‘వలంటీర్‌’ వంచన!.. నిరుద్యోగులకు మరో ధోకా

• కొలువుల నుంచి డైవర్షన్‌కు సర్కార్‌ ఎత్తుగడ
• ‘పట్టభద్రుల’ ఎన్నికల వేళ వలంటీర్‌ ప్రతిపాదన
• ప్రభుత్వ ఉద్యోగాలకు బదులు గౌరవ వేతన పని
• ఏపీ అనుభవం తెలిసీ.. అదే బాటలో అడుగులు
• ‘2 లక్షల ఉద్యోగాల’కు తప్పని ఎదురుచూపులు
• నిరుద్యోగుల ఆగ్రహాన్ని చల్లార్చేందుకు కొత్త ప్లాన్‌
• లక్ష మంది వలంటీర్ల నియామకంపై ప్రచారం
• వేతనం, విధుల కాలపరిమితిపై స్పష్టత కరువు
• ఏపీ వలంటీర్లకు దక్కని శాశ్వత ఉద్యోగ హోదా

హైదరాబాద్‌, నవంబర్‌ 9 (నమస్తే తెలంగాణ) : ప్రభుత్వ ఉద్యోగాల భర్తీపై స్పష్టమైన కార్యాచరణ ప్రకటించాల్సిన సమయంలో వలంటీర్ల నియామక ప్రతిపాదనను కాంగ్రెస్‌ ప్రభుత్వం తెరపైకి తెస్తున్నది. మూడేండ్లుగా నోటిఫికేషన్ల కోసం ఎదురుచూస్తున్న దాదాపు 30 లక్షల మంది నిరుద్యోగులను నెలకు రూ.6 వేల నుంచి రూ.10 వేల వేతనంతో కూడిన ఉపాధి జీవులుగా మార్చడానికి వేగంగా పావులు కదుపుతున్నట్టు తెలిసింది. రాబోయే ఎమ్మెల్సీ ఎన్నికల్లో కాంగ్రెస్‌ పార్టీకి నిరుద్యోగుల నుంచి తీవ్రమైన ఎదురుదెబ్బ తప్పదనే భయం నెలకొన్న నేపథ్యంలో ప్రభుత్వం పిల్లిమొగ్గలు వేస్తున్నట్టు సమాచారం. పట్టభద్రుల్లో వ్యక్తమవుతున్న తీవ్ర అసంతృప్తిని దారిమళ్లించేందుకు లక్ష మంది వలంటీర్లను నియమించాలనే ఆలోచనలో ఉన్నట్టు విశ్వసనీయంగా తెలిసింది.

ఎన్నికల వేళ మొదటి ఏడాదే రెండు లక్షల ఉద్యోగాలు భర్తీ చేస్తామని, నిరుద్యోగ క్యాలెండర్‌ ప్రకారమే నియామకాలు పూర్తి చేస్తామని పదేపదే చెప్పిన రేవంత్‌రెడ్డి, అధికారంలోకి వచ్చి మూడేండ్లవుతున్నా ఎలాంటి కార్యాచరణ చూపలేకపోయారు. ఉద్యోగ నోటిఫికేషన్ల కోసం డిమాండ్‌ చేస్తున్న యువతపై నిర్బంధాన్ని ప్రయోగిస్తున్న ప్రభుత్వం, తాజాగా ఎమ్మెల్సీ ఎన్నికలు ముంచుకొస్తుండటంతో మరో నాటకానికి తెరతీసింది. అధికారంలోకి వస్తే రెండేండ్లలో రెండు లక్షల ప్రభుత్వ ఉద్యోగాలు భర్తీ చేస్తామని కాంగ్రె స్‌ హామీ ఇచ్చింది. అధికారంలోకి వచ్చి మూడేండ్లు కావస్తున్నా నియామకాలు లేవని నిరుద్యోగులు అసంతృప్తితో ఉన్నారు. పైగా ఉద్యోగాలు అడిగిన నిరుద్యోగుల మీద ఇప్పటి వరకు ఏడు సార్లు పోలీసుల లాఠీలతో బలప్రయోగం చేస్తూ వారి నోరు మూయిస్తూ వస్తున్నది. కానీ పట్టాభద్రుల ఎమ్మెల్సీ ఎన్నికల నేపథ్యంలో నిరుద్యోగులను ప్రసన్నం చేసుకోవాల్సిన గత్యంతరం ఏర్పడింది.

ఈ ఏడాది మార్చిలో హైదరాబాద్‌ -రంగారెడ్డి-మహబూబ్‌నగర్‌, వరంగల్‌-ఖమ్మం-నల్లగొండ నియోజకవర్గాల్లో ఎన్నికలు రానున్నాయి. ఈ రెండు స్థానాల్లో కాంగ్రెస్‌ అభ్యర్థుల గెలుపు కోసం ముఖ్యమంత్రి రేవంత్‌రెడ్డి ఇప్పటికే అభ్యర్థులను ప్రకటించారు. రాజకీయ సమీకరణాలు మొదలుపెట్టారు. మిత్రపక్షాల మద్దతు కోరుతున్నారు. కానీ రాబోయే ఎమ్మెల్సీ ఎన్నికల్లో కాంగ్రెస్‌కు నిరుద్యోగుల నుంచి తీవ్ర ఎదురుదెబ్బ తప్పదనే భయంతో ప్రభుత్వం తాతాలిక తాయిలాలను ప్రకటిస్తున్నది. గ్రూప్‌ సర్వీసులు, డీఎస్సీ ద్వారా రాజ్యాంగబద్ధమైన శాశ్వత ప్రభుత్వ ఉద్యోగాలు కల్పించాల్సింది పోయి, నెలకు కేవలం పదివేల రూపాయల నామమాత్రపు భత్యంతో లక్ష మంది యువతను వలంటీర్ల ఎత్తుగడతో దారిమళ్లించాలనే ఆలోచన చేస్తున్నట్టు తెలిసింది.

