HBA1C | 3 నెలల స‌గ‌టు చ‌క్కెర స్థాయిల‌ను తెలిపే హెచ్‌బీఏ1సీ ప‌రీక్ష నిజ‌మైన ఫ‌లితాల‌నే ఇస్తుందా..?

21 November 2026 - 12:00
0 0
HBA1C | 3 నెలల స‌గ‌టు చ‌క్కెర స్థాయిల‌ను తెలిపే హెచ్‌బీఏ1సీ ప‌రీక్ష నిజ‌మైన ఫ‌లితాల‌నే ఇస్తుందా..?
Hba1c Test

HBA1C | మధుమేహాన్ని గుర్తించేందుకు వైద్యులు సాధారణంగా సూచించే పరీక్షల్లో హెచ్‌బీఏ1సీ ముఖ్యమైనది. గత రెండు నుంచి మూడు నెలల సగటు రక్తంలో చక్కెర స్థాయిలను ఈ పరీక్ష తెలియజేస్తుంది. అయితే ఈ పరీక్ష ఫలితం అన్ని సందర్భాల్లోనూ కచ్చితంగా ఉంటుందని చెప్పలేం. రక్తహీనత, ఇనుము లోపం, వంశపారంపర్యంగా వచ్చే హిమోగ్లోబిన్ మార్పులు వంటి పరిస్థితులు ఫలితాన్ని ప్రభావితం చేస్తాయి. దీంతో కొందరిలో మధుమేహం ఉన్నా సాధారణ ఫలితం వ‌స్తుంది. మరికొందరిలో వ్యాధి లేకపోయినా అధిక స్థాయిలు కనిపిస్తాయి.

హెచ్‌బీఏ1సీ అంటే..

ఎర్ర రక్తకణాల్లో ఉండే హిమోగ్లోబిన్‌కు ఎంత గ్లూకోజ్ అంటుకుని ఉందో హెచ్‌బీఏ1సీ పరీక్ష కొలుస్తుంది. సాధారణంగా ఈ కణాలు సుమారు 120 రోజులు జీవిస్తాయి. అందుకే గత రెండు, మూడు నెలల సగటు చక్కెర స్థాయిని అంచనా వేయవచ్చు. 5.7 శాతం కంటే తక్కువ ఉంటే సాధారణ స్థాయి, 5.7 నుంచి 6.4 శాతం మధ్య ఉంటే మధుమేహానికి ముందు దశ, 6.5 శాతం లేదా అంతకంటే ఎక్కువ ఉంటే మధుమేహ సూచనగా పరిగణిస్తారు. అయితే హిమోగ్లోబిన్‌లో వచ్చే కొన్ని వంశపారంపర్య మార్పులు పరీక్ష ఫలితాన్ని తప్పుదోవ పట్టిస్తాయి. భారత్‌లో కనిపించే హెచ్‌బీఈ, హెచ్‌బీడీ-పంజాబ్, హెచ్‌బీఎస్ వంటి రకాలు ఈ సమస్యకు కారణం అయ్యే అవ‌కాశం ఉంది. ఇనుము లోపం వల్ల కూడా హెచ్‌బీఏ1సీ స్థాయి వాస్తవానికి మించినట్లు కనిపించే వీలు ఉంటుంది.

ఎలా ప‌రీక్ష చేస్తారు..

పరీక్షలో ఉపయోగించే విధానం కూడా కీలకమే. హెచ్‌పీఎల్‌సీ పద్ధతి ద్వారా చక్కెర స్థాయిని అంచనా వేయడంతో పాటు కొన్ని అసాధారణ హిమోగ్లోబిన్ రకాలను గుర్తిస్తుంది. అయితే నివేదికలోని వివరాలను నిపుణులు జాగ్రత్తగా పరిశీలించాలి. రక్తహీనత, ఇటీవల రక్తస్రావం లేదా ఎర్ర రక్తకణాలు త్వరగా నశించే సమస్యలు ఉంటే హెచ్‌బీఏ1సీ ఫలితం తక్కువగా వ‌స్తుంది. అందువల్ల పరీక్ష ఫలితాలు లక్షణాలకు సరిపోకపోతే వైద్యులు ఇతర పరీక్షలను సూచిస్తారు.

ఇత‌ర ప‌రీక్ష‌లూ కీల‌క‌మే..

అలాంటి సందర్భాల్లో కనీసం ఎనిమిది గంటలు ఉపవాసం తర్వాత చేసే రక్తంలో చక్కెర పరీక్ష, 75 గ్రాముల గ్లూకోజ్ ద్రావణం తాగిన రెండు గంటల తర్వాత చేసే ఓరల్ గ్లూకోజ్ టాలరెన్స్ పరీక్ష ఉపయోగపడతాయి. వీటిలో వరుసగా 126 మి.గ్రా./డెసిలీటర్, 200 మి.గ్రా./డెసిలీటర్ లేదా అంతకంటే ఎక్కువ స్థాయిలు మధుమేహ సూచనగా పరిగణిస్తారు. ఫ్రక్టోసమైన్ పరీక్ష గత రెండు, మూడు వారాల సగటు చక్కెర స్థాయిని తెలియజేస్తుంది. అయితే ఇది ప్రధానంగా పర్యవేక్షణకు ఉపయోగపడుతుంది. కాబట్టి హెచ్‌బీఏ1సీ ఫలితాన్నే అంతిమంగా భావించకుండా, అవసరమైతే ఇతర పరీక్షలతో నిర్ధారించుకోవాలని నిపుణులు సూచిస్తున్నారు.

Comments (0)

User