రెతులకు నోటీసులు

• రుణాలు చెల్లించాలంటూ బ్యాంకర్ల వేధింపులు
• మారటోరియం ఉన్నా బలవంతపు వసూళ్లు
• కరువులో ఎట్ల కడుతమంటూ రైతుల ఆందోళన

ఆదిలాబాద్‌, నవంబర్‌ 13 ( నమస్తే తెలంగాణ) : రుణాలు చెల్లించాలంటూ బ్యాంకు అధికారులు వేధిస్తుండటంతో కరువు కష్టాలో ఉన్న రైతులు తీవ్ర ఇబ్బందులు పడుతున్నారు. ఓ వైపు పంటలు ఎండిపోయి.. మరో వైపు దిగుబడి రాని పరిస్థితుల్లో జిల్లా సహకార కేంద్ర బ్యాంకు అధికారులు రుణాలు చెల్లించాలంటూ నోటీసులు జారీ చేయడంపై రైతులు ఆగ్రహం వ్యక్తం చేస్తున్నారు. ఆదిలాబాద్‌ జిల్లాలో 21 గ్రామీణ మండలాలు ఉండగా 10 సహకార బ్యాంకు శాఖలున్నాయి.

వీటి పరిధిలో 20 వేల మంది ఖాతాదారులు రుణాలు తీసుకోగా వీరిలో రైతులు ఎక్కువ శాతం ఉన్నారు. జిల్లాలో రైతులు వానకాలంలో పత్తి, సోయా, కంది పంటలను ఎక్కువగా సాగు చేస్తారు. పంట పెట్టుబడుల కోసం జిల్లాలోని వివిధ సహకార బ్యాంకుల నుంచి రుణాలు తీసుకున్నారు. నిరుడు అధిక వర్షాల కారణంగా చేతికి వచ్చిన పత్తి, సోయా, కంది పంటలను రైతులు నష్టపోయారు. ఈ ఏడాది వర్షాభావ పరిస్థితుల కారణంగా పంటలు ఎండిపోగా పెట్టుబడులు సైతం రాని పరిస్థితులు నెలకొన్నాయి.

రుణాలపై మారటోరియం ఉన్నా వసూళ్లు

జిల్లాలో వర్షాభావ పరిస్థితుల నేపథ్యంలో ప్రభుత్వం 20 కరువు మండలాలను ప్రకటించింది. ఇటీవల రాష్ట్ర స్థాయి బ్యాంకర్ల కమిటీ (ఎస్‌ఎల్‌బీసీ) సమావేశంలో రాష్ట్రంలో కరువు పరిస్థితుల నేపథ్యంలో రైతుల పంట రుణాల వసూళ్లపై ఏడాదిపాటు మారటోరియం విధించాలని బ్యాంకర్లు నిర్ణయించారు. కరువు కాలంలో రైతులకు అండగా నిలువాలని, యాసంగి రుణాలను అందించాలని సమావేశానికి హాజరైన మంత్రులు భట్టి విక్రమార్క, తుమ్మల నాగేశ్వర్‌రావు సూచించారు. పంట రుణాల వసూళ్లపై మారిటోరియం ఉన్నా జిల్లా కేంద్ర సహకార బ్యాంకు అధికారులు రుణాలు చెల్లించాలంటూ వేధింపులకు గురిచేస్తున్నారంటూ రైతులు వాపోతున్నారు.

ప్రభుత్వం తమకు రుణమాఫీ చేస్తామని ప్రకటించి మాట తప్పిందని, ఇప్పుడు బలవంతంగా నోటీసులు ఇస్తున్నారని రైతులు ఆగ్రహం వ్యక్తంచేశారు. రుణాలు చెల్లించకపోతే తమ ఆస్తులను జప్తు చేస్తామని బెదిరింపులకు పాల్పడుతున్నారని ఆవేదన వ్యక్తంచేస్తున్నారు. వరుసగా పంటలు నష్టపోయి అప్పులపాలయ్యామని.. ఇలాంటి పరిస్థితుల్లో రుణాలు ఎలా చెల్లించాలంటూ రైతులు ఆవేదన వ్యక్తం చేస్తున్నారు. బ్యాంకు అధికారుల తీరుకు నిరసనగా రైతులు గ్రామాల్లో నిరసన కార్యక్రమాలు చేపడుతున్నారు. కరువుకాలంలో తమకు సహకరించాల్సిన బ్యాంకు అధికారులు వేధించడం మానుకోవాలని కోరుతున్నారు.