Nitish Setu | నితీశ్‌ సేతుపై ఆర్జేడీ కార్యకర్తల వీరంగం.. బ్యానర్లు ధ్వంసం

22 November 2026 - 16:00
0 0
Nitish Setu | నితీశ్‌ సేతుపై ఆర్జేడీ కార్యకర్తల వీరంగం.. బ్యానర్లు ధ్వంసం
Rjd Workers Run Amok At Nit

పాట్నా: బీహార్‌లోని వైశాలిలో నిర్మించిన ఆరు లేన్ల వంతెనకు మాజీ సీఎం పేరుతో నితీశ్‌ సేతు అని పెట్టారు. ప్రధానమంత్రి నరేంద్ర మోదీ శనివారం దీనిని ప్రారంభించారు. ఆ తర్వాత రాష్ట్రీయ జనతా దళ్ (ఆర్జేడీ) కార్యకర్తలు ఆ బ్రిడ్జి పైకి చేరుకున్నారు. అక్కడ ఏర్పాటు చేసిన ప్రధాని మోదీ, ఎన్డీఏ ప్రభుత్వానికి చెందిన బ్యానర్లను చించివేయడంతో పాటు గందరగోళం సృష్టించారు. ఆర్జేడీ జెండాలు ఊపడంతో పాటు లాలూ ప్రసాద్ యాదవ్, తేజస్వీ యాదవ్‌లకు మద్దతుగా నినాదాలు చేశారు. సుమారు 40 నిమిషాల పాటు కొత్త వంతెనపై హంగామా చేస్తూ అంతరాయం సృష్టించారు. ఈ వీడియో క్లిప్‌ సోషల్‌ మీడియాలో వైరల్‌ అయ్యింది.

కాగా, బీహార్‌లోని అధికార బీజేపీ దీనిపై మండిపడింది. ప్రభుత్వం అభివృద్ధిని చేపడుతుంటే, ప్రతిపక్ష ఆర్జేడీ మాత్రం అంతరాయం కలిగిస్తూ గందరగోళాన్ని సృష్టిస్తోందని బీజేపీ ప్రతినిధి నీరజ్ కుమార్ శర్మ ఆరోపించారు.

మరోవైపు ఆర్జేడీ కార్యకర్తల చర్యను ఆ పార్టీ ఎంపీ సుధాకర్ సింగ్ సమర్థించారు. ఆ వంతెనకు ఇప్పటికే ప్రారంభోత్సవం జరిగిందని, కేవలం పేరు మార్చడం కోసం రెండోసారి వేడుక నిర్వహించి కోట్లు ఖర్చు చేశారని ఆరోపించారు. ‘జరిగింది ఒక నిరసన మాత్రమే. అలా చేసిన వారు సరైన పనే చేశారు. అక్కడ ఏర్పాటు చేసిన పోస్టర్లు, బ్యానర్లను ‘మోసపూరిత పద్ధతిలో’ పెట్టారు’ అని ఆయన విమర్శించారు.

Comments (0)

User