వలంటీర్‌ అంటే ప్రభుత్వ ఉద్యోగా?

వలంటీర్‌ వ్యవస్థలో ఉండే తీవ్రమైన చట్టబద్ధ లోపాలను ప్రభుత్వం పూర్తిగా విస్మరిస్తున్నదని సచివాలయ వర్గాల్లో చర్చ జరుగుతున్నది. ప్రభుత్వంలో అధికారికంగా పనిచేసే సిబ్బందికి రాజ్యాంగబద్ధమైన నియమనిబంధనలు, సర్వీస్‌ రూల్స్‌, మెరిట్‌ ఆధారిత పరీక్షలు ఉంటాయి. కానీ వలంటీర్ల ఎంపికలో ఎలాంటి రిజర్వేషన్‌ రోస్టర్‌ నిబంధనలు పాటించకపోవడం, పబ్లిక్‌ సర్వీస్‌ కమిషన్లతో సంబంధం లేకుండా పార్టీ నేతల సిఫార్సులతో నియామకాలు చేపట్టే ప్రయత్నం చేస్తున్నట్టు తెలిసింది. అధికార కాంగ్రెస్‌ పార్టీ కోసం పనిచేసిన శ్రేణులు, అనుచరులకు ప్రజాధనం నుంచి జీతాలు ఇప్పించేందుకే సీఎం రేవంత్‌రెడ్డి ఈ సరికొత్త పన్నాగం పన్నుతున్నట్టు పరిపాలనా వర్గాల్లో విసృ్తత చర్చ నడుస్తున్నది.

వారి ద్వారా నిరుద్యోగుల గొంతు నొక్కడంతో పాటు, ప్రభుత్వ పథకాలను ప్రజల్లోకి తీసుకెళ్లాలని నిర్ణయించినట్టు తెలిసింది. ఆంధ్రప్రదేశ్‌లో వలంటీర్ల నియామకాల విషయంలో తలెత్తిన చట్టపరమైన సమస్యలు, కోర్టు వివాదాలు ఇంకా కండ్లముందే ఉన్నాయి. చట్టబద్ధత లేని నియామకాలు చివరికి న్యాయస్థానాల పరిధిలో నిలబడలేక, వ్యవస్థ మారగానే యువత రోడ్డున పడే దుస్థితి ఏర్పడింది. నిరుద్యోగులకు చట్టబద్ధమైన శాశ్వత ఉద్యోగాలు ఇచ్చే బాధ్యత నుంచి తప్పుకోవడానికే ప్రభుత్వం ఈ అడ్డదారి వెతుకుంటున్నట్టు విమర్శలు వస్తున్నాయి.

ఏపీ నుంచి నేర్చుకున్నదేంది?

గతంలో ఆంధ్రప్రదేశ్‌లో గ్రామ, వార్డు వలంటీర్ల వ్యవస్థను పెద్ద ఎత్తున అమలు చేశారు. సుమారు 2.5 లక్షల మందిని నియమించి ప్రభుత్వ పథకాల అమల్లో భాగస్వాములను చేశారు. నెలకు రూ.5 వేల గౌరవ వేతనంతో ప్రారంభమైన ఈ వ్యవస్థలో కాలక్రమేణా వేతనాన్ని పెంచారు. అయితే వలంటీర్లకు ప్రభుత్వ ఉద్యోగుల హోదా లభించలేదు. నియామకాల చట్టబద్ధతపై హైకోర్టులో పిటిషన్లు దాఖలయ్యాయి. 2019లో హైకోర్టు ఇచ్చిన తీర్పులో వలంటీర్‌ పోస్టులు శాశ్వత కేడర్‌ పోస్టులు కావని, గౌరవ వేతన ప్రాతిపదికన పనిచేసే వ్యవస్థగా పరిగణించింది. 2024లో ప్రభుత్వం మారిన తర్వాత ఈ వ్యవస్థ కొనసాగింపుపై అనిశ్చితి ఏర్పడింది. నియామకాలు పునరుద్ధరించకపోవడంతో వేలాది మంది భవిష్యత్తు ప్రశ్నార్థకంగా మారింది. ఒక ప్రభుత్వం తీసుకున్న నిర్ణయంతో ఏర్పడిన వ్యవస్థ మరో ప్రభుత్వం వచ్చినప్పుడు కొనసాగుతుందనే భరోసా లేకుండా పోయింది. ఇదే వ్యవస్థను ఇప్పుడు రేవంత్‌ సర్కార్‌ నెత్తికెత్తుకున్నది.