Congress | కాంగ్రెస్‌ అంటేనే కొట్లాటలు.. ఆధిపత్యం కోసం పోరాటం.. తరాలుగా ఇదే తీరు

Congress | హనుమకొండ, ఆగస్టు 21(నమస్తే తెలంగాణ ప్రతినిధి) : ‘కాంగ్రెస్‌ అంటేనే కొట్లాటలు.. పైసల కోసం దందాలు.. ఆ పార్టీ అధికారంలో ఉంటే అంతే. ప్రజల గురించి పట్టించుకోరు. పరిపాలన చెయ్యరు. పదవుల కోసం వాళ్లలో వాళ్లే కొట్లాడుకుంటరు. కాంగ్రెస్‌ ఎప్పుడు అధికారంలో ఉన్నా ఇదే పరిస్థితి’ రాజకీయవర్గాల్లో నిత్యం వినిపించే మాటలివీ. తరాలు మారుతున్నా అప్పుడు, ఇప్పుడు, ఎప్పుడైనా కాంగ్రెస్‌ తీరు ఇలాగే ఉంటున్నది. సీఎం రేవంత్‌రెడ్డి నాయకత్వంపై మంత్రులు, సొంత పార్టీ ఎమ్మెల్యేలకు ఏమాత్రం విశ్వాసం లేనట్టు కనిపిస్తున్నది. నిత్యం ఎవరో ఒక మంత్రితో ముఖ్యమంత్రికి విభేదాలు, వివాదాలు ఉంటున్నాయి. ఆర్థిక వ్యవహారాలే మంత్రులతో విభేదాలకు ప్రధాన కారణాలుగా కనిపిస్తున్నాయి.

ప్రభుత్వం ఏర్పడిన కొత్తలోనే సీఎం రేవంత్‌రెడ్డికి, సాగునీటి మంత్రి ఉత్తమ్‌కుమార్‌రెడ్డికి మధ్య ఆధిపత్య పోరు మొదలైంది. ఇప్పుడు మంత్రికి తెలియకుండానే సాగునీటి శాఖలో నేరుగా సీఎం నిర్ణయాలు తీసుకొనే దాకా రావడంతో ఇద్దరి మధ్య అంతరం మరింత పెరిగింది. రేవంత్‌తో భట్టికి అస్సలు కుదరడం లేదు. ప్రభుత్వం ఏర్పడిన కొత్తలోనే భట్టిపై ఉద్దేశపూర్వకంగా కమీషన్ల ఆరోపణలు చేయించడం, ఆ తర్వాత పదవుల పంపిణీలో సీఎం రేవంత్‌రెడ్డి ఏకపక్షంగా వ్యవహరించడంతో ఇద్దరి మధ్య తీవ్రస్థాయిలో విభేదాలు కొనసాగుతున్నాయి. రేవంత్‌కు సొంత జిల్లా మంత్రి జూపల్లికి పొసగడం లేదు. ఎక్సైజ్‌ శాఖలోని డిస్టిల్లరీ అనుమతుల విషయంలో ఇద్దరి మధ్య పంచాయితీ మొదలైంది. ఇప్పటికీ మంత్రికి తెలియకుండానే ముఖ్యమంత్రి ఆఫీసు నిర్ణయాలు తీసుకుంటుండటంతో జూపల్లి దూరంగా ఉంటున్నారు. మంత్రి కొండా సురేఖతో రేవంత్‌కు మధ్య నిత్యం పోరు సాగుతున్నది.

