True-Up Charges | ‘సర్దుబాటు’ ముసుగులో కాంగ్రెస్‌ సర్కార్‌ షాక్‌… ట్రూ-అప్ చార్జీల పేరిట 5,420 కోట్ల చార్జీల భారం

True-Up Charges | హైదరాబాద్‌, అక్టోబర్‌ 6 (నమస్తే తెలంగాణ) : రాష్ట్రంలోని విద్యుత్తు వినియోగదారులపై కాంగ్రెస్‌ సర్కార్‌ ట్రూ అప్‌ చార్జీల భారం మోపింది. రూ.5,420 కోట్లను వినియోగదారులపై వడ్డించింది. ఇప్పటికే ఓవైపు కోతలతో ప్రజలు, రైతులు అల్లాడుతుంటే.. ఇప్పుడు ట్రూ అప్‌ చార్జీల రూపంలో సర్కార్‌ వాతలు పెట్టింది. వాస్తవానికి ట్రూ అప్‌ భారం నుంచి ప్రజలకు మినహాయింపు ఇవ్వచ్చు. ఏపీ సర్కార్‌ తరహాలో ట్రూ అప్‌ చార్జీలను ప్రభుత్వమే చెల్లించవచ్చు. గతంలో బీఆర్‌ఎస్‌ సర్కార్‌ సైతం వినియోగదారులపై చార్జీల భారం మోపేందుకు అంగీకరించలేదు. కానీ కాంగ్రెస్‌ సర్కార్‌ మాత్రం చార్జీలను పెంచడం లేదని పైకి చెప్పుకొంటూ పరోక్షంగా రూ.5,420కోట్ల భారాన్ని మోపింది. 2022-23 సంవత్సరంలో రెండు డిస్కమ్‌లలో కలిపి 17,629.25 మిలియన్‌ యూనిట్ల విద్యుత్తు వినియోగమయ్యింది.

ఇక 2023 -24లో 25,154.04 మిలియన్‌ యూనిట్ల విద్యుత్తును డిస్కమ్‌లు సరఫరా చేశాయి. లోటును పూడ్చుకోవడంలో భాగంగా ట్రూ అప్‌ చార్జీల వసూలుకు డిస్కమ్‌లు ప్రయత్నించగా, ఈఆర్సీ అనుమతినిచ్చింది. ఉదాహరణకు 210 యూనిట్లు వినియోగించిన వారు నవంబర్‌ నెలలో రూ.63, డిసెంబర్‌ నుంచి నెలకు 105 అదనంగా చెల్లించాల్సి ఉంటుంది. ఇలా దక్షిణ డిస్కమ్‌ పరిధిలో 29 నెలలు.. ఉత్తర డిస్కమ్‌ పరిధిలో 26 నెలల పాటు ఇలా అదనపు చార్జీలను వడ్డిస్తారు. చూసేందుకు చిన్న మొత్తంలా అనిపించినా నెలకు పడే అదనపు భారం చూస్తే గుండెలు బాదుకోవడం ఖాయంగా కనిపిస్తున్నది.

ట్రూ డౌన్‌ అయ్యే చాన్స్‌..

విద్యుత్తు కొనుగోలు అంచనాలు, వాస్తవిక కొనుగోలుకు మధ్య ఉన్న తేడానే ట్రూ అప్‌ లేదా ట్రూ డౌన్‌గా పిలుస్తారు. అంచనాలకు మించితే ట్రూ అప్‌గా, తగ్గితే ట్రూ డౌన్‌గా వ్యవహరిస్తారు. విద్యుత్తు సంస్థల ఖర్చులను నియంత్రిస్తూ దేనికి ఎంత ఖర్చుపెట్టాలనే వివరాలతో టారిఫ్‌ ఆర్డర్‌ను ఈఆర్సీ జారీ చేస్తుంది. దీనికి లోబడే డిస్కమ్‌లు ఖర్చు చేయాలి. కానీ విద్యుత్తు కొనుగోళ్లు, వడ్డీలు, ఓఅండ్‌ఎం ఖర్చుల విషయంలో డిస్కమ్‌లు ఎక్కువగా ఖర్చు చేస్తున్నాయి. ప్రాథమిక అంచనాలకు మించిన వ్యయాన్ని రాబట్టుకొనేందుకు ప్రయత్నించాయి. డిస్కమ్‌లు కోరిన మొత్తాన్ని యథాతథంగా ఆమోదించాల్సిన అవసరం లేదని విద్యుత్తురంగ నిపుణులు అభిప్రాయపడుతున్నారు. ట్రూ అప్‌యే కాదు, ట్రూ డౌన్‌ కూడా సాధ్యమేనంటున్నారు.

