భారత కుర్రాళ్లే ఆసియా కింగ్స్‌

15 November 2026 - 05:30
0 0
భారత కుర్రాళ్లే ఆసియా కింగ్స్‌
Teamindia
  • మోహిత్‌ మెరుపు ఇన్నింగ్స్‌
  • ఒక్క వికెట్‌ తేడాతో ఆఖరి బంతికి పాకిస్థాన్‌పై గెలుపు
  • తొమ్మిదోసారి విజేతగా నిలిచిన యంగ్‌ ఇండియా
  • ఒక్క వికెట్‌ తేడాతో పాకిస్థాన్‌పై థ్రిల్లింగ్‌ విక్టరీ

అండర్‌-19 ఆసియా కప్‌ క్రికెట్‌ టోర్నీలో యువ భారత్‌ సంచలన విజయం సాధించింది. చిరకాల ప్రత్యర్థి పాకిస్థాన్‌తో నరాలు తెగే ఉత్కంఠ నడుమ శనివారం జరిగిన తుదిపోరులో ఆఖరి బంతికి ఒక్క వికెట్‌ తేడాతో గెలిచి తొమ్మిదోసారి ట్రోఫీని సొంతం చేసుకున్నది. 338 పరుగుల భారీ లక్ష్య ఛేదనలో ఓ దశలో 252 పరుగులకే 8 వికెట్లు కోల్పోయి ఓటమి అంచున నిలిచిన జట్టును మోహిత్‌ ఉల్వా (49 నాటౌట్‌), మనల్‌ చౌహాన్‌ (47) అసాధారణ పోరాటంతో విజయతీరాలకు చేర్చారు. కెప్టెన్‌ లక్ష్య రాయ్‌చందానీ (80), ఆర్యవీర్‌ సెహ్వాగ్‌ (58) కూడా సత్తా చాటారు. గత ఎడిషన్‌ ఫైనల్లో పాకిస్థాన్‌ చేతిలో ఎదురైన ఓటమికి ఈ విజయంతో భారత్‌ ప్రతీకారం తీర్చుకున్నది. మోహిత్‌ ఉల్వాకు ప్లేయర్‌ ఆఫ్‌ ది మ్యాచ్‌, ఆర్యవీర్‌ కు ప్లేయర్‌ ఆఫ్‌ ది టోర్నీ అవార్డులు లభించాయి.

చిరకాల ప్రత్యర్థి పాకిస్థాన్‌ తో పోరు అంటేనే నరాలు తెగే ఉత్కంఠ.. అందులోనూ ఫైనల్‌ అంటే ఆ ఒత్తిడి తారాస్థాయికి చేరుతుంది! అండర్‌-19 ఆసియా కప్‌ తుదిపోరులో సరిగ్గా అలాంటి పరిస్థితే ఎదురైనా భారత కుర్రాళ్లు అస్సలు తలవంచలేదు. 338 పరుగుల కొండంత లక్ష్య ఛేదనలో ఓదశలో252/8తో ఓటమి అంచున నిలిచినా ఏమాత్రం బెదరలేదు. తీవ్ర ఒత్తిడిలో మోహిత్‌ ఉల్వా (26 బంతుల్లో 5 ఫోర్లు, 3 సిక్సర్లతో 49 నాటౌట్‌), మనల్‌ చౌహాన్‌ (32 బంతుల్లో 3 ఫోర్లు, 3 సిక్సర్లతో 47) ఆకాశమే హద్దుగా చెలరేగి జట్టుకు చిరస్మరణీయ విజయం అందించారు. ఆఖరి బంతికి మోహిత్‌ ఫోర్‌ కొట్టి దాయాది ఆశలను చిదిమేయగా.. రికార్డు స్థాయిలో తొమ్మిదోసారి ఆసియా కప్‌ యువ భారత్‌ సొంతమైంది. దాంతో పాటు గత ఎడిషన్‌ ఫైనల్‌ పరాభవానికి, వారం కిందట గ్రూప్‌ దశ ఓటమికి పాకిస్థాన్‌పై మన కుర్రాళ్లు అసలు సిసలు ప్రతీకారం తీర్చుకున్నారు.

