జపాన్ ఓపెన్ చాంప్ లక్ష్యసేన్

- వరుసగా రెండో బీడబ్ల్యూఎఫ్ 500 టైటిల్ సొంతం
- ఈ టోర్నీ గెలిచిన తొలి భారత షట్లర్గా రికార్డు
కుమమొటొ: భారత స్టార్ షట్లర్ లక్ష్యసేన్ జపాన్ ఓపెన్లో పురుషుల సింగిల్స్ టైటిల్ను గెలుచుకున్నాడు. ఇటీవలే ముగిసిన హైలో ఓపెన్ను నెగ్గిన సేన్.. తాజాగా వరుసగా రెండో బీడబ్ల్యూఎఫ్ 500 టైటిల్ను కైవసం చేసుకున్నాడు. ఆదివారం జరిగిన మెన్స్ సింగిల్స్ ఫైనల్స్లో లక్ష్య.. 13-21, 21-18, 21-14తో లోకల్ ఫేవరేట్ కొకి వతనబె (జపాన్)ను చిత్తుచేసి ఈ టోర్నీ గెలిచిన తొలి భారత షట్లర్గా కొత్త చరిత్ర సృష్టించాడు. 64 నిమిషాల పాటు హోరాహోరీగా సాగిన పోరులో తొలి గేమ్ ఓడినప్పటికీ సంయమనం కోల్పోకుండా ఆడిన లక్ష్య.. ఈ విజయంతో ఏడాది చివర్లో జరిగే బీడబ్ల్యూఎఫ్ వరల్డ్ టూర్ ఫైనల్స్కు అర్హత సాధించే అవకాశాన్ని మరింత మెరుగుపరుచుకున్నాడు.
తొలి గేమ్లో వతనబె ఆధిపత్యం ప్రదర్శించగా లక్ష్య ఏకాగ్రత కోల్పోలేదు. ఆ తర్వాత పుంజుకున్న అతడు.. నువ్వానేనా అన్నట్టుగా సాగిన రెండో గేమ్ను 5-0 ఆధిక్యంతో ఆరంభించాడు. త్వరత్వరగా పాయింట్లు సాధించిన అతడు 15-10తో లీడ్లోకి వెళ్లినా వతనబె పోరాడాడు. లక్ష్య ఆధిక్యాన్ని 19-10 నుంచి 17-10కి తగ్గించాడు. కానీ భారత షట్లర్ వరుసగా 3 పాయింట్లు సాధించి ఆటను నిర్ణయాత్మక మూడో గేమ్కు తీసుకెళ్లాడు. ఆఖరి గేమ్లో 2-1తో లీడ్ సాధించిన లక్ష్య.. తనదైన ట్రేడ్మార్క్ స్మాష్లతో దూకుడు పెంచి ప్రత్యర్థిపై ఎదురుదాడికి దిగి ఆధిక్యాన్ని 16-7కు పెంచుకున్నాడు. వతనబె పుంజుకునేందుకు అవకాశం ఇవ్వకుండా క్రాస్కోర్ట్ విన్నర్తో రెండో గేమ్ను, ఆటనూ విజయంతో ముగించాడు.
Comments (0)