వీసీ జానయ్యపై విచారణకు ఆదేశం

• గవర్నర్‌ ఆదేశాలతో కమిటీ ఏర్పాటు చేసిన సర్కార్‌
• ఐదుగురితో టీం.. 15 రోజుల్లో నివేదికకు ఆదేశాలు
• మహిళా కమిషన్‌ ఎదుటకు జానయ్య, బాధితురాలు

హైదరాబాద్‌, నవంబర్‌ 12 (నమస్తేతెలంగాణ) : ప్రొఫెసర్‌ జయశంకర్‌ తెలంగాణ వ్యవసాయ విశ్వవిద్యాలయం వైస్‌ చాన్స్‌లర్‌ ప్రొఫెసర్‌ అల్దాస్‌ జానయ్యపై వచ్చిన లైంగిక వేధింపుల ఆరోపణలపై సమగ్ర విచారణకు రాష్ట్ర గవర్నర్‌ శివప్రతాప్‌ శుక్లా గురువారం ఆదేశాలు జారీచేశారు. ఈ మేరకు ఇదేరోజు రాష్ట్ర ప్రభుత్వం నలుగురు సభ్యులతో కూడిన విచారణ కమిటీని ఏర్పాటు చేసింది. వీసీపై వచ్చిన ఆరోపణలపై పూర్తిస్థాయి విచారణ జరిపి 15రోజుల్లోగా సమగ్ర నివేదిక సమర్పించాలని ప్రభుత్వం కమిటీని ఆదేశించింది. బాధితురాలైన మహిళా ప్రొఫెసర్‌కు తగిన భద్రత కల్పించేందుకు అవసరమైన చర్యలు తీసుకోవాలని అధికారులకు ఆదేశాలు జారీఅయ్యాయి.

విచారణ కమిటీలో రాష్ట్ర వేర్‌హౌసింగ్‌ కార్పొరేషన్‌ ఎండీ కే లక్ష్మి నేతృత్వంలో ఐఏఎస్‌ అధికారులు యాస్మిన్‌ బాషా, గోపి, రాహుల్‌రాజ్‌, ‘ప్రజ్వల’ స్వచ్ఛంద సంస్థ ప్రతినిధి సునీతాకృష్ణన్‌ సభ్యులుగా ఉంటారు. ఇదిలా ఉండగా, గురువారమే తెలంగాణ మహిళా కమిషన్‌ ఎదుట వీసీ జానయ్య, ఫిర్యాదు చేసిన మహిళా అసిస్టెంట్‌ ప్రొఫెసర్‌ విచారణకు హాజరయ్యారు. తనను వీసీ అల్దాస్‌ జానయ్య వేధించారని, ఫిర్యాదు వెనకి తీసుకోవాలని బెదిరింపులు వస్తున్నాయని యూనివర్సిటీకి చెందిన మహిళా అసిస్టెంట్‌ ప్రొఫెసర్‌ రాష్ట్ర మహిళా కమిషన్‌కు, డీజీపీకి ఫిర్యాదులు చేశారు. ప్రాథమిక ఆధారాలు ఉన్నాయని గుర్తించిన తెలంగాణ రాష్ట్ర మహిళా కమిషన్‌.. విచారణకు హాజరుకావాలని వీసీ జానయ్యకు ఈనెల 7న నోటీసులు జారీచేసింది. వీసీ జానయ్య ఈ ఆరోపణలను పూర్తిగా ఖండిస్తూ నవంబర్‌ 9న డీజీపీకి లేఖ రాశారు. పాలనాపరమైన సంసరణల వల్లే తనపై తప్పుడు ఆరోపణలు చేస్తున్నారని ఆయన పేర్కొన్నారు.

