BJP MLA Rekha Patra Critical | బెంగాల్‌ బీజేపీ ఎమ్మెల్యే రేఖా పాత్ర పరిస్థితి విషమం.. వెంటిలేటర్ సపోర్ట్‌పై చికిత్స

22 November 2026 - 20:00
0 0
BJP MLA Rekha Patra Critical | బెంగాల్‌ బీజేపీ ఎమ్మెల్యే రేఖా పాత్ర పరిస్థితి విషమం.. వెంటిలేటర్ సపోర్ట్‌పై చికిత్స
Bengal Bjp Mla Rekha Patra

కోల్‌కతా: పశ్చిమ బెంగాల్‌లోని హింగల్‌గంజ్ నియోజకవర్గం బీజేపీ ఎమ్మెల్యే రేఖా పాత్ర ఆరోగ్య పరిస్థితి విషమంగా ఉన్నది. ప్రస్తుతం వెంటిలేటర్ సపోర్ట్‌పై ఆమెకు చికిత్స అందిస్తున్నారు. అయితే ఎమ్మెల్యే రేఖా పాత్రపై విషప్రయోగం జరిగినట్లు తెలుస్తున్నది. (BJP MLA Rekha Patra Critical) శనివారం రాత్రి 9 గంటల సమయంలో హింగల్‌గంజ్‌లోని తన నివాసంలో ఉన్నప్పుడు బీజేపీ ఎమ్మెల్యే రేఖా పాత్ర అకస్మాత్తుగా అస్వస్థతకు గురయ్యారు. ఆమె ఆరోగ్య పరిస్థితి వేగంగా క్షీణించడంతో కుటుంబ సభ్యులు స్థానిక ప్రైవేట్‌ ఆసుపత్రికి తరలించారు. అక్కడ ప్రాథమిక చికిత్స అందించినప్పటికీ ఆరోగ్య పరిస్థితిలో ఎలాంటి మార్పు కనిపించలేదు. దీంతో బసిర్‌హత్‌లోని ప్రభుత్వ సూపర్ స్పెషాలిటీ ఆసుపత్రికి తరలించారు.

కాగా, బసిర్‌హత్ ఆసుపత్రిలోని క్రిటికల్ కేర్ యూనిట్ (సీసీయూ)లో చికిత్స అందించినప్పటికీ ఎమ్మెల్యే రేఖా పాత్ర ఆరోగ్య పరిస్థితిలో మార్పు రాలేదు. దీంతో శనివారం రాత్రి వేళ ఆమెను కోల్‌కతాకు తరలించి ఒక ప్రైవేట్ ఆసుపత్రిలో చేర్పించారు. అక్కడ ఇంటెన్సివ్ థెరపీ యూనిట్ (ఐటీయూ)లో వెంటిలేటర్‌ సపోర్ట్‌పై ఆమెకు చికిత్స అందిస్తున్నారు.

మరోవైపు బీజేపీ ఎమ్మెల్యే రేఖా పాత్రపై విషప్రయోగం జరిగినట్లు తెలుస్తున్నది. విష పదార్థం ఆమె శరీరంలోకి ఎలా ప్రవేశించిందనే దానిపై ఇంకా ఎలాంటి సమాచారం తెలియలేదు. ప్రస్తుతం ఆమె ఆరోగ్య పరిస్థితి విషమంగా ఉన్నట్లు సమాచారం. బీజేపీ జిల్లా నాయకత్వంతో పాటు రేఖా పాత్ర కుటుంబ సభ్యులు కూడా ఇప్పటి వరకు ఎటువంటి బహిరంగ ప్రకటన చేయలేదు.

అయితే పలు ఇళ్లల్లో ఇంటి పనులు చేసి జీవించిన రేఖా పాత్ర, 2024లో బెంగాల్‌లోని సందేశ్‌ఖాలీ ఉద్యమంలో పాల్గొని అందరి దృష్టిని ఆకట్టుకున్నారు. నాడు అధికారంలో ఉన్న తృణమూల్ కాంగ్రెస్ (టీఎంసీ) నాయకులు మహిళలపై హింసకు పాల్పడ్డారని ఆమె ఆరోపించారు. ఆ నిరసనల్లో కీలక పాత్ర పోషించారు. ఈ ఉద్యమంతో జాతీయస్థాయి రాజకీయాల్లో కూడా ఆమె పాపులర్‌ అయ్యారు.

కాగా, 2024 లోక్‌సభ ఎన్నికల్లో బసిర్‌హత్ నియోజకవర్గం నుంచి అభ్యర్థిగా రేఖా పాత్రను బీజేపీ బరిలోకి దింపింది. ఆ ఎన్నికల్లో ఆమె ఓడిపోయారు. అయితే 2026 పశ్చిమ బెంగాల్ అసెంబ్లీ ఎన్నికల్లో హింగల్‌గంజ్ నియోజకవర్గం నుంచి బీజేపీ అభ్యర్థిగా పోటీ చేసి విజయం సాధించారు. ఆ నియోజక వర్గం ఎమ్మెల్యే అయ్యారు.

అయితే బీజేపీ ఎమ్మెల్యే రేఖా పాత్ర ఇటీవల పార్టీ జిల్లా నాయకత్వంపై అసంతృప్తిని వ్యక్తం చేశారు. తన రాజకీయ వైఖరి గురించి, బీజేపీ అంతర్గత సమస్యల గురించి ఆమె బహిరంగంగా మాట్లాడారు. ఈ తరుణంలో రేఖా పాత్రపై విషప్రయోగం జరుగడంపై పలు అనుమానాలు వ్యక్తమవుతున్నాయి.

 

Comments (0)

User