ఎమ్మెల్సీ ఓటర్ల నమోదు సరళిపరిశీలనకు అధికారులు

హైదరాబాద్‌, నవంబర్‌ 11 (నమస్తే తెలంగాణ): త్వరలో తెలంగాణలో జరుగనున్న పట్టభద్రుల ఎమ్మెల్సీ, ఏపీలో ఉపాధ్యాయ ఎమ్మెల్సీ ఎన్నికల కోసం కొత్త ఓటర్ల నమోదును పరిశీలించేందుకు కేంద్ర ఎన్నికల సంఘం పరిశీలకులను నియమించింది. తెలంగాణలో మహబూబ్‌నగర్‌-రంగారెడ్డి-హైదరాబాద్‌ పట్టభద్రుల నియోజకవర్గం పరిధిలోని రంగారెడ్డి, హైదరాబాద్‌, మేడ్చల్‌-మల్కాజిగిరిలో ఓటర్ల నమోదు సరళిని పరిశీలించేందుకు తెలంగాణ మున్సిపల్‌శాఖ సెక్రటరీ టీకే శ్రీదేవి, వికారాబాద్‌-మహబూబ్‌నగర్‌, నారాయణపేట జిల్లాలకు ప్లానింగ్‌శాఖ కార్యదర్శి గౌరవ్‌ ఉప్పల్‌, వనపర్తి-జోగుళాంబ గద్వాల, నాగర్‌కర్నూల్‌ జిల్లాలకు రోడ్లు-భవనాలశాఖ కార్యదర్శి ఇలంబర్తిని నియమించారు.

వరంగల్‌-నల్లగొండ-ఖమ్మం పట్టభద్రుల నియోజకవర్గాల పరిధిలోని జనగామ, సిద్దిపేట, యాదాద్రి భువనగిరి, సూర్యాపేట, నల్లగొండ జిల్లాలకు సెర్ప్‌ సీఈవో డీ దివ్య, మహబూబాబాద్‌, ములుగు, భద్రాద్రి కొత్తగూడెం, ఖమ్మం జిల్లాలకు దాసరి హరిచందన, వరంగల్‌, హనుమకొండ, జయశంకర్‌భూపాలపల్లి జిల్లాలకు బీ విజయేంద్రను పరిశీలకులుగా నియమించారు. ఇక ఏపీలో తూర్పుగోదావరి, పశ్చిమగోదావరి పట్టభద్రుల నియోజకవర్గంలో ఏ సూర్యకుమారి, ఎంబీ శేషగిరిబాబును, కృష్ణా-గుంటూరు ఉపాధ్యాయ నియోజకవర్గానికి ముత్యాలరాజు, షాన్‌మోహన్‌ను నియమించారు. వీరు ఓటర్ల నమోదుకు వచ్చిన దరఖాస్తులను పరిశీలించి ఓటర్ల జాబితా రూపకల్పనపై దృష్టి సారించనున్నారు.