Manne Krishank | రేవంత్‌ సర్కార్‌కు మళ్లీ ఎదురుదెబ్బ.. క్రిశాంక్‌ను అరెస్టు చేసి రిమాండ్‌కు పంపాలనుకుంటే..!

Manne Krishank | హైదరాబాద్‌, అక్టోబర్‌ 6 (నమస్తే తెలంగాణ)/కంటోన్మెంట్‌ : ముఖ్యమంత్రి రేవంత్‌రెడ్డి కుటుంబసభ్యుల అవినీతి, అక్రమ దందాలను ఆధారాలతో బయటపెట్టిన బీఆర్‌ఎస్‌ అధికార ప్రతినిధి మన్నె క్రిశాంక్‌ను ఎలాగైనా అరెస్టు చేసి జైలుకు పంపించాలనుకున్న కాంగ్రెస్‌ నేతల పాచిక పారలేదు. రేవంత్‌ సర్కార్‌కు మళ్లీ కోర్టులో ఎదురుదెబ్బే తగిలింది. గతంలో కూడా ఇలాగే క్రిశాంక్‌ను జైలుకు పంపాలని ప్లాన్‌ చేసినా.. కోర్టు మొట్టికాయలు వేయడంతో వెనక్కి తగ్గాల్సి వచ్చింది. ప్రజల తరఫున ప్రశ్నిస్తున్న బీఆర్‌ఎస్‌ నేతలను నోరుమూయించాలని కక్షసాధింపుతో వ్యవహరిస్తున్న కాంగ్రెస్‌ సర్కార్‌కు న్యాయస్థానాల్లో ఎదురుదెబ్బ తగులుతూనే ఉన్నది. తాజాగా శనివారం తెలంగాణభవన్‌లో మన్నె క్రిశాంక్‌ ప్రెస్‌మీట్‌లో మాట్లాడుతూ.. ‘అధికారాన్ని అడ్డంపెట్టుకొని రెండున్నరేండ్లలో సీఎం రేవంత్‌రెడ్డి కుటుంబం రూ.50 వేల కోట్ల దోపిడీకి పాల్పడ్డది. ఇష్టారాజ్యంగా భూములు కొల్లగొడుతున్నది.

కంపెనీల పేరిట యథేచ్ఛగా ప్రజాధనాన్ని లూటీ చేస్తున్నది. మ్యాక్స్‌బియాన్‌ ఫార్మా.. మెడికవర్‌ దవాఖానల్లో సీఎం అల్లుడు గొలుగూరి సత్యనారాయణకు వాటాలున్నాయి. .2024 ఆగస్టులో దక్షిణ కొరియాలో హ్యుండాయ్‌ పెద్దలతో రేవంత్‌ కలిసిన నాలుగు నెలల తర్వాత ‘గీతా’ ఆటోమోటివ్స్‌ పేరిట హైదరాబాద్‌లో ఐదు హ్యుండాయ్‌ షోరూంలు ప్రారంభమయ్యాయి. మైండ్‌వాల్ట్‌ నిర్మాణ సంస్థ ద్వారా కూతురు నైమిషారెడ్డి కొంపల్లిలో ఇంటర్నేషనల్‌ కార్పొరేట్‌ స్కూల్‌ నిర్మిస్తున్నారు. భార్య, అల్లుడు, బిడ్డ కంపెనీలకు ముఖ్యమంత్రి రేవంత్‌రెడ్డి ప్రమోటర్‌గా వ్యవహరిస్తున్నారు. ఆయన బినామీ దుంప శిరీష భాగస్వామిగా ఉన్నారు. మెడికవర్‌ను రూ.13,200 కోట్లకు విక్రయించి బ్లాక్‌మనీని వైట్‌గా మార్చుకున్నారు’ అంటూ సంచలన ఆరోపణలు చేశారు. తానుచేసిన ఆరోపణలు తప్పు అని నిరూపిస్తే ఇకపై జీవితంలో ప్రెస్‌మీట్‌ పెట్టనని క్రిశాంక్‌ సవాల్‌ విసిరారు.

