Pawan Kalyan | విడాకులకు రెండు వారాల ముందే హింట్ ఇచ్చిన అన్నా కొణిదెల.. ఇన్‌స్టాగ్రామ్ అకౌంట్ డిలీట్ వెనుక అసలు కారణం ఇదేనా?

Pawan Kalyan | ఆంధ్రప్రదేశ్ ఉపముఖ్యమంత్రి, జనసేన అధినేత పవన్ కళ్యాణ్ వ్యక్తిగత జీవితానికి సంబంధించిన వార్త ఇప్పుడు తెలుగు రాష్ట్రాల్లో సంచలనంగా మారింది. తన భార్య అన్నా కొణిదెల (అన్నా లెజినోవా)తో 13 ఏళ్ల వైవాహిక బంధానికి ముగింపు పలుకుతున్నట్లు పవన్ కళ్యాణ్ ప్రకటించడం అభిమానులను షాక్‌కు గురిచేసింది. పరస్పర అవగాహన, గౌరవంతోనే ఈ నిర్ణయం తీసుకున్నామని, భార్యాభర్తలుగా విడిపోయినప్పటికీ స్నేహితులుగా కొనసాగుతామని వెల్లడించారు. తమ పిల్లల భవిష్యత్తు, వారి బాధ్యతలే తమకు ముఖ్యమని స్పష్టం చేశారు. అయితే ఈ ప్రకటన వెలువడిన తర్వాత మరో ఆసక్తికరమైన విషయం తెరపైకి వచ్చింది. విడాకుల ప్రకటనకు సుమారు రెండు వారాల ముందే అన్నా కొణిదెల కొన్ని సంకేతాలు ఇచ్చారా? ఆమె ఇన్‌స్టాగ్రామ్ అకౌంట్ కనిపించకుండా పోవడం వెనుక ఇదే కారణమా? అంటూ సోషల్ మీడియాలో చర్చ జరుగుతోంది.

అన్నా లెజినోవా గతంలో సోషల్ మీడియాకు చాలా దూరంగా ఉండేవారు. అయితే 2026 మార్చిలో ‘అన్నా కొణిదెల’ పేరుతో ఇన్‌స్టాగ్రామ్‌లోకి అడుగుపెట్టారు. ఈ సందర్భంగా పవన్ కళ్యాణ్‌తో కలిసి ఉన్న ఫొటోను షేర్ చేయడంతో మెగా అభిమానులు ఎంతో సంతోషించారు. అప్పటి నుంచి ఆమె సోషల్ మీడియాలో యాక్టివ్‌గా ఉంటూ తన వ్యక్తిగత జీవితానికి సంబంధించిన విషయాలతో పాటు మెగా కుటుంబ సభ్యుల ఫొటోలను కూడా అభిమానులతో పంచుకునేవారు. అంతేకాకుండా ఇకపై తనను అందరూ ‘అన్నా కొణిదెల’ అని పిలవాలని అభిమానులను కోరారు. దీంతో మెగా ఫ్యాన్స్ ఆమెకు సోషల్ మీడియాలో స్వాగతం పలికారు. పవన్ కళ్యాణ్‌తో పాటు మెగా కుటుంబంపై ఆమె చూపిస్తున్న అభిమానాన్ని చూసి నెటిజన్లు సంతోషం వ్యక్తం చేశారు.

అయితే సోషల్ మీడియాలో ఎంతో యాక్టివ్‌గా ఉన్న అన్నా కొణిదెల అకస్మాత్తుగా పోస్టులు పెట్టడం ఆపేశారు. అంతేకాకుండా అక్టోబర్ నెలాఖరు నుంచి ఆమె ఇన్‌స్టాగ్రామ్ అకౌంట్ కనిపించకుండా పోయింది. దీంతో అభిమానుల్లో అనేక సందేహాలు మొదలయ్యాయి. అన్నా తన అకౌంట్‌ను పూర్తిగా డిలీట్ చేశారా? లేక తాత్కాలికంగా డీయాక్టివేట్ చేశారా? అనే చర్చ జరిగింది. మరికొందరు మాత్రం సోషల్ మీడియాలో పెరుగుతున్న నెగెటివిటీ కారణంగానే ఆమె ఇన్‌స్టాగ్రామ్‌కు దూరమై ఉంటారని భావించారు. ఇంకొందరు ఆమె వ్యక్తిగత జీవితంలో ఏమైనా సమస్యలు ఉన్నాయా? అనే సందేహాలు వ్యక్తం చేశారు. అయితే అప్పట్లో ఈ విషయంపై ఎలాంటి స్పష్టత రాలేదు. ఇప్పుడు పవన్ కళ్యాణ్, అన్నా కొణిదెల విడిపోతున్నట్లు ప్రకటించడంతో ఆమె ఇన్‌స్టాగ్రామ్ అకౌంట్ కనిపించకుండా పోయిన విషయం మరోసారి చర్చకు వచ్చింది. విడాకుల ప్రకటనకు రెండు వారాల ముందే ఆమె సోషల్ మీడియాకు దూరమవడం వెనుక వ్యక్తిగత కారణాలు ఉండొచ్చని నెటిజన్లు అభిప్రాయపడుతున్నారు.

ఈ నిర్ణయం విడాకుల ప్రకటనకు ముందే తీసుకున్నారా? లేక సోషల్ మీడియాలో ఎదురవుతున్న విమర్శలు, నెగెటివిటీ కారణంగా అకౌంట్‌ను డీయాక్టివేట్ చేశారా? అన్నది మాత్రం తెలియాల్సి ఉంది. దీనిపై అన్నా కొణిదెల నుంచి ఎలాంటి వివరణ రాలేదు. కేవలం అకౌంట్ కనిపించకపోవడాన్ని విడాకుల నిర్ణయంతో ముడిపెట్టడం కూడా సరైనది కాదని కొందరు అభిప్రాయపడుతున్నారు.