సీఎం వర్సెస్‌ పీసీసీ చీఫ్‌

కాంగ్రెస్‌ అధికారంలో ఉంటే ముఖ్యమంత్రికి, పార్టీ రాష్ట్ర అధ్యక్షుడికి మధ్య పంచాయితీ అనేది సహజ వ్యవహారం అనేలా ఉంటుంది. ప్రస్తుత ప్రభుత్వంలోనూ అదే కొనసాగుతున్నది. సీఎం రేవంత్‌రెడ్డికి, పీసీసీ చీఫ్‌ మహేశ్‌కుమార్‌గౌడ్‌కు మధ్య చాలా అంశాల్లో నెలకొన్న పంచాయితీ తీవ్రమైన విభేదాల వరకు వెళ్లింది. ఎమ్మెల్సీ పదవులు, నామినేటెడ్‌ పదవులు.. ప్రభుత్వంలోని కొన్ని నిర్ణయాలు, అక్రమాలు, అవినీతి వ్యవహారాలపై పీసీసీ చీఫ్‌ కాంగ్రెస్‌ జాతీయ నాయకత్వానికి ఫిర్యాదు చేశారు. సీఎం తీరు ఇలాగే కొనసాగితే పార్టీకి నష్టమని పేర్కొన్నారు. రాష్ట్ర వ్యవహారాలపై అధిష్ఠానానికి ఫిర్యాదు చేసినందుకు పీసీసీ చీఫ్‌పై రేవంత్‌ గుర్రుగా ఉన్నారు.

మంత్రుల మధ్య పోరు

ప్రభుత్వంలో మంత్రుల మధ్య ఆధిపత్యం, లావాదేవీల పంచాయితీలు కొనసాగుతున్నాయి. ఉమ్మడి వరంగల్‌ జిల్లా ఇన్‌చార్జ్‌ మంత్రి పొంగులేటి శ్రీనివాస్‌రెడ్డికి జిల్లా మంత్రులు సీతక్క, కొండా సురేఖ కు మధ్య తీవ్రమైన విభేదాలున్నాయి. సింగరేణి వ్యవహారంలో భట్టి, కోమటిరెడ్డి మధ్య లొల్లి పెద్ద దుమారమే రేపింది. ఉమ్మడి ఖమ్మం జిల్లా మంత్రులు భట్టి విక్రమార్క, తుమ్మల నాగేశ్వర్‌రావు, పొంగులేటి శ్రీనివాస్‌రెడ్డి మధ్య ఆధిపత్య పోరు కొనసాగుతున్నది.

సీఎం వర్సెస్‌ ఎమ్మెల్యేలు

అధికార పార్టీలో కుటుంబ పెద్దగా భావించే సీఎంపై ఎమ్మెల్యేలకు విశ్వాసం ఉండటం లేదు. మునుగోడు ఎమ్మెల్యే కోమటిరెడ్డి రాజగోపాల్‌రెడ్డి, జడ్చర్ల ఎమ్మెల్యే అనిరుధ్‌రెడ్డి… నిత్యం సీఎంపై విమర్శలు చేస్తున్నారు. చిన్నారెడ్డి సైతం వనపర్తి టికెట్‌ కేటాయింపులో ఆర్థిక వ్యవహారాల ప్రస్తావన తేవడంతో పెద్ద చర్చకు దారి తీసింది. బీఆర్‌ఎస్‌ తరపున గెలిచి కాంగ్రెస్‌లో చేరిన బాన్సువాడ ఎమ్మెల్యే పోచారం సైతం రేవంత్‌పై విమర్శలు చేశారు. మంచిర్యాల ఎమ్మెల్యే ప్రేమ్‌సాగర్‌రావు, ఇబ్రహీంపట్నం ఎమ్మెల్యే రంగారెడ్డి, పరిగి ఎమ్మెల్యే రామ్మోహన్‌రెడ్డి మంత్రి పదవుల విషయంలో సీఎంపై అసంతృప్తితో ఉన్నారు.

