‘రామవరం ప్ర‌జ‌ల‌కు స్థిరాస్తి పేరు మార్పిడికి అవ‌కాశం క‌ల్పించాలి’

రుద్రంపూర్, నవంబర్ 07 : కొత్తగూడెం కార్పొరేషన్ పరిధిలోని రామవరం ప్రాంత ప్రజలకు వారి స్థిరాస్తి పేర్లు మార్పిడికి అవకాశం కల్పించాలని 16వ డివిజన్ కార్పొరేటర్ మునిగడప పద్మ డిమాండ్ చేశారు. కార్పొరేషన్ మేయర్ మూడ్ గణేష్ అధ్యక్షతన జరిగిన సమావేశంలో మునిగడప పద్మ మాట్లాడుతూ.. రాముడు ఇచ్చిన వరం మా రామవరం అనుకుంటామే కానీ రామవరం ప్రజలకు ఎలాంటి హక్కులు లేవు, అన్నీ ఉన్న అల్లుడు నోట్లో శని అన్నట్లుగా రామవరపు ప్రాంత ప్రజల దుస్థితి ఉందని ఆవేదన వ్యక్తం చేశారు. రామవరం ప్రజల ఓట్లు కావాలి, రామవరం ప్రజల పన్నులు కావాలి, కానీ రామవరం ప్రజలకు నివాస హక్కు ఉండొద్దా! అని సమావేశంలో ప్రశ్నించారు. కౌన్సిల్లో సభ్యులందరూ రామవరం సమస్య పరిష్కారానికి ప్రభుత్వం దృష్టికి తీసుకెళ్లేందుకు సహకరించాలని ఆమె సభ్యులకు విజ్ఞప్తి చేశారు.

తాతల, తండ్రుల నాటి పేర్లతోనే పన్నులు కడుతున్న వారి మరణాంతరం వారసుల పేర్లు మార్చడం లేదు. అధికారులు దీనిపై ఆలోచన చేయాల్సిన అవసరం ఉందన్నారు. వచ్చే సమావేశంలోనైనా ఎజెండాలో పెట్టి ఒక నిర్ణయం తీసుకోవాలని మేయర్ కి వినతిపత్రం అందజేసి కౌన్సిల్ కి విజ్ఞప్తి చేశారు. అలాగే కోతుల సమస్య పరిష్కారానికి ఇంకా అన్ని డివిజన్లో బోన్లను ఏర్పాటు చేయాలని, అలాగే కుక్కలు, పందుల సమస్య పరిష్కారానికి తక్షణ చర్యలు తీసుకోవాలని ఆమె డిమాండ్ చేశారు. మిషన్ భగీరథ పైపుల లీకేజీలు, గుంటలు పూడ్చడంలో సంబంధిత అధికారులు నిర్లక్ష్యం వీడి తక్షణమే దాని పరిష్కారానికి చర్యలు తీసుకోవాలని ఆమె కోరారు. సమస్యల పరిష్కారానికి మేయర్ మూడ్ గణేష్, అధికారులు సానుకూలంగా స్పందించినట్లు తెలిపారు. సిపిఐ కార్పొరేటర్స్, కార్పొరేషన్, రెవెన్యూ, మెప్మా, అధికారులు పాల్గొన్నారు.