సందేశం కలబోసిన బాలల చిత్రం

మాస్టర్‌ జయంత్‌ బొలిశెట్టి, ఊహా రెడ్డి, సత్యం రాజేష్‌, అశిష్‌గాంధీ, మానస రాధకృష్ణన్‌ ప్రధాన పాత్రల్లో నటిస్తున్న చిత్రం ‘జయంత్‌ అండ్‌ ది జింగో పెన్‌’. నవీన్‌ దేశబోయిన దర్శకత్వంలో దివ్య ప్రవీణ్‌ బొలిశెట్టి ఈ చిత్రాన్ని నిర్మించారు. ఈ నెల 14న ప్రేక్షకుల ముందుకురానుంది. మంగళవారం ప్రీరిలీజ్‌ ఈవెంట్‌ను నిర్వహించారు.

పిల్లల నేపథ్య చిత్రమిదని, వినోదంతో పాటు సందేశం కలబోతగా ఆకట్టుకుంటుందని దర్శకుడు నవీన్‌ దేశబోయిన తెలిపారు. ఈ కథలోని భావోద్వేగాలు హృదయాన్ని కదిలిస్తాయని, చిల్డ్రన్స్‌ డే కానుకగా విడుదల చేస్తున్నామని నిర్మాత దివ్య ప్రవీణ్‌ బొలిశెట్టి పేర్కొన్నారు. పిల్లలందరూ కలిసి చూసే మంచి చిత్రం ఇటీవల కాలంలో రాలేదని, గొప్ప సందేశంతో ఈ సినిమా తీశారని తనికెళ్ల భరణి ప్రశంసించారు. ఈ కార్యక్రమంలో చిత్ర యూనిట్‌ సభ్యులందరూ పాల్గొన్నారు.