Koppula Eshwar | కరువు మండలాల రైతులకు ఆర్థిక సహాయం విడుదల చేయాలి : మాజీ మంత్రి కొప్పుల ఈశ్వర్

జగిత్యాల / ధర్మపురి : కాంగ్రెస్ ప్రభుత్వ నిర్లక్ష్యం, అవగాహనారాహిత్యంతో రాష్ట్రంలో రైతాంగం తీవ్రంగా నష్టపోతోందని మాజీ మంత్రి కొప్పుల ఈశ్వర్‌ ( Koppula Eshwar ) అన్నారు. కరువు మండలాల రైతులకు ఆర్థిక సహాయం ( Financial assistance) విడుదల చేయాలని డిమాండ్ చేశారు.

జగిత్యాల జిల్లా ధర్మపురి మండలం దొంతాపూర్ గ్రామంలో సాగునీరు అందక ఎండిపోతున్న వరి, పత్తి పొలాలను శనివారం పరిశీలించారు. పంటలు ఎండిపోయి తీవ్ర ఆందోళనలో ఉన్న మండల లింగయ్య, మండల భీమయ్య, చంద్రయ్య తదితర రైతులను పరామర్శించి వారికి ధైర్యం చెప్పారు. రైతులు పెట్టుబడులు పెట్టినా చేతికి వచ్చే సమయంలో నీరు అందక పంటలు వృథా అవుతున్నాయని, కనీసం పెట్టిన పెట్టుబడి కూడా దక్కే పరిస్థితి లేదని వాపోయారు.

​బీఆర్‌ఎస్‌ ప్రభుత్వంలో కేసీఆర్‌ సహకారంతో రూ.400 కోట్ల వ్యయంతో ఆర్.ఎఫ్.ఎల్ నుంచి ముత్తూరు వరకు 14 లిఫ్ట్‌లను ఏర్పాటు చేశామని, అందులో దొంతాపూర్ లిఫ్ట్ ఒకటి అని తెలిపారు. 6 నెలలుగా దొంతాపూర్ లిఫ్ట్‌లో 2-3 మోటార్లు మరమ్మతుకు గురైనా ప్రభుత్వం పట్టించుకోవడం లేదని విమర్శించారు.

ఎల్ నినో ప్రభావంతో కరువు పరిస్థితులు వచ్చే అవకాశం ఉందని తెలిసినా ప్రభుత్వం ముందస్తు చర్యలు తీసుకోలేదని ఆరోపించారు. గోదావరిలో నీరు ఉన్నప్పటికీ కన్నెపల్లి నుంచి ఎత్తిపోతలు చేపట్టకుండా ప్రభుత్వం నిర్లక్ష్యం చేస్తోందన్నారు. ప్రభుత్వం తక్షణమే స్పందించి ఎండిపోయిన పంటలకు పరిహారం అందించాలని డిమాండ్‌ చేశారు. ​ఈ కార్యక్రమంలో మాజీ డీసీఎంఎస్ ఛైర్మన్ ఎల్లాల శ్రీకాంత్ రెడ్డి అయ్యోరి రాజేష్, సంగి శేఖర్, బీఆర్‌ఎస్‌ నాయకులు, రైతులు పాల్గొన్నారు.