సెగ్మెంట్లలో కొట్లాటలు

కాంగ్రెస్‌ ఎమ్మెల్యేలున్న నియోజకవర్గాల్లోనూ ఆధిపత్య పోరు కొనసాగుతున్నది. పరకాలలో ఎమ్మెల్యే రేవూరి ప్రకాశ్‌రెడ్డి, మంత్రి కొండా సురేఖ మధ్య, వనపర్తిలో ఎమ్మెల్యే మేఘారెడ్డి, మాజీ ఎమ్మెల్యే చిన్నారెడ్డి, మంచిర్యాలలో ఎమ్మెల్యే ప్రేమ్‌సాగర్‌రావుకు, నియోజకవర్గ కీలక నేత, మంత్రి వివేక్‌ అనుచరుడు జగన్మోహన్‌రావు మధ్య వర్గపోరు సాగుతున్నది. తుంగతుర్తిలో ఎమ్మెల్యే మందుల సామేల్‌, భువనగిరి ఎంపీ చామల కిరణ్‌కుమార్‌రెడ్డి మధ్య పంచాయితీ ఉన్నది. మంత్రి కోమటిరెడ్డి వెంకటరెడ్డిపై మందుల సామేల్‌, ఎమ్మెల్యే రాజ్‌గోపాల్‌రెడ్డి, సామేల్‌ పరస్ప రం విమర్శలు చేసుకున్నారు. పొంగులేటి మద్దతుతో అసమ్మతి వర్గం పాలకుర్తి ఎమ్మెల్యే యశస్వినీరెడ్డికి వ్యతిరేకంగా ఫిర్యాదులు చేస్తున్నారు. ఆదిలాబాద్‌ ఇన్‌చార్జి కంది శ్రీనివాస్‌రెడ్డి, మార్కెట్‌ కమిటీ మాజీ చైర్మన్‌ సంజీవరెడ్డి, బాన్సువాడలో ఎమ్మెల్యే పోచారం శ్రీనివాస్‌రెడ్డి, నియోజకవర్గ ఇన్‌చార్జి ఏనుగు రవీందర్‌రెడ్డికి మధ్య వర్గపోరు ఉన్నది.