దీంతో తమ కుటుంబ వ్యవహారాలు బట్టబయలు చేశారని అక్కసుతో, మెడికవర్‌ దవాఖాన వద్ద సీఎం రేవంత్‌రెడ్డి, ఆయన కుటుంబ సభ్యులను ఉద్దేశిస్తూ వ్యంగ్యంగా వెలసిన బ్యానర్లకు క్రిశాంక్‌ బాధ్యుడని ఆరోపిస్తూ, కాంగ్రెస్‌ నేత ఫిర్యాదుతో పోలీసులు కేసు నమోదు చేశారు. గాంధీభవన్‌ నుంచి సాయికుమార్‌ అనే వ్యక్తి సీసీఎస్‌ డీసీపీ చైతన్యకు ఇచ్చిన ఫిర్యాదు మేరకు ఎఫ్‌ఐఆర్‌ 668/2026 నమోదు అయింది. క్రిశాంక్‌ నివాసం చుట్టూ సోమవారం మఫ్టీలో పోలీసులు పహారా కాసినట్టు బీఆర్‌ఎస్‌ నేతలు ఆరోపించారు. ఈ క్రమంలోనే మంగళవారం ఉదయం గోపాలపురం పోలీసులు క్రిశాంక్‌ను అరెస్టు చేశారు. అనంతరం ఆయనను వైద్య పరీక్షల కోసం గాంధీ దవాఖానకు తరలించారు. వైద్య పరీక్షలు పూర్తయిన తర్వాత సికింద్రాబాద్‌ పదో మెట్రోపాలిటన్‌ మేజిస్ట్రేట్‌ పద్మ ఎదుట హాజరుపరిచారు.

కోర్టు వద్దకు బీఆర్‌ఎస్‌ నేతల క్యూ

క్రిశాంక్‌ అరెస్టు విషయం తెలుసుకున్న బీఆర్‌ఎస్‌ ముఖ్యనేతలు సికింద్రాబాద్‌ కోర్టుకు చేరుకున్నారు. ఎమ్మెల్సీలు దాసోజు శ్రవణ్‌, శంభీపూర్‌ రాజు, మాజీ మంత్రి పద్మారావుగౌడ్‌, ఎమ్మెల్యే పాడి కౌశిక్‌రెడ్డి, కేపీ వివేకానందగౌడ్‌, పార్టీ ప్రధానకార్యదర్శి ఆర్‌ఎస్‌ ప్రవీణ్‌కుమార్‌, మాజీ ఎమ్మెల్యేలు బాలసుమన్‌, గాదరి కిశోర్‌తోపాటు తలసాని సాయికిరణ్‌, కార్తీక్‌రెడ్డి, ముఠా జైసింహ, మాజీ కార్పొరేషన్‌ చైర్మన్లు గజ్జెల నగేశ్‌, రాజీవ్‌సాగర్‌, ఎర్రోళ్ల శ్రీనివాస్‌, చిరుమళ్ల రాకేశ్‌, వెంకటేశ్వర్‌రెడ్డి, కమిషన్‌ మాజీ సభ్యులు గోసుల శ్రీనివాస్‌యాదవ్‌, కిశోర్‌గౌడ్‌ నాయకులు నివేదిత తదితరులతోపాటు స్థానిక నేతలు కూడా కోర్టు వద్దకు చేరుకొని పరిస్థితిని పరిశీలించారు. చివరకు కోర్టు బెయిల్‌ మంజూరు చేయడంతో ఉదయం నుంచి సాగిన ఉత్కంఠకు తెరపడింది.

తెలంగాణభవన్‌ నుంచి హరీశ్‌రావు ఆరా

క్రిశాంక్‌ అరెస్టు, పోలీసుల చర్యలపై బీఆర్‌ఎస్‌ నేతలు తెలంగాణ భవన్‌ నుంచి ఎప్పటికప్పుడు ఆరా తీశారు. బీఆర్‌ఎస్‌ఎల్పీ డిప్యూటీ ఫ్లోర్‌ లీడర్‌ హరీశ్‌రావు పార్టీ న్యాయ బృందంతో సమన్వయం చేశారు. అరెస్టు వ్యవహారంపై న్యాయపరమైన చర్యలను పరిశీలించారు. బెయిల్‌ మంజూరైన తర్వాత క్రిశాంక్‌తో కూడా మాట్లాడారు.

నోటీసులు ఇవ్వకుండా అరెస్టు : లీగల్‌ సెల్‌

క్రిశాంక్‌కు ఎలాంటి నోటీసులు ఇవ్వకుండానే పోలీసులు అరెస్టు చేశారని బీఆర్‌ఎస్‌ లీగల్‌ సెల్‌ న్యాయవాదులు కోర్టుకు తెలిపారు. ప్రభుత్వాన్ని ప్రశ్నించినందుకే కేసులు పెట్టి అరెస్టు చేస్తున్నారని పేర్కొన్నారు. సుప్రీంకోర్టు మార్గదర్శకాలకు విరుద్ధంగా వ్యవహరిస్తున్నారని వెల్లడించారు. ఇదే అంశంపై ఇప్పటికే సీసీఎస్‌లో కేసు ఉండగా, తాజాగా గోపాలపురం పోలీస్‌స్టేషన్‌లో మరో కేసు నమోదు చేయడం కూడా సరికాదని తెలిపారు. క్రిశాంక్‌కు రిమాండ్‌ విధించాలన్న పోలీసుల అభ్యర్థనను కోర్టు తిరస్కరించి బెయిల్‌ మంజూరు చేసింది. దీంతో బీఆర్‌ఎస్‌ లీగల్‌సెల్‌ న్యాయవాదులతో పార్టీ ముఖ్య నేతలతో కోర్టు నుంచి క్రిశాంక్‌ బయటికి వచ్చారు.

