IND vs NZ | సెంచరీతో చెలరేగిన విల్‌ యంగ్‌.. భారీ స్కోరు దిశగా న్యూజిలాండ్

IND vs NZ | భారత్‌తో జరుగుతున్న నాలుగో వన్డేలో న్యూజిలాండ్‌ బ్యాటర్లు చెలరేగుతున్నారు. ఓపెనర్లు టిమ్‌ సీఫర్ట్‌, విల్‌ యంగ్‌ శుభారంభం అందించగా.. విల్‌ యంగ్‌ అజేయ సెంచరీతో కదం తొక్కాడు. 88 బంతుల్లోనే వంద పరుగుల మైలురాయిని అందుకున్నాడు. భారత్‌పై వన్డేల్లో అతడికిది తొలి సెంచరీ కావడం విశేషం. మరోవైపు ఫిన్‌ అలెన్‌ కూడా దూకుడుగా ఆడి 41 పరుగులు చేశాడు. 32 ఓవర్లు ముగిసేసరికి న్యూజిలాండ్‌ నాలుగు వికెట్ల నష్టానికి 218 పరుగులు చేసింది.

టాస్‌ గెలిచిన భారత్‌ తొలుత బౌలింగ్‌ ఎంచుకోగా.. కివీస్‌ ఓపెనర్లు టిమ్‌ సీఫర్ట్‌, విల్‌ యంగ్‌ శుభారంభం అందించారు. తొలి వికెట్‌కు 85 పరుగులు జోడించారు. సీఫర్ట్‌ 48 బంతుల్లో 58 పరుగులు చేసి గర్నూర్‌ బ్రార్‌ బౌలింగ్‌లో ఇషాన్‌ కిషన్‌కు క్యాచ్‌ ఇచ్చి ఔటయ్యాడు. ఆ తర్వాత నిక్‌ కెల్లీ (4)ను అక్షర్‌ పటేల్‌ స్టంపౌట్‌ చేయగా.. డీన్‌ ఫాక్స్‌క్రాఫ్ట్‌ (8)ను ఔకిబ్‌ నబీ పెవిలియన్‌కు పంపించాడు. దీంతో 125 పరుగులకే మూడు వికెట్లు కోల్పోయిన న్యూజిలాండ్‌ను విల్‌ యంగ్‌ ఆదుకున్నాడు.

ఒకవైపు వికెట్లు పడుతున్నా యంగ్‌ తన సహజశైలిలో ఆడుతూ పరుగులు రాబట్టాడు. ఫిన్‌ అలెన్‌తో కలిసి స్కోరు బోర్డును పరుగులు పెట్టించాడు. ఈ క్రమంలో అలెన్‌ 30 బంతుల్లో 41 పరుగులు చేసి అక్షర్‌ పటేల్‌ బౌలింగ్‌లో రోహిత్‌ శర్మకు క్యాచ్‌ ఇచ్చి వెనుదిరిగాడు. అతడి ఇన్నింగ్స్‌లో ఐదు ఫోర్లు, రెండు సిక్సర్లు ఉన్నాయి.

అయితే యంగ్‌ మాత్రం ఏమాత్రం తగ్గలేదు. 31వ ఓవర్లో 98 పరుగుల వద్దకు చేరుకున్న అతడు.. కుల్దీప్‌ యాదవ్‌ వేసిన 32వ ఓవర్లో సింగిల్‌ తీసి సెంచరీ పూర్తి చేసుకున్నాడు. 88 బంతుల్లో వంద పరుగులు సాధించాడు. అతడికి మైకేల్‌ బ్రేస్‌వెల్‌ (1*) తోడుగా క్రీజులో ఉన్నాడు. 32 ఓవర్లకు న్యూజిలాండ్‌ స్కోరు 218/4గా ఉంది. భారత బౌలర్లలో అక్షర్‌ పటేల్‌ రెండు వికెట్లు, గర్నూర్‌ బ్రార్‌, ఔకిబ్‌ నబీ తలో వికెట్‌ తీశారు.