‘శాతవాహన’లో పచ్చదనం విధ్వంసం!

• విద్యార్థులు, ఏఐఎస్‌ఎఫ్‌ నాయకుల నిరసన

కరీంనగర్‌ కమాన్‌చౌరస్తా, నవంబర్‌ 11: కరీంనగర్‌ జిల్లా కేంద్రంలోని శాతవాహన యూనివర్సిటీలో ప్రకృతి విధ్వంసం జరుగుతున్నది. 200 ఎకరాల్లో విస్తరించి ఉన్న యూనివర్సిటీలోని వృక్షాలను నరికివేస్తూ, మట్టిని తవ్వి తరలిస్తుండటంపై విద్యార్థులు, పర్యావరణ ప్రేమికుల్లో ఆందోళన వ్యక్తమవుతున్నది. ఈ వ్యవహారంపై సోమవారం కలెక్టర్‌కు విద్యార్థులు ఫిర్యాదు చేయగా, మంగళవారం అటవీశాఖ అధికారులు యూనివర్సిటీ ప్రాంగణాన్ని పరిశీలించారు.

400 వరకు చెట్లను నరికివేశారని, వాటి విలువ రూ.4లక్షలు ఉంటుందని విద్యార్థులు పేర్కొన్నారు. బుధవారం కామర్స్‌, ఆర్ట్స్‌, లా, సైన్స్‌ విభాగాలకు చెందిన విద్యార్థులు, ఏఐఎస్‌ఎఫ్‌ నాయకులు తవ్వకాలు జరిగిన ప్రాంతాలకు ర్యాలీగా వెళ్లి నిరసన తెలిపారు. చెట్ల నరికివేత, కలప విక్రయాలపై సమగ్ర విచారణ జరిపి బాధ్యులపై చర్యలు తీసుకోవాలని, మట్టి తవ్వకాలను నిలిపివేయాలని డిమాండ్‌ చేశారు. నరికిన చెట్ల స్థానంలో స్థానిక జాతుల మొకలు నాటి, వన్యప్రాణుల ఆవాసాలను పునరుద్ధరించాలని కోరారు.