మస్కట్‌లో మోసానికి గురై స్వదేశానికి చేరుకున్న లక్ష్మి కుటుంబానికి అండగా నిలిచిన మాజీ ఎమ్మెల్యే

మహబూబ్‌ నగర్‌ : ఉపాధి కోసం మస్కట్‌కు వెళ్లి మోసానికి గురై ఇబ్బందులు పడి బీఆర్‌ఎస్‌ ( BRS ) నాయకుల చొరవతో క్షేమంగా స్వగ్రామానికి చేరుకున్న తుప్పుడు లక్ష్మికి ( Lakshmi ) కొడంగల్‌ మాజీ ఎమ్మెల్యే పట్నం నరేందర్‌ రెడ్డి ( Patnam Narendhar Reddy ) ఆదుకున్నారు.

విదేశంలో ఉన్న సమయంలో లక్ష్మి కుమారుడు రాజు తన తల్లి పరిస్థితిని కొడంగల్ మాజీ ఎమ్మెల్యే దృష్టికి తీసుకు వచ్చారు. ఆయన ప్రత్యేక చొరవ తీసుకుని ఈ విషయాన్ని బీఆర్ఎస్ వర్కింగ్ ప్రెసిడెంట్ కేటీఆర్‌కు వివరించారు. దీంతో కేటీఆర్‌ ప్రత్యేక చర్యలు తీసుకుని లక్ష్మిని సురక్షితంగా స్వదేశానికి తీసుకురావడంలో కీలక పాత్ర పోషించారు. ఈ సందర్భంగా శుక్రవారం దౌల్తాబాద్ మండలం గోకపస్లాబాద్ గ్రామంలోని తుప్పుడు లక్ష్మి స్వగృహానికి పట్నం నరేందర్ రెడ్డి స్వయంగా వెళ్లి వారి కుటుంబ సభ్యులను కలుసుకున్నారు.

కుటుంబ పరిస్థితులను అడిగి తెలుసుకుని, వారు ఎదుర్కొంటున్న ఇబ్బందులను దగ్గరుండి పరిశీలించారు. లక్ష్మి కుటుంబానికి అన్ని విధాలుగా అండగా ఉంటామని ఆయన భరోసా కల్పించారు. బాధిత కుటుంబానికి అండగా నిలిచిన బీఆర్ఎస్ పార్టీ నాయకత్వానికి, ముఖ్యంగా కేటీఆర్‌కు కుటుంబ సభ్యులు కృతజ్ఞతలు తెలిపారు.