ఆధారాలతో ప్రశ్నిస్తే అరెస్టా? : దాసోజు శ్రవణ్‌

ఆధారాలతో మీడియా సమావేశం నిర్వహిస్తే అరెస్టు చేయడం సిగ్గుచేటని బీఆర్‌ఎస్‌ ఎమ్మెల్సీ దాసోజు శ్రవణ్‌ అన్నారు. క్రిశాంక్‌ అరెస్టుపై కోర్టు ఆవరణలో ఆయన మీడియాతో మాట్లాడుతూ.. ‘ఉల్టా చోర్‌ కొత్వాల్‌ కో డాంటే’ అన్నట్టుగా ప్రభుత్వ తీరు ఉందని విమర్శించారు. న్యాయస్థానం ఎలాంటి షరతులు లేకుండా బెయిల్‌ ఇవ్వడం ప్రభుత్వ చర్యలకు చెంపపెట్టు అని వ్యాఖ్యానించారు.

పోలీసు వ్యవస్థ దిగజారింది : ఆర్‌ఎస్‌పీ

పోలీసు వ్యవస్థ తీవ్రంగా దిగజారిపోయిందని బీఆర్‌ఎస్‌ పార్టీ ప్రధానకార్యదర్శి ఆర్‌ఎస్‌ ప్రవీణ్‌కుమార్‌ ఆరోపించారు. క్రిశాంక్‌ లేవనెత్తిన ఆరోపణలకు సమాధానం చెప్పకుండా సైబర్‌ క్రైమ్‌లో ఫిర్యాదులు చేస్తున్నారని అన్నారు. బీఆర్‌ఎస్‌ నేతలు ఫిర్యాదులు చేస్తే కేసులు నమోదు చేయని పోలీసులు, కాంగ్రెస్‌ నేతలు ఫోన్‌ చేస్తే వెంటనే కేసులు రాస్తున్నారని విమర్శించారు.

కాంగ్రెస్‌ ప్రభుత్వం వచ్చిన నాటి నుంచి నాపై 41 కేసులు : క్రిశాంక్‌

విడుదల అనంతరం కోర్టు ఆవరణలో క్రిశాంక్‌ మాట్లాడుతూ..‘ నన్ను పోలీసులు తీసుకెళ్లి బొల్లారం పోలీస్‌స్టేషన్‌లో ఉంచగా, ఉదయం 4 గంటల సమయంలో మళ్లీ అరెస్టు చేసేందుకు వేరే పోలీసులు వచ్చారు. నా ఇంటి తలుపులు బద్దలు కొట్టి నా కుటుంబ సభ్యులను బెదిరించి, చిన్న పాపను ఏడిపించి నాకు బేడీలు వేశారు. కానీ, హైకోర్టు ఇవేం కేసులు అంటూ రిమాండ్‌ను రిజెక్ట్‌ చేసింది. స్వచ్ఛ్‌ బయో కంపెనీ గురించి నేను మాట్లాడి రెండేండ్లు అయినా ఎందుకు రేవంత్‌రెడ్డి ఒక్క మాట మాట్లాడటం లేదు? బయట మేము ఉంటే రేవంత్‌రెడ్డి కుటుంబాన్ని ప్రశ్నలు అడుగుతున్నం.. అందుకే మమ్మల్ని జైలులో వేద్దామని ప్రయత్నిస్తున్నారు. కాంగ్రెస్‌ ప్రభుత్వం వచ్చిన నాటి నుంచి ఇప్పటివరకు నాపై 41 కేసులు పెట్టారు. మెడికవర్‌ దవాఖాన, మాక్స్‌ బీఎన్‌ ఫార్మా కంపెనీ, మైండ్‌ వాల్ట్‌ కార్పొరేట్‌ సంస్థలతో రేవంత్‌రెడ్డికి, వాళ్ల కుటుంబసభ్యులకు ఉన్న సంబంధం ఏమిటి? మెడికవర్‌ దవాఖానలో ఏం రహస్యం ఉన్నది? దానిని అమ్మితే రూ.13,200 కోట్లు ఎలా వచ్చాయి? అని అడిగితే సమాధానం చెప్పడం లేదు’ అని అన్నారు.