Boy Dies After Firecracker Explodes | చేతిలో పేలిన క్రాకర్స్‌.. ఛాతికి తగలడంతో బాలుడు మృతి

న్యూఢిల్లీ: దీపావళి రోజున ఒక బాలుడి చేతిలో బాణసంచా పేలింది. అతడి ఛాతికి అది తగలడంతో ఆ బాలుడు మరణించాడు. ఈ నేపథ్యంలో ఆ కుటుంబంలో విషాదం నెలకొన్నది. (Boy Dies After Firecracker Explodes) దేశ రాజధాని ఢిల్లీలోని నరేలా ప్రాంతంలో ఈ సంఘటన జరిగింది. దీపావళి సందర్భంగా ఆదివారం రాత్రి పదేళ్ల రిషి తన కుటుంబ సభ్యులతో కలిసి టపాసులు కాల్చాడు. ‘స్కై రాకెట్’ను ఆ బాలుడు వెలిగిస్తుండగా చేతిలో అది పేలింది. అలాగే అది పైకి వెళ్లకుండా నేరుగా బాలుడి ఛాతికి బలంగా తగలడంతో అతడు కుప్పకూలిపోయాడు.

Delhi Boy Dies

కాగా, ఆందోళన చెందిన కుటుంబ సభ్యులు రిషిని వెంటనే నరేలాలోని సత్యవాది రాజా హరీశ్ చంద్ర ఆసుపత్రికి తరలించారు. ఆ బాలుడు అప్పటికే మరణించినట్లు డాక్టర్లు ధృవీకరించారు. అయితే వైద్య నిర్లక్ష్యం కారణంగానే రిషి మరణించినట్లు అతడి కుటుంబ సభ్యులు ఆరోపించారు.

మరోవైపు దీపావళి రోజున ఢిల్లీ అగ్నిమాపక విభాగానికి 257 అత్యవసర కాల్స్ వచ్చాయి. వీటిలో 214 కాల్స్ అగ్నిప్రమాదాలకు సంబంధించినవి కాగా, 24 కాల్స్ బాణసంచాకు సంబంధించినవి. రాత్రి 8 గంటల నుంచి 10 గంటల మధ్య అత్యధికంగా 85 అత్యవసర కాల్స్ వచ్చాయని అగ్నిమాపక అధికారి తెలిపారు. రాత్రి 10 గంటల నుంచి అర్ధరాత్రి మధ్య మరో 61 కాల్స్ వచ్చాయని చెప్పారు. అగ్నిప్రమాద సంఘటనలకు స్పందించిన అగ్నిమాపక సిబ్బందిలో ఐదుగురు గాయపడినట్లు వివరించారు.