Priyanka Gandhi | బీజేపీ, ఆరెస్సెస్‌ విదేశీ అంటూ నా త‌ల్లిని విమ‌ర్శించాయి : ప్రియాంక గాంధీ

Priyanka Gandhi : వాయనాడ్‌ ఎంపీ ప్రియాంక గాంధీ (Priyanka Gandhi) ఇటీవ‌ల‌ తన తల్లి సోనియా గాంధీ (Sonia Gandhi) విడుదల చేసిన ఆత్మకథ ‘బిలాంగింగ్‌: ఎ జర్నీ ఆఫ్‌ లవ్‌’ ను గట్టిగా సమర్థించారు. తన గురించి తాను చెప్పుకొనే హక్కు ఆమెకు ఉందని అన్నారు. బీజేపీ, ఆర్‌ఎస్‌ఎస్‌లు గత కొన్నేళ్లుగా సోనియాగాంధీపై అబద్ధాలు ప్రచారం చేస్తూ కల్పిత కథలు అల్లాయని మండిపడ్డారు.

ఇప్పుడు వారంతా ఆ పుస్తకాన్ని చదువుతున్నందుకు సంతోషంగా ఉందన్నారు. వయనాడ్‌ పర్యటనకు వెళ్లిన ప్రియాంక గాంధీ.. అక్కడ మీడియాతో మాట్లాడారు. విదేశీ మహిళ అంటూ బీజేపీ, ఆర్‌ఎస్‌ఎస్‌లు నిరంతరం విమర్శిస్తున్నా సోనియా మాత్రం ఇప్పటివరకు నోరెత్తలేదన్న అంశాన్ని గుర్తుచేశారు. భారత్‌లో త‌న‌ తల్లి జీవితం గురించి బీజేపీ, ఆర్‌ఎస్ఎస్‌ నోటికొచ్చినట్లు మాట్లాడాయని విమ‌ర్శించారు. త‌న త‌ల్లిపై అబద్ధాలు ప్రచారం చేస్తూ కల్పిత కథనాలు రాశారని మండిప‌డ్డారు.

అయినా అమ్మ‌ ఇన్నాళ్లూ మౌనంగా ఉండిపోయారని, ఇప్పుడు వాస్తవాలను పుస్తకం రూపంలో ఆమే స్వయంగా వెల్ల‌డించార‌ని ప్రియాంకాగాంధీ చెప్పారు. అందులో తప్పేముందని, అది ఆమె హక్కు అని స‌మ‌ర్థించారు. ఇన్నాళ్లు బీజేపీ అబద్ధాలు చెబితే.. ఇప్పుడు నిజమేంటో ప్రజల ముందుకు నా తల్లి తీసుకొచ్చారని ప్రియాంకాగాంధీ అన్నారు.