Ramayana | బాక్సాఫీస్ వద్ద ‘రామాయణ’ ప్రభంజనం.. 4 రోజుల్లోనే రూ.500 కోట్లకు చేరువలో వసూళ్లు!

Ramayana | బాలీవుడ్‌లో భారీ అంచనాల మధ్య విడుదలైన మైథలాజికల్ ఎపిక్ మూవీ ‘రామాయణ’ బాక్సాఫీస్ వద్ద సంచలన వసూళ్లతో దూసుకెళ్తోంది. నితీశ్ తివారీ దర్శకత్వంలో రణబీర్ కపూర్, సాయిపల్లవి, యశ్ ప్రధాన పాత్రల్లో నటించిన ఈ చిత్రం ప్రేక్షకుల నుంచి మంచి ఆదరణ అందుకుంటోంది. నవంబర్ 5న థియేటర్లలో విడుదలైన ఈ సినిమా తొలి నాలుగు రోజుల్లోనే ప్రపంచవ్యాప్తంగా దాదాపు రూ.500 కోట్ల గ్రాస్ వసూళ్లను సాధించినట్లు ట్రేడ్ వర్గాల సమాచారం. ముఖ్యంగా దీపావళి రోజున బాలీవుడ్‌లో అత్యధిక నెట్ వసూళ్లు సాధించిన చిత్రంగా ‘రామాయణ’ సరికొత్త రికార్డు సృష్టించింది.

ప్రముఖ ట్రేడ్ ట్రాకింగ్ సంస్థ సాక్నిల్క్ (Sacnilk) వెల్లడించిన వివరాల ప్రకారం.. ‘రామాయణ’ తొలి నాలుగు రోజుల్లో ప్రపంచవ్యాప్తంగా రూ.499.20 కోట్లకు పైగా గ్రాస్ వసూళ్లు సాధించినట్లు సమాచారం. భారతదేశంలో ఈ చిత్రం రూ.287.64 కోట్ల గ్రాస్, రూ.240.92 కోట్ల నెట్ కలెక్షన్లను రాబట్టింది. ఇక ఓవర్సీస్ మార్కెట్‌లో సుమారు రూ.214 కోట్ల గ్రాస్ వసూళ్లు సాధించినట్లు ట్రేడ్ వర్గాలు అంచనా వేస్తున్నాయి. ఈ సినిమాలోని 3D వెర్షన్‌కు కూడా ప్రేక్షకుల నుంచి మంచి స్పందన లభిస్తోంది. 3D ఫార్మాట్ ద్వారా సుమారు రూ.115.46 కోట్ల వసూళ్లు వచ్చినట్లు సమాచారం. భారీ విజువల్స్, గ్రాండ్ సెట్స్, స్టార్ క్యాస్ట్ సినిమాకు ప్రధాన ఆకర్షణగా నిలుస్తున్నాయి.

‘రామాయణ’ బాక్సాఫీస్ ప్రదర్శనలో మరో విశేషం దీపావళి రోజు సాధించిన వసూళ్లు. ఆదివారం ఒక్కరోజే భారత్‌లో రూ.56.15 కోట్ల నెట్ కలెక్షన్లు రాబట్టినట్లు ట్రేడ్ సమాచారం. దీంతో దీపావళి రోజున అత్యధిక నెట్ వసూళ్లు సాధించిన బాలీవుడ్ సినిమాగా ఈ చిత్రం నిలిచింది. ఇప్పటివరకు ఈ రికార్డు సల్మాన్ ఖాన్ నటించిన ‘టైగర్ 3’ పేరిట ఉండేది. ఆ సినిమా దీపావళి రోజున రూ.44.50 కోట్ల నెట్ వసూళ్లు సాధించింది. ఇప్పుడు ‘రామాయణ’ ఆ రికార్డును అధిగమించి సరికొత్త బెంచ్‌మార్క్ సెట్ చేసింది. అయితే తొలి వారాంతం ముగియడంతో ఇకపై వసూళ్ల వేగం ఎలా కొనసాగుతుందనేది ఆసక్తికరంగా మారింది. ‘రామాయణ’ నాలుగు రోజుల కలెక్షన్ల వివరాలు చూస్తే.. వరల్డ్ వైడ్ గ్రాస్: రూ.499.20 కోట్లకు పైగా వ‌సూళ్లు సాధించ‌గా, ఇండియా గ్రాస్: రూ.287.64 కోట్లు, ఇండియా నెట్: రూ.240.92 కోట్లు, ఓవర్సీస్ గ్రాస్: సుమారు రూ.214 కోట్లు, 3D ఫార్మాట్ వసూళ్లు: సుమారు రూ.115.46 కోట్లు. ఒకవైపు బాక్సాఫీస్ వద్ద భారీ వసూళ్లు సాధిస్తుండగా, మరోవైపు సినిమా పైరసీ విషయంలో చిత్ర బృందం కఠినంగా స్పందించింది. థియేటర్లలో సినిమాను రహస్యంగా రికార్డు చేసి, ఆ వీడియోలను సోషల్ మీడియాలో పోస్ట్ చేయడంపై బాంబే హైకోర్టు సీరియస్ అయినట్లు లీగల్ నోటీసుల ద్వారా వెల్లడించింది.