వారం క్రితమే ఉద్యోగం.. అంతలోనే విషాదం.. అమెరికాలో నల్గొండ యువకుడు దుర్మరణం

21 November 2026 - 12:00
0 0
వారం క్రితమే ఉద్యోగం.. అంతలోనే విషాదం.. అమెరికాలో నల్గొండ యువకుడు దుర్మరణం
Saiteja Indian Student

వారం రోజుల క్రితమే ఉద్యోగం సాధించి.. అమెరికాలో కొత్త జీవితాన్ని ప్రారంభించిన తెలంగాణ యువకుడు అంతలోనే మృత్యువాత పడ్డాడు. తల్లిదండ్రుల కష్టాలకు ఇక తెరపడుతుందని, కొడుకు భవిష్యత్తు బాగుంటుందని ఆశించిన కుటుంబానికి రోడ్డు ప్రమాదం తీరని విషాదాన్ని మిగిల్చింది. న్యూయార్క్‌లో జరిగిన ఘోర ప్రమాదంలో నల్గొండ జిల్లా మునుగోడుకు చెందిన ఈరమళ్ల సాయితేజ (25) ప్రాణాలు కోల్పోయాడు.

న్యూయార్క్‌లో నవంబర్‌ 19 రాత్రి సాయితేజ కారులో ప్రయాణిస్తుండగా రోడ్డుపైకి జింక అడ్డుగా వచ్చింది. దీంతో దానిని ఢీకొన్న కారు నిలిచిపోయింది. అదే సమయంలో వెనుక నుంచి వేగంగా వచ్చిన సరకు రవాణా వ్యాన్‌ నిలిచిపోయిన కారును బలంగా ఢీకొట్టింది. ఈ ప్రమాదంలో సాయితేజ అక్కడికక్కడే మృతిచెందాడు. కారులో ఉన్న మరో వ్యక్తికి తీవ్ర గాయాలయ్యాయి. అతడిని న్యూయార్క్‌ పోలీసులు హెలికాప్టర్‌లో ఆస్పత్రికి తరలించారు. నిలిచిపోయిన వ్యాన్‌ను మరో రెండు వాహనాలు ఢీకొనడంతో వరుస ప్రమాదాలు చోటుచేసుకున్నాయి. ఈ ఘటనలో మరో ఇద్దరు స్వల్పంగా గాయపడగా, ఆస్పత్రిలో చికిత్స పొందుతున్న వ్యక్తి పరిస్థితి విషమంగా ఉన్నట్లు సమాచారం.

మునుగోడుకు చెందిన ఈరమళ్ల ప్రసాద్‌, శ్రీకన్య దంపతుల పెద్ద కుమారుడు సాయితేజ. ఉన్నత చదువుల కోసం అమెరికా వెళ్లిన ఆయన చదువు పూర్తిచేసుకుని ఇటీవల ఉద్యోగం సాధించాడు. వారం రోజుల క్రితమే ఉద్యోగంలో చేరినట్లు కుటుంబ సభ్యులు తెలిపారు. కుమారుడి భవిష్యత్తుపై ఎన్నో ఆశలు పెట్టుకున్న తల్లిదండ్రులకు ప్రమాద వార్త తీవ్ర శోకాన్ని మిగిల్చింది. సాయితేజ మృతితో మునుగోడులో విషాదం నెలకొంది. సాయితేజ భౌతికకాయం ఆదివారం రాత్రికి స్వగ్రామానికి చేరుకునే అవకాశం ఉందని సమాచారం.

Comments (0)

User