CV anand | తెలంగాణ గ్రేహౌండ్స్ దేశానికే ఆదర్శం : డీజీపీ సీవీ ఆనంద్

CV Anand | తెలంగాణ గ్రేహౌండ్స్‌ దేశ పోలీసు వ్యవస్థకే ఆదర్శంగా నిలుస్తోందని డీజీపీ సీవీ ఆనంద్ ప్ర‌శంసించారు. రాజేంద్రనగర్ లో శనివారం గ్రేహౌండ్స్‌ షూటింగ్‌ హౌస్‌ను డీజీపీ సీవీ ఆనంద్ ప్రారంభించారు. ఈ సంద‌ర్భంగా ఆయ‌న మాట్లాడుతూ.. నక్సలిజం, ఉగ్రవాదం, హైజాకింగ్‌ వంటి ముప్పులను ఎదుర్కోవడంలో రాష్ట్ర అంతర్గత భద్రతతోపాటు దేశ భద్రతలోనూ గ్రేహౌండ్స్‌, ఆక్టోపస్‌ దళాలు కీలక పాత్ర పోషిస్తున్నాయని తెలిపారు. దేశంలోని ఇతర రాష్ట్రాల్లోనూ గ్రేహౌండ్స్‌ తరహా ప్రత్యేక దళాలను ఏర్పాటు చేశారన్నారు.

1980 కాలంలో నక్సల్స్‌ కార్యకలాపాలు, ఉగ్రవాద ముప్పులను సమర్థంగా ఎదుర్కోవడంలో గ్రేహౌండ్స్ కీల‌క పాత్ర పోషించిందని గుర్తుచేశారు. ఇటీవల అక్టోబర్‌ 31న గుజరాత్‌లోని కెవాడియాలో నిర్వహించిన జాతీయ ఏక్తా దివస్‌ కార్యక్రమంలో తెలంగాణ గ్రేహౌండ్స్‌ ప్రదర్శించిన కవాతు అందరినీ ఆకట్టుకుందని, మన్ననలు పొందిందని తెలిపారు.

గ్రేహౌండ్స్‌ సిబ్బంది మెరుగైన శిక్షణ, క్రమశిక్షణ, అంకితభావంతో విధులు నిర్వర్తించాలని డీజీపీ సీవీ ఆనంద్ సూచించారు. గ్రేహౌండ్స్‌ సిబ్బంది సంఖ్య కనీసం 700 మందికి తగ్గకుండా ఉంటుందన్నారు. కర్రెగుట్టలు ప్రాంతాల్లో సాధనతోపాటు అటవీ ప్రాంతాల్లో జంగిల్‌ ప్రాక్టీస్‌, వార్‌ఫేర్‌ శిక్షణను నిరంతరం కొనసాగించాలన్నారు. హైజాకింగ్‌, ఉగ్రవాద దాడులు, ఎలాంటి అత్యవసర పరిస్థితులను ఎదుర్కొనేందుకు ఎల్లప్పుడూ సిద్ధంగా ఉండాలని స్పష్టం చేశారు. ‘ఎనీ టైమ్‌.. ఎనీ సిచ్యుయేషన్‌.. యాక్షన్‌కు రెడీ’ అనే స్ఫూర్తితో పనిచేయాలని పిలుపునిచ్చారు.

రాజస్థాన్‌లోని జోధ్‌పూర్‌లో 2027 ఫిబ్రవరి 2 నుంచి జరగనున్న ఆల్‌ ఇండియా పోలీస్‌ కమాండో పోటీల్లో తెలంగాణ గ్రేహౌండ్స్ బృందం ప్రథమ బహుమతి సాధించాలని ఆకాంక్షించారు. శిక్షణ, షూటింగ్‌లో ప్రతిభ కనబరిచిన సిబ్బందిని అభినందించారు. ప్రతి ఒక్కరూ ఇదే స్ఫూర్తితో రాణించి జాతీయ స్థాయిలో తెలంగాణ పోలీసుల కీర్తిని ఇనుమడింపజేయాలని సూచించారు.

కఠినమైన శిక్షణ…

డిజి ఆపరేషన్స్‌ డా. అనిల్‌కుమార్‌ మాట్లాడుతూ.. సిబ్బందికి పూర్తి అంకితభావంతో శిక్షణ అందిస్తున్నామని తెలిపారు. శారీరక దృఢత్వం, బ్రీఫింగ్‌, ఫైరింగ్‌ నైపుణ్యాలను పెంపొందించేందుకు ప్రత్యేక చర్యలు తీసుకుంటున్నట్లు వివరించారు. రెండేళ్ల క్రితం జరిగిన ఆల్‌ ఇండియా పోలీస్‌ కమాండో పోటీల్లో నాలుగో స్థానం సాధించామని డిజిపికి వివరించారు.

నాలుగు సూత్రాలే కీలకం

సందీప్‌, పవన్‌, శ్రీధర్‌ అమర వీరుల త్యాగాలకు స్మృతికి ‘SPS OODA షూట్‌ హౌస్‌’ అని నామకరణం చేశారు.‘OODA’ అనే ప్రత్యేక భావనను అనుసంధానించారు. Observe (పరిశీలన), Orient (పరిస్థితులకు అనుగుణంగా సిద్ధం కావడం), Decide (నిర్ణయం తీసుకోవడం), Act (చర్య చేపట్టడం) అనే నాలుగు సూత్రాలు కమాండోల విధి నిర్వహణలో కీలకమని వివరించేలా దీనిని రూపొందించారు. క్లిష్ట పరిస్థితుల్లో వేగంగా పరిస్థితులను అంచనా వేసి, సరైన నిర్ణయం తీసుకుని చర్యలు చేపట్టే సామర్థ్యాన్ని పెంపొందించుకోవడమే దీని ఉద్దేశం.

ఈ కార్యక్రమంలో గ్రేహౌండ్స్‌, ఆక్టోపస్‌ విభాగాల అధిపతి డా. అనిల్‌కుమార్‌, డీసీపీ రాజేంద్ర నగర్, శ్రీనివాస్, ఏ ఎస్పీ ఫాతిమా, గ్రూప్ కమాండర్లు ఎండీ అష్ఫాక్, వెంకటేశ్వర్లు, స్క్వాడ్రన్‌ కమాండర్‌ రాజు, క్యాంపు కమాండెంట్ విద్యాసాగర్‌, కమ్యూనికేషన్‌ డీఎస్పీ సలీం, అసిస్టెంట్ కమాండెంట్ ఎండీ షరీఫ్‌ బెగ్ తదితర అధికారులు పాల్గొన్నారు.