కాంగ్రెస్‌ కొట్లాటల చరిత్ర

• ఉమ్మడి ఆంధ్రప్రదేశ్‌లో 1956 నవంబర్‌ 1 నుంచి 1960 జనవరి 11 వరకు నీలం సంజీవరెడ్డి సీఎంగా పనిచేశారు. ఏఐసీసీ అధ్యక్షుడిగా బాధ్యతలు చేపట్టేందుకు సంజీవరెడ్డి రాజీనామా చేశారు. ఆ తర్వాత నుంచి కాంగ్రెస్‌లో కొట్లాట మొదలైంది.
• 1960 జనవరి 11న దామోదరం సంజీవయ్య సీఎం పదవి చేపట్టారు. తర్వాత అసెంబ్లీ ఎన్నికల్లో గెలిచినా సంజీవయ్య పదవి నిలువలేదు. సంజీవరెడ్డి మళ్లీ రాష్ర్టానికి వచ్చి 1962 మార్చి 12న రెండోసారి సీఎం అయ్యి పదవుల కోసం పోరాటంలో పైచేయి సాధించారు. తర్వాత సుప్రీంకోర్టు తీర్పుతో సంజీవరెడ్డి 1964 ఫిబ్రవరి 20న పదవి నుంచి తప్పుకోవాల్సి వచ్చింది.
• 1964 ఫిబ్రవరి 21నుంచి సీఎంగా కాసు బ్రహ్మానందరెడ్డి ఏడున్నరేండ్లు ఆధిపత్యం చెలాయించారు. తర్వాత నాయకుల పదవీ పోరాటంలో 1971 సెప్టెంబర్‌ 30న పదవికి రాజీనామా చేయాల్సి వచ్చింది.
• పీవీ నరసింహారావు 1971 సెప్టెంబర్‌ 30న సీఎం పదవి చేపట్టారు. సీమాంధ్ర నాయకుల రాజకీయాలతో 1973 జనవరి 10న పదవి నుంచి తప్పుకొన్నారు.
• రాష్ట్రపతి పాలన తర్వాత 1973 డిసెంబర్‌ 10న జలగం వెంగళరావు సీఎం అయ్యారు. తర్వాత అసెంబ్లీ ఎన్నికల్లో కాంగ్రెస్‌ గెలిచినా పదవి కోసం వర్గపోరుతో జలగం వెంగళరావు 1978 మార్చి 6న పదవికి రాజీనామా చేయాల్సి వచ్చింది.
• దేశవ్యాప్తంగా ఎన్నికల్లో కాంగ్రెస్‌కు ప్రతికూల ఫలితాలు వచ్చినా ఉమ్మడి ఏపీలో కాంగ్రెస్‌ గెలిచింది. సిట్టింగ్‌ సీఎం జలగం వెంగళరావును పక్కనబెట్టి 1978 మార్చి 6న మర్రి చెన్నారెడ్డి ముఖ్యమంత్రిగా బాధ్యతలు చేపట్టారు. కాంగ్రెస్‌లో అంతర్గత విభేదాలు ముదరడంతో 1980 అక్టోబర్‌ 11న రాజీనామా చేయాల్సి వచ్చింది.
• వర్గపోరు తర్వాత కాంగ్రెస్‌ అధిష్ఠానం టంగుటూరి అంజయ్యను 1980 అక్టోబర్‌ 11న సీఎంగా ఎంపిక చేసింది. పదవుల కోసం ఇతర నేతల పోరాటంలో 1982 ఫిబ్రవరి 24న అంజయ్య ముఖ్యమంత్రి పదవికి రాజానామా చేశారు.
• ఐదేండ్ల పదవీకాలంలోనే మూడో ముఖ్యమంత్రిగా భవనం వెంకట్రామిరెడ్డి 1982 ఫిబ్రవరి 24న బాధ్యతలు చేపట్టారు. పదవుల కొట్లాటలో 1982 సెప్టెంబర్‌ 20న ఆయన రాజీనామా చేశారు.
• ఐదేండ్లలో నాలుగో ముఖ్యమంత్రి కోట్ల విజయభాస్కర్‌రెడ్డి 1982 సెప్టెంబర్‌ 20న పదవిని చేపట్టారు. ఆ తర్వాత 1983 జనవరిలో జరిగిన ఎన్నికల్లో కాంగ్రెస్‌ ఓడిపోవడంతో సీఎంల మార్పు ఆగిపోయింది.
• 1989 అసెంబ్లీ ఎన్నికల్లో కాంగ్రెస్‌ విజయం సాధించింది. చెన్నారెడ్డి 1989 డిసెంబర్‌ 3న రెండోసారి ముఖ్యమంత్రి అయ్యారు. వర్గపోరుతో 1990 డిసెంబర్‌ 17న పదవి నుంచి తప్పుకొన్నారు.
• కాంగ్రెస్‌ అంతర్గత కలహాల మధ్య 1990 డిసెంబర్‌ 17న నేదురుమల్లి జనార్దన్‌రెడ్డి ముఖ్యమంత్రి పదవి చేపట్టారు. హస్తం పార్టీలో పదవుల కోసం కలహాలు మరింత ముదరడంతో 1992 అక్టోబర్‌ 9న రాజీనామా చేయాల్సి వచ్చింది.
• పదుల సంఖ్యలో నాయకులు ముఖ్యమంత్రి పదవికి పోటీ పడే పరిస్థితిలో కోట్ల విజయభాస్కర్‌రెడ్డి 1992 అక్టోబర్‌ 9న రెండోసారి సీఎంగా బాధ్యతలు చేపట్టారు. డిసెంబర్‌ 1994 డిసెంబర్‌లో ఎన్నికల్లో కాంగ్రెస్‌ దారుణంగా ఓడిపోయింది.
• 2004 మే 14న సీఎం వైఎస్‌ రాజశేఖరరెడ్డి ఐదేండ్లపాటు పదవిలో ఉన్న ఏకైక ముఖ్యమంత్రిగా నిలిచారు. సీనియర్లు అసమ్మతి రాజకీయాలు చేస్తూ జాతీయ నాయకత్వానికి ఫిర్యాదులు చేశారు. సీనియర్‌ నేతలు పీ జనార్దన్‌రెడ్డి, మర్రి శశిధర్‌రెడ్డి, ఉప్పునూతల పురుషోత్తమరెడ్డి, పాల్వాయి గోవర్ధన్‌రెడ్డిలు రాజశేఖర్‌రెడ్డి ప్రభుత్వంపై అసమ్మతి రాజకీయాలు చేశారు.
• వైఎస్‌ రాజశేఖర్‌రెడ్డి మరణంతో 2009 సెప్టెంబర్‌ 2న కొణిజేటి రోశయ్య ముఖ్యమంత్రి అయ్యారు. కాంగ్రెస్‌లోని అసమ్మతి రాజకీయాల కారణంగా 2010 నవంబర్‌ 24న పదవికి రాజీనామా చేశారు.
• తెలంగాణ ఉద్యమం ఉధృతంగా ఉన్న సమయంలో రోశయ్య తర్వాత ఎన్‌ కిరణ్‌కుమార్‌రెడ్డి 2010 నవంబర్‌ 24న సీఎంగా బాధ్యతలు చేపట్టారు. ఉమ్మడి ఆంధ్రప్రదేశ్‌ చివరి సీఎంగా పనిచేశారు.

