సార‌పాక‌లో బాల గ్రామ సభ

బూర్గంపహాడ్, నవంబర్ 14 : భారతదేశ భవిష్యత్ బాలల చేతుల్లోనే ఉందని బూర్గంప‌హాడ్ మండ‌లం సారపాక ఉప సర్పంచ్ కన్నెదారి రమేశ్ అన్నారు. శనివారం సారపాక పంచాయతీలో ఈవో గుగులోత్ రవికుమార్ అధ్యక్షతన బాల గ్రామ సభ నిర్వహించగా ఆయన పాల్గొని మాట్లాడారు. గ్రామాభివృద్దిలో పిల్లల భాగస్వామ్యం, హక్కులు, విద్య, ఆరోగ్యం, పర్యావరణ పరిరక్షణ వంటి పలు కీలక అంశాలపై చర్చించారు. ప్రథమ ప్రధాని పండిట్ జవహర్ లాల్ నెహ్రూ పిల్లలను ఎంతగానో ప్రేమించేవారని ఆయన పుట్టిన రోజును బాలల దినోత్సవంగా జరుపుకోవడం గొప్ప విషయమన్నారు. అదేవిధంగా నాగినేనిప్రోలు రెడ్డిపాలెం, మోరంపల్లిబంజర్, కృష్ణసాగర్, బూర్గంపహాడ్, ఇరవెండి, పినపాక పట్టీనగర్, అంజనాపురం, లక్ష్మీపురం, ముసలిమడుగు తదితర పంచాయతీల్లో బాల గ్రామ సభలు నిర్వహించి బాలల దినోత్సవ విశిష్టతను ఆయా సర్పంచులు చాటిచెప్పారు. ఈ కార్యక్రమాల్లో ఎంపీడీవో జమలారెడ్డి, ఎంపీవో రామకృష్ణతో పాటు ఆయా పంచాయతీల సర్పంచులు, ఉప సర్పంచులు, పాలకవర్గాల సభ్యులు, పంచాయతీ సిబ్బంది పాల్గొన్నారు.