అల్‌ అమెరాత్‌ (ఒమన్‌): భారత కుర్రాళ్లు అండర్‌19 ఆసియా కప్‌ ట్రోఫీని తిరిగి కైవసం చేసుకున్నారు. శనివారం జరిగిన ఫైనల్‌ పోరులో ఒక్క వికెట్‌ తేడాతో ఆఖరి బంతికి చిరకాల ప్రత్యర్థి పాకిస్థాను ఓడించారు. కెప్టెన్‌ లక్ష్య రాయ్‌చందానీ (80), ఆర్యవీర్‌ సెహ్వాగ్‌ (58) వేసిన పునాదిపై మోహిత్‌, మనల్‌, ఆఖరి వికెట్‌గా వచ్చిన విజయ సుభాష్‌ (8 బంతుల్లో 11 నాటౌట్‌) అసాధారణ పోరాటంతో 338 పరుగులు లక్షాన్ని భారత్‌ 9 వికెట్లు కోల్పోయి ఆఖరి బంతికి అందుకుంది. తొలుత పాకిస్థాన్‌ 50 ఓవర్లలో 337/9 స్కోరు చేసింది. ఓపెనర్‌ ఉస్మాన్‌ ఖాన్‌ (107) సెంచరీ, అబ్దుల్‌ ఖాదిర్‌ (80), కెప్టెన్‌ ఫర్హాన్‌ యూసుఫ్‌ (63) ఫిఫ్టీలతో రాణించారు. భారత బౌలర్లలో పేసర్లు కావ్య పరేశ్‌ పటేల్‌ (4/68), విజయ సుభాష్‌ (3/40) చివర్లో వికెట్లు తీసినా పాక్‌ భారీ స్కోరు చేసింది. మోహిత్‌ కు ప్లేయర్‌ ఆఫ్‌ ది మ్యాచ్‌, సెహ్వాగ్‌ కొడుకైన ఆర్యవీర్‌కు ప్లేయర్‌ ఆఫ్‌ ది టోర్నీ అవార్డులు లభించాయి.

Indiaa

ఓపెనర్ల జోరు.. మధ్యలో బేజారు
భారత్‌-పాక్‌ కుర్రాళ్ల పోరు.. సీనియర్‌ జట్ల మధ్య హై ఓల్టేజ్‌ మ్యాచ్‌ను తలపించింది. భారీ లక్ష్య ఛేదనలో ఫామ్‌లో ఉన్న కెప్టెన్‌ లక్ష్య, ఆర్యవీర్‌ తొలి వికెట్‌కు 95 పరుగులు జోడించి జట్టుకు శుభారంభం ఇచ్చారు. కొత్త బంతితో పాక్‌ పేసర్లను సమర్థవంతంగా ఎదుర్కొంటూ క్రమం తప్పకుండా బౌండరీలు కొట్టారు. ఐదో ఓవర్లో ఆర్యవీర్‌ కుడి ముంజేతికిబంతి బలంగా తగిలింది. చేతికి స్ట్రాపింగ్‌ వేసుకుని, పెయిన్‌ కిల్లర్స్‌ తీసుకుని మరీ పోరాడిన ఆర్యవీర్‌ 51 బంతుల్లో అర్ధ శతకం పూర్తి చేసుకున్నాడు. కానీ, స్పిన్నర్‌ షఫీక్‌ వేసిన 18వ ఓవర్లో తను ఔటైన తర్వాత భారత రన్‌రేట్‌ మందగించింది.

కెప్టెన్‌ లక్ష్య జాగ్రత్తగా ఆడగా.. వినీత్‌ (24) ఎక్కువసేపు క్రీజులో నిలువలేకపోయాడు. లీగ్‌ దశలో పాక్‌పై శతకబాదిన అర్జున్‌ రాజ్‌ పూత్‌ (16), యశ్‌వర్దన్‌ రాథోడ్‌ (5) నిరాశపరిచినా.. అన్వయ్‌ ద్రవిడ్‌ (18) తోడుగా వరుస బౌండరీలు కొట్టిన కెప్టెన్‌ లక్ష్య వేగం పెంచే ప్రయత్నం చేశాడు. కానీ, అలీ రజా వేసిన 36వ ఓవర్లో అబ్బాస్‌ దార్‌ పట్టిన సింగిల్‌ హ్యాండ్‌ స్టన్నింగ్‌ క్యాచ్‌కు లక్ష్య వెనుదిరగ్గా.. తర్వాతి బంతికే లేని పరుగు కోసం యత్నించి అన్వయ్‌ రనౌటవ్వడంతో 217/6 తో భారత్‌ ఎదురీత మొదలుపెట్టింది. మనల్‌ చౌహన్‌ పాక్‌ బౌలర్లపై ఎదురుదాడికి దిగినా.. నాలుగు బంతుల తేడాలో ఆర్యన్‌ (9), పరేశ్‌(0) ఔటవడంతో భారత్‌ 252/ 8తో మరింత డీలా పడింది.