నిరసనల వెల్లువ

మహిళా అసిస్టెంట్‌ ప్రొఫెసర్‌పై వీసీ అల్దాస్‌ జానయ్య లైంగిక వేధింపుల వ్యవహారంపై యూనివర్సిటీ ప్రాంగణంలో విద్యార్థులు, అధ్యాపకులు నిరసనలు వారం రోజులుగా కొనసాగిస్తున్నారు. బాధితురాలికి మద్దతుగా బీఆర్‌ఎస్‌ మహిళా ఎమ్మెల్యేలతోపాటు వివిధ వర్గాలకు చెందిన నేతలు సంఘీభావం తెలిపారు. లైంగిక వేధింపుల ఆరోపణలు ఎదుర్కొంటున్న వీసీపై ఎఫ్‌ఐఆర్‌ నమోదు చేయాలని పలువురు పోలీస్‌ స్టేషన్‌ వద్దే ఆందోళన చేపట్టారు. ఫిర్యాదు చేసి రోజులు గడుస్తున్నా పోలీసులు ఎఫ్‌ఐఆర్‌ నమోదు చేయలేదని ఆరోపిస్తూ విద్యార్థి సంఘాల నేతలు రాజేంద్రనగర్‌ పోలీస్‌ స్టేషన్‌ ఎదుట నిరసన తెలిపారు. బాధితురాలికి న్యాయం చేయాలని డిమాండ్‌ చేశారు. మరోవైపు కొందరు మహిళా ఉద్యోగులు వీసీకి మద్దతుగా నిలిచారు.

మహిళా కమిషన్‌ ఎదుట వీసీ హాజరు

ప్రొఫెసర్‌ జయశంకర్‌ తెలంగాణ అగ్రికల్చర్‌ యూనివర్సిటీ వీసీ అల్దాస్‌ జానయ్య గురువారం తెలంగాణ రాష్ట్ర మహిళా కమిషన్‌ ఎదుట విచారణకు హాజరయ్యారు. యూనివర్సిటీకి చెందిన ఒక మహిళా అసిస్టెంట్‌ ప్రొఫెసర్‌ చేసిన లైంగిక వేధింపుల ఫిర్యాదు నేపథ్యంలో కమిషన్‌ జారీచేసిన సమన్ల మేరకు ఆయన హాజరై తన వివరణ ఇచ్చారు. మధ్యాహ్నం 12:30 గంటలకు తన తరఫున న్యాయవాదితో కమిషన్‌ కార్యాలయంలో వ్యక్తిగతంగా హాజరయ్యారు. నిజామాబాద్‌కు బదిలీ చేశారనే అకసుతోనే తనపై ఇలాంటి వ్యాఖ్యలు చేస్తున్నారని వివరించారు.

తప్పుడు ఆరోపణలు చేస్తే చర్యలే : మహిళా కమిషన్‌ చైర్‌పర్సన్‌ శారద

వీసీ అల్దాస్‌ జానయ్యపై వచ్చిన లైంగిక వేధింపుల ఆరోపణల విచారణకు సంబంధించి, మహిళా కమిషన్‌ చైర్‌పర్సన్‌ నేరెళ్ల శారద కీలక వ్యాఖ్యలు చేశారు. ఈ ఘటనకు సంబంధించి ఇరువర్గాల నుంచి వివరణ తీసుకుంటున్నట్టు ఆమె చెప్పారు. వ్యవసాయ వర్సిటీ వీసీ జానయ్యపై చేసిన ఆరోపణలకు సంబంధించిన వాస్తవ ఆధారాలను సమర్పించాలని మహిళా ప్రొఫెసర్‌ అయిన బాధితురాలికి సూచించినట్టు తెలిపారు. తప్పుడు ఆరోపణలు చేయడం ద్వారా గౌరవప్రదమైన హోదాలో ఉన్న వ్యక్తుల పరువు, ప్రతిష్ఠలను దెబ్బతీసే ఆరోపణలు చేస్తే వాటిపై నిజానిజాలు తెలుసుకొని, తప్పుడు ఆరోపణలు చేసిన మహిళలపై కూడా కమిషన్‌ చర్యలు తీసుకుంటుందని స్పష్టంచేశారు.