Bigg Boss Telugu 10 | దీపావళి స్పెషల్ ఎపిసోడ్‌లో బిగ్ ట్విస్ట్.. ఎలిమినేషన్ నుంచి సుధీర్‌కు ఊహించని విముక్తి,కన్నీళ్లు పెట్టుకున్న వర్షిణి!

Bigg Boss Telugu 10 | బిగ్ బాస్ తెలుగు సీజన్ 10లో దీపావళి స్పెషల్ ఎపిసోడ్ ప్రేక్షకులను ఎంతగానో అలరించింది. ఆదివారం కావడంతో పాటు దీపావళి పండుగ కూడా రావడంతో బిగ్ బాస్ హౌస్‌లో సందడి నెలకొంది. ఇంటి సభ్యులు ఆటపాటలతో ఉత్సాహంగా గడిపారు. మరోవైపు హోస్ట్ నాగార్జున ఫన్ గేమ్స్ నిర్వహిస్తూ కంటెస్టెంట్లతో సరదాగా మాట్లాడారు. అయితే ఎపిసోడ్ చివర్లో మాత్రం ఎలిమినేషన్ విషయంలో ఊహించని ట్విస్ట్ ఇచ్చారు. ముఖ్యంగా సుధీర్ ఎలిమినేట్ అవుతాడని అందరూ భావించిన సమయంలో నాగార్జున ఇచ్చిన సర్‌ప్రైజ్ అందరినీ ఆశ్చర్యపరిచింది. ఇక మరోవైపు ముకేశ్ వ్యవహారంతో వర్షిణి కన్నీళ్లు పెట్టుకోవడం ఈ ఎపిసోడ్‌లో భావోద్వేగానికి గురిచేసిన అంశంగా నిలిచింది.

దీపావళి స్పెషల్ ఎపిసోడ్‌లో నాగార్జున ఇంటి సభ్యులతో ఆసక్తికరమైన ఆటలు ఆడించారు. మొదటగా మూడు సెకన్లకు మించి గ్యాప్ ఇవ్వకుండా నాగార్జున అడిగే ప్రశ్నలకు సమాధానాలు చెప్పే గేమ్ నిర్వహించారు. ఇందులో ఇంటి సభ్యులను రెండు టీమ్‌లుగా విభజించారు. ఎవరైనా సమాధానం చెప్పడంలో మూడు సెకన్లకు మించి విరామం తీసుకుంటే వారికి పాయింట్లు రాకుండా ప్రత్యర్థి టీమ్‌కు పాయింట్లు ఇచ్చే విధంగా గేమ్ సాగింది.ఆ తర్వాత హౌస్‌లో మరో ఆసక్తికరమైన గేమ్ నిర్వహించారు. కొన్ని సినిమా టైటిళ్ల తరహాలో ప్రత్యేకమైన పేర్లను బోర్డుపై ఉంచారు. ఆ టైటిల్‌కు సరిపోయే వ్యక్తి ఎవరు అనేది ఇంటి సభ్యులు గుర్తించి, వారి ఫొటోను సంబంధిత టైటిల్ పక్కన పెట్టాలి. దీంతో కంటెస్టెంట్లు ఒకరిపై మరొకరు సెటైర్లు వేసుకుంటూ సరదాగా గడిపారు.

ఈ గేమ్‌లో భాగంగా వర్షిణి.. దేబ్జానీ ఫొటోను తీసుకుని ‘ఫేస్ ఒక్కటే.. వెర్షన్స్ ఎన్నో’ అనే టైటిల్ వద్ద ఉంచింది. దేబ్జానీ పైకి ఒకలా కనిపించినా, లోపల ఎన్నో ఆలోచనలు ఉంటాయని, తాను ఆమెను దగ్గరగా గమనించానని వర్షిణి చెప్పుకొచ్చింది.మరోవైపు త్రిగుణ్‌కు శివ ‘అందరితో బాండింగ్.. లోపల ప్లానింగ్’ అనే టైటిల్ ఇచ్చారు. ఇక ముకేశ్ మాత్రం త్రిగుణ్‌కు ‘వాల్యూమ్ ఫుల్లు.. వాలిడ్ పాయింట్ నిల్లు’ అనే టైటిల్ ఇచ్చి తన అభిప్రాయాన్ని వ్యక్తం చేశాడు. ఇలా ఒక్కొక్కరు ఒక్కో కంటెస్టెంట్‌కు ఇచ్చిన టైటిల్స్‌తో హౌస్‌లో నవ్వులు పూశాయి.

