సర్కార్‌కు భూములే దిక్కా.. ఆస్తులు అమ్మితేనే ప్రభుత్వానికి ఆదాయమా?

• 34 నెలల్లోనే 30 వేల కోట్లకుపైగా సమీకరణ
• ఇప్పుడు ప్రైవేట్‌ భూముల అమ్మకంపై దృష్టి 
• హెచ్‌ఎండీఏ, టీజీఐఐసీ భూములపై కసరత్తు 
• ముందుగా రోడ్లు, మౌలిక వసతులు కల్పించి అధిక ధరలకు విక్రయించేందుకు ప్రణాళికలు 

హైదరాబాద్‌, నవంబర్‌ 9 (నమస్తే తెలంగాణ) : ఆదాయం పెంచుకోవడానికి సర్కార్‌ భూములపై కన్నేసింది. భూముల అమ్మకాలనే ప్రధాన ఆదాయ వనరుగా మలుచుకుంటున్నది. ప్రభుత్వ శాఖల ఆధీనంలోని భూములు, ఆస్తులను అమ్మడం, తనఖా పెట్టడం ద్వారా ఇప్పటికే భారీగా నిధులు సమీకరించిన ప్రభుత్వం.. ఇప్పుడు మరో అడుగు ముందుకేసి ప్రైవేట్‌ భూములను సైతం సమీకరించి అభివృద్ధి పేరుతో వాటి విలువ పెంచి ఆదాయం పొందే వ్యూహానికి సిద్ధమవుతున్నది. హైదరాబాద్‌ శివారు ప్రాంతాల్లో వేగంగా విస్తరిస్తున్న పట్టణీకరణను ఆదాయ అవకాశంగా మలుచుకోవాలని భావిస్తున్నది. పన్నేతర ఆదాయాన్ని పెంచడం, ప్రభుత్వ శాఖల్లో వృథా ఖర్చులు తగ్గించడం, పన్నుల వసూళ్లను మెరుగుపరచడం, పరిశ్రమలు, పెట్టుబడులు, ఉపాధి ద్వారా రాష్ట్ర ఆదాయం పెంచుకోవడంపై దృష్టిపెట్టకుండా భూముల ద్వారా ఆమ్దానీ పెంచుకోవాలనే నిర్ణయంపై అభ్యంతరాలు వ్యక్తమవుతున్నాయి. ప్రభుత్వ భూముల విక్రయాలు, తనఖాల ద్వారా నిధులు సమీకరించడం తాతాలికంగా ఖజానాకు ఊరటనిచ్చినా.. దీర్ఘకాలంలో రాష్ట్రానికి మిగిలేది ఏందనే సందేహాలు ఆర్థిక నిపుణుల్లో వ్యక్తమవుతున్నాయి. ఆర్థిక ఒత్తిళ్లు, సంక్షేమ పథకాలు, అభివృద్ధి కార్యక్రమాలకు నిధుల అవసరాలు పెరుగుతున్న తరుణంలో ఆదాయాన్ని పెంచుకునే మార్గంగా ప్రభుత్వ ఆస్తుల విక్రయాలను ఎంచుకోవడం ఎంతవరకు సమర్థనీయం? ప్రభుత్వ భూములు ఒకసారి చేతులు మారితే తిరిగి వాటిని సమకూర్చుకోవడం సాధ్యమేనా? అనే ప్రశ్నలు తలెత్తుతున్నాయి.

ల్యాండ్‌ బ్యాంక్‌ పేరిట ప్రయోగం

ఇటీవల సచివాలయంలో ఆదాయ సమీకరణపై జరిగిన మంత్రివర్గ ఉపసంఘం సమావేశంలో ప్రభుత్వ భూములను ఆదాయ వనరులుగా మార్చుకునే అంశంపై విస్తృతంగా చర్చించినట్టు తెలిసింది. ప్రభుత్వ శాఖల ఆధీనంలో ఉన్న భూములు, వినియోగంలో లేని ఆస్తులు, పారిశ్రామిక ప్రాంతాల్లోని భూములను గుర్తించి వాటి ద్వారా ఆదాయం పొందాలని ప్రభుత్వం భావిస్తున్నది. భూముల బ్యాంకు (ల్యాండ్‌ బ్యాంక్‌) ఏర్పాటు చేయడం, భవిష్యత్తులో చేపట్టబోయే మౌలిక సదుపాయాల ప్రాజెక్టులకు ముందుగానే భూములను గుర్తించడం, వాటి చుట్టూ రహదారులు, ఇతర సదుపాయాలు కల్పించడం, అనంతరం అభివృద్ధి చేసిన భూముల్లో కొంత భాగాన్ని వేలం వేయడం వంటి ప్రతిపాదనలు తెరపైకి వచ్చాయి.

