Nithin | ‘అలియాస్ రుక్మిణి’లో యంగ్ లుక్‌లో నితిన్.. కృష్ణగా సరికొత్త అవతారం!

Nithin | నేచురల్ స్టార్ నాని నిర్మాణంలో తెరకెక్కుతున్న మరో ఆసక్తికరమైన చిత్రం ‘అలియాస్ రుక్మిణి’. ‘కోర్ట్’ సినిమాతో నిర్మాణ రంగంలో మంచి విజయాన్ని అందుకున్న నాని, తన యూనానిమస్ ప్రొడక్షన్స్ బ్యానర్‌పై ఈ రొమాంటిక్ డ్రామాను నిర్మిస్తున్నారు. ‘దండోరా’ సినిమాతో గుర్తింపు తెచ్చుకున్న మురళీకాంత్ దేవసోత్ ఈ చిత్రానికి దర్శకత్వం వహిస్తున్నారు. నితిన్ హీరోగా నటిస్తుండగా, ఆఫియా సయ్యద్ కథానాయికగా కనిపించనున్నారు. దీప్తి గంట ఈ చిత్ర నిర్మాణ బాధ్యతలు చేపట్టారు. తాజాగా చిత్ర బృందం విడుదల చేసిన ప్ర‌మోష‌న‌ల్‌ వీడియో ప్రేక్షకుల్లో ఆసక్తిని పెంచుతోంది. ఇందులో నితిన్ కృష్ణ అనే పాత్రలో సరికొత్త అవతారంలో కనిపించారు. రుక్మిణి తన జీవితంలోకి రాకముందు కృష్ణ ఎలా ఉండేవాడు? అతడి యవ్వనం, అల్లరి, అమాయకత్వం ఎలా ఉండేవి? అనే అంశాలను ఈ వీడియో ద్వారా పరిచయం చేశారు. ముఖ్యంగా నితిన్ లుక్ అభిమానులను ఆకట్టుకుంటోంది.

ఈ ప్ర‌మోష‌న‌ల్‌ వీడియోలో దర్శకుడు మురళీకాంత్ దేవసోత్.. రుక్మిణి పాత్రలో నటిస్తున్న ఆఫియా సయ్యద్‌తో యువకుడైన కృష్ణ గురించి మాట్లాడతారు. ఆ తర్వాత నితిన్ ఎంట్రీ ఇస్తారు. ఈ సినిమాలో ఆయన దాదాపు పదేళ్లు చిన్నవాడిగా కనిపించేలా తన రూపాన్ని మార్చుకున్నారు. చక్కగా సెట్ చేసిన జుట్టు, పలుచటి మీసం, ఆవాలు రంగు టీషర్ట్‌తో చాలా యంగ్‌గా కనిపించారు. ఓ డెస్క్ దగ్గర పెన్ను పట్టుకుని ఆలోచనల్లో మునిగిపోయిన యువకుడిగా ఆయన కనిపించిన తీరు ప్రత్యేక ఆకర్షణగా నిలిచింది. నితిన్ కొత్త లుక్ చూసి ఆఫియా సయ్యద్ సైతం ఆశ్చర్యపోయినట్లు వీడియోలో చూపించారు.

కృష్ణ పాత్రలో నితిన్ చూపించిన అమాయకత్వం, యవ్వనపు ఉత్సాహం ఈ ప్రచార వీడియోకు ప్రత్యేక ఆకర్షణగా నిలిచాయి. నితిన్, ఆఫియా సయ్యద్ జోడీ కూడా సినిమాకు ప్రధాన ఆకర్షణగా నిలుస్తుందని చిత్ర బృందం భావిస్తోంది. వీరిద్దరి మధ్య సాగే ప్రేమకథ ప్రేక్షకులకు కొత్త అనుభూతిని అందించనుంది. ఇప్పటికే ఈ సినిమా సంగీత ప్రచారాన్ని కూడా ప్రారంభించారు. ఇందులో భాగంగా విడుదల చేసిన తొలి పాట ‘రుకు రుకు రుక్మిణి’ సంగీత ప్రియులను ఆకట్టుకుంటోంది. విజయ్ బుల్గానిన్ స్వరపరిచిన ఈ మెలోడీ పాటలో రుక్మిణిపై కృష్ణకు ఉన్న ప్రేమాభిమానాలను అందంగా ఆవిష్కరించారు. పాటకు మంచి స్పందన రావడంతో సినిమాపై ఆసక్తి మరింత పెరిగింది. తాజాగా విడుదలైన కృష్ణ యువకుడి లుక్ వీడియోతో ‘అలియాస్ రుక్మిణి’ మరోసారి వార్తల్లో నిలిచింది. విభిన్నమైన పాత్రలు ఎంచుకుంటున్న నితిన్ ఈ చిత్రంలో యంగ్ కృష్ణగా ఎలా అలరిస్తారో చూడాలి. రొమాంటిక్ కథాంశం, ఆకట్టుకునే సంగీతం, నితిన్ సరికొత్త లుక్‌తో ప్రేక్షకుల్లో అంచనాలు పెంచుతున్న ఈ చిత్రం డిసెంబర్ 4న థియేటర్లలో విడుదల కానుంది.