ఆఖర్లో అద్భుతం
చేతిలో రెండే వికెట్లు ఉండగా.. మరో 80 పరుగులు అవసరం అవ్వడంతో భారత్‌కు ఓటమి తప్పదని అంతా భావించారు. ఈ దశలో మోహిత్‌, మనల్‌ ఆత్మవిశ్వాసం కోల్పోలేదు. సయ్యం వేసిన 44వ ఓవర్లో రెండు సిక్సర్లతో మనల్‌ జట్టును తిరిగి రేసులోకి తేగా.. తర్వాతి ఓవర్లో 6,4 కొట్టిన మోహిత్‌.. అలీ రజా బౌలింగ్‌ లోనూ భారీ సిక్స్‌ తో స్టేడియాన్ని హోరెత్తించాడు. కానీ, చివరి 24 బంతుల్లో 34 పరుగులు అవసరం అవగా 47వ ఓవర్లో రిజ్వానుల్లా నాలుగే రన్స్‌ ఇచ్చాడు. తర్వాతి ఓవర్‌ రెండో బంతికే మనల్‌ క్యాచ్‌ ఔట్‌ అవ్వడంతో 9వ వికెట్‌కు 57 పరుగుల భాగస్వామ్యం విడిపోయింది.

ఈ క్లిష్ట పరిస్థితుల్లో ఆఖరి బ్యాటర్‌ విజయ సుభాష్‌తో మోహిత్‌ దూకుడుగా ఆడాడు. 49వ ఓవర్లో 4,6 కొట్టి జట్టును పోటీలో నిలిపాడు. ఇక ఆఖరి ఓవర్లో 8 పరుగులు అవసరం అవగా తొలి ఐదు బంతులకు 5 ఐదే వచ్చాయి. చివరి బంతికి 3 పరుగులు అవసరం కాగా ఉత్కంఠ పతాకస్థాయికి చేరింది. ప్రశాంతత కోల్పోని మోహిత్‌ లెగ్‌ స్పిన్నర్‌ అహ్మద్‌ హుస్సేన్‌ వేసిన బంతిని లాంగాఫ్‌ దిశగా కళ్లు చెదిరే ఫోర్‌ బాదడంతో భారత కుర్రాళ్ల సంబురాలు మొదలయ్యాయి.

ఉస్మాన్‌ ఖాన్‌ సెంచరీ.. పాక్‌ భారీ స్కోరు
తొలుత టాస్‌ నెగ్గి బ్యాటింగ్‌ కు దిగిన పాకిస్థాన్‌ భారీ స్కోరు సాధించింది. గాయం కారణంగా స్టార్‌ పేసర్‌ ఇషాన్‌ సూద్‌ దూరం కావడం భారత బౌలింగ్‌ ను బలహీన పరిచింది. దాంతో పాక్‌ ఓపెనర్లు ఉస్మాన్‌ ఖాన్‌, హయామ్‌ ఖాన్‌ (21) సులభంగా పరుగులు రాబట్టారు. తొమ్మిదో ఓవర్లో హయామ్‌ను పరేశ్‌ ఔట్‌ చేసినా.. ఉస్మాన్‌ వెనక్కుతగ్గలేదు. అతనితో పాటు ఖాదిర్‌ భారత బౌలర్లపై విరుచుకుపడ్డాడు. 39 బంతుల్లోనే అర్ధ శతకం చేసిన అతను ఉస్మాన్‌ తో రెండో వికెట్‌ కు 135 పరుగులు జోడించి 27వ ఓవర్లో రాజ్‌పుత్‌ బౌలింగ్‌లో ఔటయ్యాడు. మరో ఎండ్‌లో తన ధాటిని కొనసాగించిన ఉస్మాన్‌ 106 బంతుల్లో శతకం పూర్తి చేసుకున్నాడు. కెప్టెన్‌ పర్హాన్‌ కూడా దూకుడుగా ఆడటంతో పాక్‌ 370 ప్లస్‌ స్కోరు చేసేలా కనిపించింది. కానీ, చివర్లో భారత బౌలర్లు పుంజుకున్నారు. పరేశ్‌, సుభాష్‌ స్లో బంతులతో పాక్‌ బ్యాటర్లను కట్టడి చేయడంతో చివరి 10 ఓవర్లలో పాక్‌ 6 వికెట్లు కోల్పోయి 63 పరుగులే చేసింది.

9/13 అండర్‌19 ఆసియాకప్‌ 13 ఎడిషన్లలో భారత్‌ విజేతగా నిలవడం ఇది తొమ్మిదోసారి.
1 యూత్‌ వన్డేల్లో అత్యధిక టార్గెట్‌ (338) ఛేజ్‌ చేసిన జట్టుగా భారత్‌ రికార్డుకెక్కింది. శ్రీలంకపై 321 పరుగుల లక్ష్యాన్ని ఛేదించిన తన రికార్డును మెరుగు పరుచుకుంది.

సంక్షిప్త స్కోర్లు
పాకిస్థాన్‌: 50 ఓవర్లలో 337/9 (ఉస్మాన్‌ 107, ఖాదిర్‌ 80, పరేశ్‌ పటేల్‌ 4/68, సుభాష్‌ 3/40).
భారత్‌: 50 ఓవర్లలో 339/9 (రాయ్‌చందాని 80, ఆర్యవీర్‌ 58, మోహిత్‌ 49 నాటౌట్‌, మనల్‌ 47, రిజ్వానుల్లా 3/53).

Comments (0)

User