ప్రభుత్వ శాఖలన్నీ తమ పరిధిలోని వినియోగంలో లేని ఆస్తులు, వేలానికి సిద్ధంగా ఉన్న లేఅవుట్లు, మెరుగైన రవాణా అనుసంధానం కలిగిన భూములను గుర్తించాలని ఆదేశించినట్టు సమాచారం. ఆయా భూముల చుట్టూ రహదారులు, ప్రాథమిక మౌలిక సదుపాయాలు కల్పించిన తర్వాత వేలానికి పెట్టాలని భావిస్తున్నారు. కాంగ్రెస్‌ అధికారంలోకి వచ్చిన తర్వాత 34 నెలల్లో ప్రభుత్వ భూముల విక్రయం, తనఖాల ద్వారా రూ.30 వేల కోట్లకుపైగా సమీకరించింది. హైదరాబాద్‌ శివారు ప్రాంతాల్లోని మేడ్చల్‌-మలాజిగిరి, రంగారెడ్డి జిల్లాల్లో భూముల సమీకరణకు ప్రభు త్వం ప్రాధాన్యత ఇస్తున్నది. ఈ భూముల సమీకరణ ద్వారా ప్రభుత్వానికి భవిష్యత్తు ప్రాజెక్టుల కోసం భూమి అందుబాటులోకి వస్తుందని, అభివృద్ధి అనంతరం భూముల విలువ పెరుగడంతో ఆదాయం సమకూరుతుందని భావిస్తున్నది.  భూముల సమీకరణలో రైతుల ప్రయోజనాలు ఎలా పరిరక్షిస్తారు? భూములు కోల్పోయే వారికి పరిహారమే ఇస్తారా? అభివృద్ధి అనంతరం పెరిగే విలువలోనూ వాటా కల్పిస్తారా? భూముల సమీకరణకు అంగీకరించని రైతుల పరిస్థితి ఏంది? అనే అంశాలకు ముందుగానే సమాధానం చెప్పాల్సి ఉన్నది.

హెచ్‌ఎండీఏ భూములపై భారీ వ్యూహం

హైదరాబాద్‌ పరిసర ప్రాంతాల్లో హెచ్‌ఎండీఏ ఆధీనంలో సుమారు 5,000 ఎకరాల విలువైన భూములు ఉన్నట్టు అంచనా. వీటిలో విక్రయానికి అనువైన భూములను గుర్తించి అభివృద్ధి అనంతరం వేలం వేయాలని ప్రభుత్వం చూస్తున్నది. ఇప్పటికే హైదరాబాద్‌ చుట్టుపకల భూముల ధరలు భారీగా పెరిగిన నేపథ్యంలో హెచ్‌ఎండీఏ భూముల వేలం ద్వారా గణనీయమైన ఆదాయం సమకూరే అవకాశమున్నది. అయితే ఈ భూముల్లో ఎంత భాగం ప్రజా అవసరాలకు కేటాయించాలి? ఎంత భాగం వాణిజ్య ప్రయోజనాల కోసం వినియోగించాలి? ఎంత భవిష్యత్తు తరాల కోసం పరిరక్షించాలి? అనే అంశాలపై సమగ్ర విధానం అవసరం. ప్రభుత్వ భూములను అత్యధిక ధరకు విక్రయించడమే లక్ష్యంగా పెట్టుకుంటే పట్టణాభివృద్ధిలో ప్రజా ప్రయోజనాలు వెనుకబడే ప్రమాదం ఉన్నది. ఇప్పటికే హైదరాబాద్‌లో పారులు, బహిరంగ ప్రదేశాలు, ప్రభుత్వ దవాఖానలు, పాఠశాలలు, ప్రజా రవాణా సదుపాయాలకు భూమి కొరత వేధిస్తున్నది. ఇలాంటి పరిస్థితుల్లో అందుబాటులో ఉన్న ప్రభుత్వ భూములను అడ్డగోలుగా విక్రయిస్తే భవిష్యత్తులో ప్రభుత్వమే ప్రజా అవసరాల కోసం ప్రైవేట్‌ వ్యక్తుల నుంచి అధిక ధరలకు భూములు కొనుగోలు చేయాల్సిన దుస్థితి వచ్చే ప్రమాదం లేకపోలేదు.

