ కాంట్రాక్ట్‌ ఇచ్చే ప్రయత్నంలో పెద్ద కంపెనీలు ఇప్పటికే కొందరితో చర్చించి బహిరంగంగానే వారు కోరుకున్న డివిజన్‌ విషయంలో సంస్థ అధికారులతో మాట్లాడుతామంటూ చెప్పడం పెద్ద ఎత్తున రచ్చగా మారింది.స్థానికంగా సంవత్సరాల అనుభవం ఉన్న కాంట్రాక్టర్‌లకు విద్యుత్తు పనులపై అనుభవం ఉన్నా, భారీ పరిమాణంలో నిర్దిష్ట కేబుల్‌ తయారీ, సరఫరా చేసిన రికార్డు, భారీ టర్నోవర్‌ వంటి అర్హతలు తప్పనిసరి అయితే వారు ఈ పనుల్లోకి రావడం అసాధ్యం కాగా ఈ టెండర్‌ నిబంధనలు సరళతరం చేయాలంటూ కాంట్రాక్టర్లు డిమాండ్‌ చేస్తున్నారు.

మరోవైపు అధికారులు మాత్రం ఇంత పెద్ద టెండర్లు తాము సెక్షన్ల వారీగా ఇస్తే యూజీ కేబులింగ్‌ పూర్తిగా ఇబ్బంది అవుతుందని ఈ కారణం చేతనే తాము పూర్తిగా పెద్ద కంపెనీలకు అందుబాటులోకి వచ్చేలా నిబంధనలు రూపొందించామంటూ ఆఫ్‌ ది రికార్డుగా చెప్పారు. అయితే తెలంగాణ వచ్చిన తర్వాత తమ కడుపులు నిండాయని, కానీ ఇప్పుడు మళ్లీ రెండేండ్లుగా పనుల్లేక ఖాళీగా ఉంటూ పస్తులుండాల్సిన పరిస్థితి వచ్చిందని వాపోయారు. తాజా యూజీ నిబంధనలు తమకు అందనంత ఎత్తులో పెట్టి ఈ ప్రాంతంలోనే పనిచేస్తూ ఇక్కడి వారికే అవకాశం కల్పించకపోవడం వెనుక మినిస్టర్‌ టెన్‌ పర్సెంట్‌తో పాటు డిస్కమ్‌లోని ముఖ్య అధికారి, ప్రాజెక్టు కీలక అధికారికి లోపాయికారి ఒప్పందాలు ఉన్నాయంటూ ఆరోపణలు వెల్లువెత్తుతున్నాయి.