ఈ ఎపిసోడ్‌లో అత్యంత భావోద్వేగమైన సన్నివేశాల్లో వర్షిణి, ముకేశ్ మధ్య జరిగిన గొడవ ఒకటి. వర్షిణికి సుధీర్ ‘ప్రెజెన్స్ ఉంటుంది.. పర్పస్ లేదు’ అనే టైటిల్ ఇచ్చాడు. ఆమె హౌస్‌లో ఎక్కడైనా కనిపిస్తుందని, కానీ కొన్ని సందర్భాల్లో ఎందుకు ఇన్వాల్వ్ అవుతుందో ఆమెకే స్పష్టత ఉండదని వ్యాఖ్యానించాడు. దీనికి వర్షిణి స్పందిస్తూ నాగార్జునతో తన బాధను పంచుకుంది. సుధీర్ ఒకరోజు నిన్ను కూడా కాటేస్తాడని గతంలో మీరు చెప్పిన మాటలు గుర్తున్నాయని, ఇప్పుడు అదే జరిగిందని పేర్కొంది. సుధీర్ తమ ఫ్యామిలీ నుంచి బయటకు వెళ్లిపోయాడని, తమను కాటేయడమే సురక్షితమని భావించి ఉంటాడంటూ సెటైర్ వేసింది.

ఇక ఎపిసోడ్ చివర్లో అసలు ఉత్కంఠ మొదలైంది. ఈ వారం ఎలిమినేషన్‌కు సంబంధించి సుధీర్, నీతూ, శివకుమార్ బాటమ్‌లో నిలిచారు. వీరిలో మొదట శివకుమార్ సేవ్ అయినట్లు నాగార్జున ప్రకటించారు. దీంతో మిగిలిన ఇద్దరిలో ఎవరు ఎలిమినేట్ అవుతారనే ఉత్కంఠ నెలకొంది. తర్వాత నీతూ, సుధీర్‌లకు లాకర్ టాస్క్ ఇచ్చారు. లాకర్ ఓపెన్ చేయాలని, ఒకవేళ అది తెరుచుకోకపోతే ఎలిమినేట్ అయినట్లేనని నాగార్జున తెలిపారు. ఈ క్రమంలో నీతూ లాకర్ ఓపెన్ చేయగా అందులో ఆమె సేఫ్ అని రాసి ఉన్న సందేశం కనిపించింది.దీంతో సుధీర్ ఎలిమినేట్ అయ్యాడని హౌస్ సభ్యులంతా భావించారు. కానీ నాగార్జున అక్కడితో ఆపకుండా నీతూ ఫొటో వెనుక మరో ఫొటో ఉందని, దాన్ని కూడా బయటకు తీయాలని చెప్పారు. నీతూ ఆ ఫొటోను బయటకు తీయగా అందులో సుధీర్ ఫొటో కనిపించింది. దానిపై కూడా ‘సేఫ్’ అని ఉండటంతో సుధీర్‌కు ఊరట లభించింది.

చివరికి నాగార్జున అసలు విషయాన్ని వెల్లడించారు. దీపావళి పండుగ సందర్భంగా ఈ వారం ఎలాంటి ఎలిమినేషన్ ఉండదని ప్రకటించారు. దీంతో అప్పటివరకు టెన్షన్‌లో ఉన్న సుధీర్ ఊపిరి పీల్చుకున్నాడు. అయితే నాగార్జున మాటలను బట్టి చూస్తే, సాధారణ పరిస్థితుల్లో ఈ వారం సుధీర్ ఎలిమినేట్ అయ్యే అవకాశం ఉండేదనే భావన కలిగింది..