Helmets | బైక్ ట్యాక్సీపై వెళ్లేప్పుడు హెల్మెట్ వాడుతున్నారా.. ఈ జాగ్రత్తలు పాటించాల్సిందే..

Helmets | నగరాల్లో ట్రాఫిక్ రద్దీ పెరుగుతున్న నేపథ్యంలో తక్కువ దూరాలకు ప్రయాణించేందుకు బైక్ ట్యాక్సీలు ప్రజలకు సౌకర్యవంతమైన రవాణా మార్గంగా మారుతున్నాయి. మొబైల్ యాప్ల ద్వారా నిమిషాల్లోనే బైక్ ట్యాక్సీని బుక్ చేసుకునే అవకాశం ఉండడంతో చాలామంది వీటిని ఉపయోగిస్తున్నారు. అయితే ఈ ప్రయాణాల్లో చాలామంది ఒక ముఖ్యమైన విషయాన్ని పట్టించుకోవడం లేదు. అదే బైక్ ట్యాక్సీ డ్రైవర్లు ప్రయాణికులకు అందించే హెల్మెట్ల పరిశుభ్రత. వ్యక్తిగత హెల్మెట్ను ఒకరు మాత్రమే ఉపయోగిస్తారు కాబట్టి దాని శుభ్రతపై ప్రత్యేక శ్రద్ధ తీసుకుంటారు. కానీ అద్దెకు ఇచ్చే హెల్మెట్ను రోజులో చాలామంది ఉపయోగిస్తుంటారు. దీంతో వాటి పరిశుభ్రతపై ఆందోళనలు వ్యక్తమవుతున్నాయి.
బైక్ ట్యాక్సీ హెల్మెట్లలో ఏముంటాయి..?
హెల్మెట్ లోపలి భాగం నేరుగా తల, నుదురు, ముఖానికి తగులుతుంది. ఈ ప్రాంతాల్లో ఏర్పడే చెమట, చర్మంలోని నూనెలు, దుమ్ము కారణంగా హెల్మెట్ లోపలి పొర అపరిశుభ్రంగా మారుతుంది. ఒకే హెల్మెట్ను సరైన శుభ్రత పాటించకుండా పలువురు ఉపయోగిస్తే అందులో బ్యాక్టీరియా, శిలీంధ్రాలు పెరిగే అవకాశం ఉంటుంది. 2021లో మైక్రోఆర్గానిజమ్స్ జర్నల్లో ప్రచురితమైన అధ్యయనంలో నేపాల్లో మోటార్సైకిల్ ప్రయాణికులు ఉపయోగించే 130 హెల్మెట్లను పరిశీలించారు. వీటిలో మొత్తం 392 రకాల బ్యాక్టీరియా, 346 రకాల శిలీంధ్రాలను గుర్తించారు. వ్యక్తిగత హెల్మెట్లతో పోలిస్తే పలువురు ఉపయోగించే హెల్మెట్లలో సూక్ష్మజీవుల ఉనికి ఎక్కువగా ఉన్నట్లు తేలింది. తరచూ శుభ్రం చేయని హెల్మెట్లలో వీటి సంఖ్య అధికంగా ఉన్నట్లు పరిశోధకులు గుర్తించారు.
ఎలాంటి జాగ్రత్తలు పాటించాలి..
అపరిశుభ్రంగా, తడిగా ఉండే హెల్మెట్లను తరచూ ఉపయోగించడం వల్ల ఇప్పటికే తల చర్మం లేదా చర్మ సంబంధిత సమస్యలు ఉన్నవారిలో అవి మరింత తీవ్రమయ్యే అవకాశం ఉంది. ముఖ్యంగా తలపై ఇన్ఫెక్షన్లు, చర్మ సమస్యలు ఉన్నవారు, చర్మ రక్షణ పొర బలహీనంగా ఉన్నవారు మరింత జాగ్రత్తగా ఉండాలి. అయితే ఒక హెల్మెట్పై సూక్ష్మజీవులు ఉన్నంత మాత్రాన దానిని ఉపయోగించినవారికి తప్పనిసరిగా ఇన్ఫెక్షన్ వస్తుందని చెప్పలేమని నిపుణులు పేర్కొంటున్నారు. ఈ విషయంలో మరింత పరిశోధన అవసరమని చెబుతున్నారు. తరచూ బైక్ ట్యాక్సీల్లో ప్రయాణించేవారు వీలైనంత వరకు సొంత హెల్మెట్ను ఉపయోగించడం మంచిది. అలా సాధ్యం కానప్పుడు హెల్మెట్ శుభ్రంగా, పొడిగా, దుర్వాసన లేకుండా ఉందో లేదో పరిశీలించాలి. లోపలి పొర దెబ్బతిన్న హెల్మెట్లను ఉపయోగించకూడదు. హెల్మెట్ భద్రతకు ఎలాంటి ఇబ్బంది కలగకుండా సరిపోయే వ్యక్తిగత లోపలి కవర్ను ఉపయోగించవచ్చు. తడిగా లేదా మురికిగా ఉన్న హెల్మెట్కు బదులుగా మరో శుభ్రమైన హెల్మెట్ను అడగాలి.
బైక్ ట్యాక్సీ యజమానులు ఏం చేయాలి..?
హెల్మెట్లను ఉపయోగించిన ప్రతిసారీ పూర్తిగా ఆరబెట్టడం, తయారీ సంస్థ సూచనల ప్రకారం వాటిని శుభ్రం చేయడం, అవసరమైనప్పుడు క్రిమిసంహారక చర్యలు చేపట్టడం బైక్ ట్యాక్సీ నిర్వాహకుల బాధ్యత. అయితే పరిశుభ్రత పేరుతో హెల్మెట్ భద్రతను నిర్లక్ష్యం చేయకూడదు. హెల్మెట్ తలకు సరిగ్గా సరిపోయేలా ఉండడంతోపాటు పట్టీని గట్టిగా బిగించాలి. ప్రపంచ ఆరోగ్య సంస్థ ప్రకారం, సరైన హెల్మెట్ వినియోగం ప్రాణాలను కాపాడే అవకాశాన్ని ఆరు రెట్లకు పైగా పెంచడంతోపాటు మెదడుకు గాయాలయ్యే ప్రమాదాన్ని 74 శాతం వరకు తగ్గిస్తుంది. కాబట్టి బైక్ ట్యాక్సీ ప్రయాణాల్లో రోడ్డు భద్రతతోపాటు వ్యక్తిగత పరిశుభ్రతకు కూడా సమాన ప్రాధాన్యత ఇవ్వాలి. ప్రయాణికులు, బైక్ ట్యాక్సీ సేవలందించే సంస్థలు ఇద్దరూ హెల్మెట్ల శుభ్రత విషయంలో బాధ్యతగా వ్యవహరించినప్పుడే సురక్షితమైన ప్రయాణం సాధ్యమవుతుంది.
Comments (0)