టీజీఐఐసీ పరిధిలో లక్ష ఎకరాలకుపై కన్ను

తెలంగాణ పారిశ్రామిక మౌలిక సదుపాయాల సంస్థ (టీజీఐఐసీ) ఆధీనంలో క్రియాశీల ఆస్తుల నిర్వహణ, నగదీకరణ ప్రక్రియలో లక్ష ఎకరాలకుపైగా భూములున్నాయి.  హైదరాబాద్‌, రంగారెడ్డి, మేడ్చల్‌ జిల్లాల్లోని అధిక విలువ కలిగిన పారిశ్రామిక కారిడార్లలో ఈ భూములు కేంద్రీకృతమై ఉన్నాయి. ఈ భూముల వినియోగాన్ని సమీక్షించి ఆదాయం సమకూర్చే మార్గాలను అన్వేషించాలని ప్రభుత్వం భావిస్తున్నది. పారిశ్రామిక అభివృద్ధి కోసం కేటాయించిన భూముల్లో వినియోగంలో లేని వాటిని గుర్తించడం, ఆస్తుల నిర్వహణను మెరుగుపరచడం, అవసరమైన చోట వేలం లేదా ఇతర నగదీకరణ పద్ధతులను అమలుచేయాలని చూస్తున్నది. బాలానగర్‌, హఫీజ్‌పేట్‌ వంటి పాత పారిశ్రామిక ప్రాంతాల్లోని భూముల క్రమబద్ధీకరణ, పెండింగ్‌ అనుమతుల పరిషారాన్ని వేగవంతం చేయాలని చూస్తున్నది. బీ-క్యాటగిరీ, సూక్ష్మ పారిశ్రామిక యూనిట్లకు సంబంధించిన ప్రతిపాదనలను పరిశీలించి ఆదాయం పొందే అవకాశాలను పరిశీలిస్తున్నది.

ప్రజా ఆస్తులపై ప్రజలకే హకు.. లెకలు చెప్పాల్సిందే!

ప్రభుత్వ భూములు పాలకుల వ్యక్తిగత ఆస్తులు కావు. అవి ప్రజల ఆస్తులు. వాటి విక్రయం ద్వారా వచ్చే ఆదాయం కూడా ప్రజల సంక్షేమానికే వినియోగించాలి. అందుకే ప్రభుత్వం చేపట్టనున్న భూముల అమ్మకాలకు సంబంధించిన వివరాలు పబ్లిక్‌ డొమైన్‌లో పెట్టాల్సి ఉన్నది. రాష్ట్రవ్యాప్తంగా ప్రభుత్వశాఖల ఆధీనంలో ఉన్న మొత్తం భూమి ఎంత? ఇప్పటివరకు విక్రయించిన, తనఖా పెట్టిన భూముల వివరాలేమిటి? 34 నెలల్లో సమీకరించిన రూ.30 వేల కోట్లకుపైగా నిధుల్లో ఎంత విక్రయాల ద్వారా, ఎంత తనఖాల ద్వారా వచ్చింది? ఈ నిధులను ఏయే పథకాలు, ప్రాజెక్టులు, అప్పుల చెల్లింపులకు వినియోగించారు? హెచ్‌ఎండీఏ, టీజీఐఐసీ భూముల్లో ఎంత భాగాన్ని ప్రజా అవసరాల కోసం పరిరక్షించారు. ప్రైవేట్‌ భూముల సమీకరణలో రైతులకు అభివృద్ధి అనంతర విలువలో వాటా కల్పిస్తారా? భూముల వేలానికి స్వతంత్ర విలువ నిర్ధారణ, బహిరంగ పోటీ, సామాజిక ఆడిట్‌ ఉంటాయా? వంటి ప్రశ్నలకు సర్కార్‌ సమాధానాలు ఇవ్వాల్సి ఉన్నది. రాష్ర్టానికి ఆదాయం అవసరమే.. కానీ ఆ ఆదాయం కోసం రాష్ట్ర భవిష్యత్తునే అమ్మకానికి పెట్టకూడదు.