భూగర్భ జలాల పెంపునకు ఇంకుడు గుంతలు తప్పనిసరి : ఎంపీడీవో పుల్లారావు

నార్నూర్, నవంబర్ 12 : వర్ష భావ పరిస్థితులను అధిగమించడానికి భూగర్భ జలాల పెంపునకు ఇంకుడు గుంతలు తప్పనిసరిగా నిర్మించాలని ఎంపీడీవో పుల్లారావు సూచించారు. గురువారం ఆదిలాబాద్ జిల్లా నార్నూర్ మండల కేంద్రంలోని మండల ప్రజా పరిషత్ సమావేశ మందిరంలో ఎంపీడీవో అధ్యక్షతన మండల ఇస్థాయి సమావేశాన్ని నిర్వహించారు. ఆయా శాఖల అధికారులు మండల ప్రగతిని వెల్లడించారు. ఈ సందర్భంగా ఎంపీడీవో మాట్లాడుతూ.. ప్రజా ప్రతినిధులు, అధికారులు సమన్వయంతో మండల అభివృద్ధికి కృషి చేయాలని సూచించారు.

ఎల్ నినో ప్రభావంతో నీటి జలాలు తగ్గుముఖం పట్టే అవకాశాలు ఉన్నాయని, నీటిని వృథా కాకుండా చూడాల్సిన బాధ్యత మనందరిపై ఉందన్నారు. వృథా నీటిని అరికట్టేందుకు ఇంకుడు గుంతలు నిర్మించుకొవాలన్నారు. ప్రతి సమస్యను సమన్వయంతో పరిష్కరించి ప్రజలు ఇబ్బంది పడకుండా కృషి చేద్దామన్నారు. ఈ సమావేశంలో ఆర్డబ్ల్యూఎస్ డీఈ శ్రీనివాస్, ఎంపీఓ మహేష్, ఏవో ఆకాష్, ఆయా శాఖ అధికారులు, సర్పంచులు ఉన్నారు.