Sampath Kumar | ఏఐసీసీ కార్యదర్శిగా సంపత్ ఔట్.. కమీషన్ల ఆరోపణల నేపథ్యంలోనే తొలగింపు?

Sampath Kumar | మహబూబ్నగర్ (నమస్తే తెలంగాణ ప్రతినిధి)/అలంపూర్, నవంబర్ 20 : అలంపూర్ మాజీ ఎమ్మెల్యే డాక్టర్ ఎస్ఏ సంపత్కుమార్ను కాంగ్రెస్ పార్టీ అధిష్ఠానం ఏఐసీసీ కార్యదర్శి పదవి నుంచి తొలగించింది. పార్టీని బలోపేతం చేసే క్రమంలో కొత్తగా 81 మందిని నియమించింది. వివిధ రాష్ట్రాలు, కేంద్రపాలిత ప్రాంతాలు, పార్టీ విభాగాలకు పలువురు పార్టీ నాయకులను ఏఐసీసీ కార్యదర్శులుగా కాంగ్రెస్ అధ్యక్షుడు మల్లిఖార్జున ఖర్గే నియమించారు. ఈ జాబితాలో సంపత్ లేకపోవడం హాట్టాపిక్గా మారింది. ఏఐసీసీ స్థాయిలో కీలక పదవిని కోల్పోవడం సంపత్ రాజకీయ ప్రస్థానంలో కీలక మలుపుగా మారింది.
కొంతకాలంగా సంపత్పై వస్తున్న ఆరోపణల నేపథ్యంలోనే ఆయనను కీలక పదవి నుంచి తొలగించి ఉండవచ్చన్న వాదనలు వినిపిస్తున్నాయి. ఇసుక మాఫియా, కాంట్రాక్టర్ల వద్ద కమీషన్లు తీసుకోవడం వంటి అక్రమాలకు పాల్పడుతున్నాడని ఆయనపై అధిష్ఠానానికి ఫిర్యాదులు అందినట్టు తెలిసింది. ప్రభుత్వ ఉద్యోగులపై పెత్తనం చేయడం, తన మాట వినని వారిని భయబ్రాంతులకు గురి చేయడం.. అనుచరులకు ఏ పనైనా నిబంధనలకు విరుద్ధంగానైనా చేయాలని అధికారులపై ఒత్తిడి తేవడం.. వారిని దూషించడం, నామినేటెడ్ పదవులను సైతం అమ్ముకోవడం.. తదితర ఆరోపణలు ఆయనపై ఉన్నాయి.
Comments (0)