అద్దె ఇండ్లల్లోని వారికి నష్టం

ట్రూ అప్‌ చార్జీల భారంతో అద్దె ఇండ్లల్లోని వారికి కొత్త తిప్పలు వచ్చిపడ్డాయి. 2022-23, 2023 -24 సంవత్సరాల్లో అద్దె ఇంట్లో ఉన్న వారు మారిపోయి ఉంటారు. గతంలో కిరాయికి ఉన్న వారు వాడిన కరెంటుకు ఇప్పుడు అద్దెకు ఉంటున్న వారు బిల్లులు కట్టాల్సిన పరిస్థితి ఏర్పడుతున్నది. ఇలా భారం వేయడం ఎంతవరకు సమంజసమనే వాదనలు వినిపిస్తున్నాయి. ఇప్పుడు అద్దెకున్న వారు సదరు బిల్లులను చెల్లించబోమని మొండికేస్తే ఇంటి యజమానిపై ఆ భారం పడే అవకాశమున్నది. ఇద్దరూ కట్టకపోతే పరిస్థితి ఏందని ప్రశ్న తలెత్తుతున్నది.
ఆలస్యం డిస్కమ్‌లది..

మూల్యం వినియోగదారులకు..

రా్రష్ట్ర ప్రభుత్వ విధానాలతోనే డిస్కమ్‌లు నష్టాలను చవిచూస్తున్నాయి. ప్రత్యేకించి వ్యవసాయ వినియోగానికి సంబంధించిన సబ్సిడీలను సకాలంలో ఇవ్వడం లేదు. ప్రభుత్వం ఇచ్చిన సబ్సిడీలో డిస్కమ్‌లు నష్టాలను పూడ్చుకొనే పరిస్థితి కనిపించడం లేదు. విద్యుత్తు సంస్థలు ట్రూ అప్‌ పిటిషన్లు పెండింగ్‌లో పెట్టి తర్వాత కాలంలో ఒకేసారి క్లెయిమ్‌ చేయడం సరైన విధానం కాదని నిపుణులు అభిప్రాయపడుతున్నారు. సకాలంలో ట్రూ అప్‌ పిటిషన్లు దాఖలు చేయకపోవడం వల్ల ఈ భారం ప్రజలపై పడుతున్నది.

బీఆర్‌ఎస్‌ హయాంలో ఉపశమనం

2016-2022 మధ్యకాలంలో ట్రూ అప్‌ చార్జీల కింద రూ.12వేల కోట్లు వసూలు చేసేందుకు ఈఆర్సీ అనుమతినిచ్చింది. కానీ ఈ భారాన్ని కేసీఆర్‌ సర్కార్‌ ప్రజలపై వేయలేదు. విద్యుత్తు సంస్థల భారాన్ని ప్రజలపై వేయవద్దని స్పష్టమైన ఆదేశాలిచ్చింది. వినియోగదారులపై నేరుగా భారాన్ని వేయకుండా ఐదేండ్లల్లో ప్రభుత్వమే చెల్లిస్తుందని స్పష్టంచేసింది. ఇందులో రూ.10వేల కోట్లు ట్రూ అప్‌ కాగా, 2వేల కోట్లు ఉదయ్‌ సేవింగ్స్‌ రివర్సల్‌ కింద ప్రభుత్వమే చెల్లిస్తామని హామీ ఇచ్చింది. కేసీఆర్‌ తీసుకున్న ఈ నిర్ణయంతో వినియోగదారులకు ఉపశమనం కలిగింది.

రూ.4వేల కోట్లు భరించిన ఏపీ సర్కార్‌

మన పక్క రాష్ట్రం ఏపీ కూడా రూ.4,498 కోట్ల ట్రూ అప్‌ చార్జీలను తామే భరిస్తామని ప్రకటించింది. ప్రతి విషయంలో గురువు చెప్పినట్టు నడుచుకొనే రేవంత్‌రెడ్డి మాత్రం ట్రూ అప్‌ చార్జీల విషయంలో మాత్రం భిన్నంగా వ్యవహరించారు. ప్రజల నెత్తిన ఏకంగా రూ.5,420కోట్ల భారం వేశారు. ఇప్పటికే నిత్యావసరాల ధరలు, కరువుతో కష్టాలు పడుతుంటే.. ఇప్పుడు బిల్లుల మోతలతో అల్లాడిపోతున్నారు.