Pat Cummins: ఖావాజా 100 శాతం త‌ప్పు.. అవ‌న్నీ పిచ్చి కూత‌లు: ప్యాట్ క‌మ్మిన్స్‌

సిడ్నీ: సాండ్‌పేప‌ర్ బాల్ ట్యాంప‌రింగ్ ఘ‌ట‌న‌పై ఆస్ట్రేలియా క్రికెట‌ర్ ఉస్మాన్ ఖ‌వాజా చేసిన వ్యాఖ్య‌ల‌ను కెప్టెన్ ప్యాట్ క‌మ్మిన్స్(Pat Cummins) త‌ప్పుప‌ట్టారు. ఖ‌వాజా త‌న బుక్‌లో రాసినవ‌న్నీ 100 శాతం త‌ప్పు అని పేర్కొన్నారు. 2018లో జ‌రిగిన బాల్ ట్యాంప‌రింగ్ ఘ‌ట‌న నేప‌థ్యంలో ఆసీస్ క్రికెట‌ర్లు స్టీవ్ స్మిత్‌, వార్న‌ర్‌, బాన‌క్రాఫ్ట్‌ల‌ను కొన్నాళ్ల పాటు నిషేధించిన విష‌యం తెలిసిందే. అయితే జ‌ట్టులోని స‌భ్యులంద‌రికీ తెలిసే.. సాండ్‌పేప‌ర్‌తో బంతిని రుద్ది ట్యాంప‌రింగ్‌కు పాల్ప‌డిన‌ట్లు ఖ‌వాజా త‌న ఆటోబ‌యోగ్ర‌ఫీ బుక్‌లో వెల్ల‌డించారు. ఈ వివాదం నేప‌థ్యంలో తాజా కెప్టెన్ ప్యాట్ క‌మ్మిన్స్ స్పందించారు. ఖ‌వాజా చేసిన వ్యాఖ్య‌ల‌న్నీ పిచ్చికూత‌ల‌న్నారు. 2018 నాటి ఘ‌ట‌న స‌మ‌యంలో క‌మ్మిన్స్ కూడా ఆ జ‌ట్టులో స‌భ్యుడిగా ఉన్నాడు. అయితే ఇవాళ క‌మ్మిన్స్ సుమారు 70 నిమిషాల పాటు మీడియాతో మాట్లాడాడు.

జ‌ట్టులో స‌భ్యులంద‌రికీ సాండ్‌పేప‌ర్ గురించి తెలుసు అని ఖ‌వాజా అన్నార‌ని, అంటే ఫీల్డింగ్ వెళ్ల‌డానికి ముందే సాండ్‌పేప‌ర్ ఉన్న‌ట్లు అర్థం వ‌స్తుంద‌ని, ఇది 100 శాతం త‌ప్పు అని క‌మ్మిన్స్ తెలిపాడు. గ‌త 8 ఏళ్లుగా ఇదే చెబుతున్నాని, ఏం జ‌రిగిందో త‌న‌కు తెలియ‌ద‌న్నాడు. త‌న‌తో పాటు మిగితా క్రికెట‌ర్లు కూడా సాండ్‌పేప‌ర్‌తో ట్యాంప‌రింగ్‌కు పాల్ప‌డిన‌ట్లు ఖ‌వాజా చేసిన వ్యాఖ్య‌లు పూర్తిగా పిచ్చి వ్యాఖ్య‌లు అని క‌మ్మిన్స్ అన్నాడు. క‌మ్మిన్స్‌, ఖ‌వాజా క‌లిసి ఇద్ద‌రూ 56 టెస్టులు ఆడాడు. ఈ ఏడాది జ‌న‌వ‌రిలో ఖ‌వాజా అంత‌ర్జాతీయ క్రికెట్ నుంచి రిటైర్ అయ్యాడు. 2011లో క‌మ్మిన్స్ ఆసీస్ జ‌ట్టులోకి వ‌చ్చాడు. ఆ టైంకే ఖ‌వాజా టీంలో ఉన్నాడు. ఇక ఆ ఇద్ద‌రూ దేశ‌వాళీలో న్యూ సౌత్ వేల్స్‌కు ఆడారు.