మంత్రులతో ఎమ్మెల్యేల పంచాయితీ

కాంగ్రెస్‌ పార్టీలోని మంత్రులు, ఎమ్మెల్యేలకు ఎక్కడా సఖ్యత ఉన్న పరిస్థితి కనిపించడం లేదు. ప్రభుత్వ, పార్టీ కార్యక్రమాలకు మంత్రులను తమ నియోజకవర్గాల్లోని ఎమ్మెల్యేలు ఆహ్వానించడం అస్సలు జరుగడం లేదు. రెవెన్యూ మంత్రి పొంగులేటి వ్యవహారాలపై అధికార పార్టీ ఎమ్మెల్యేలు కోమటిరెడ్డి రాజ్‌గోపాల్‌రెడ్డి, అనిరుధ్‌రెడ్డి పదేపదే తీవ్రమైన విమర్శలు చేస్తున్నారు. దేవాదాయ మంత్రి కొండా సురేఖకు ఉమ్మడి వరంగల్‌ జిల్లాలోని దాదాపు అందరు అధికార పార్టీ ఎమ్మెల్యేలతో పంచాయితీ ఉన్నది.

దాదాపు రెండేండ్లుగా కొండా సురేఖ సొంత నియోజకవర్గంలో తప్పితే ఇతర సెగ్మెంట్లలోని అధికారిక, పార్టీ కార్యక్రమాల్లో పాల్గొనలేదు. పరకాల ఎమ్మెల్యే రేవూరి ప్రకాశ్‌రెడ్డితో కొండా సురేఖకు తీవ్రమైన విభేదాలు ఉన్నాయి. రెండు వర్గాల మధ్య కేసులు, కొట్లాటలు కొనసాగుతున్నాయి. వరంగల్‌ పశ్చిమ ఎమ్మెల్యే నాయిని రాజేందర్‌రెడ్డితోనూ కొండా సురేఖకు మధ్య ఎప్పటి నుంచో అంతరం ఉన్నది. ఉమ్మడి వరంగల్‌లోని నర్సంపేట, భూపాలపల్లి, వర్ధన్నపేట ఎమ్మెల్యేలతోనూ మంత్రి సురేఖకు పొసగడం లేదు. ఉమ్మడి ఆదిలాబాద్‌ జిల్లాలో మంత్రి వివేక్‌ వెంకటస్వామి, మంచిర్యాల ఎమ్మెల్యే ప్రేమ్‌సాగర్‌ మధ్య విభేదాలు ముదిరాయి.