మీనాక్షి ఔట్‌

• కాంగ్రెస్‌ తెలంగాణ ఇన్‌చార్జిగా బీఎం సందీప్‌

• తక్షణమే నియమిస్తున్నట్టు వేణుగోపాల్‌ ప్రకటన

• రాష్ట్రంలో రాహుల్‌ పర్యటన రోజే నిర్ణయం

• రాహుల్‌ పర్యటన వేళ అధిష్ఠానం కీలక నిర్ణయం

న్యూఢిల్లీ, నవంబర్‌ 14 (నమస్తే తెలంగాణ): ఏఐసీసీ తెలంగాణ ఇన్‌చార్జిగా బీఎం సందీప్‌ నియమితులయ్యారు. ఏఐసీసీ అధ్యక్షుని ఆదేశాల మేరకు బీఎం సందీప్‌ను ఇన్‌చార్జిగా తక్షణమే నియమిస్తున్నట్టు పార్టీ సంస్థాగత వ్యవహారాల ప్రధాన కార్యదర్శి కేసీ వేణుగోపాల్‌ ఒక ప్రకటనలో వెల్లడించారు. ఇప్పటివరకు ఇన్‌చార్జిగా పనిచేసిన మీనాక్షి నటరాజన్‌ సేవలను పార్టీ అభినందిస్తున్నట్టు పేరొన్నారు.

గాంధేయవాదిగా, నిరాడంబర నాయకురాలిగా పేరున్న మీనాక్షి నటరాజన్‌కు, ముఖ్యమంత్రి రేవంత్‌రెడ్డి సహా పలువురు రాష్ట్ర కాంగ్రెస్‌ ముఖ్యనేతలకు మధ్య కొంతకాలంగా పార్టీ సంస్థాగత వ్యవహారాల విషయంలో తీవ్ర అభిప్రాయభేదాలు తలెత్తినట్టు సమాచారం. ముఖ్యంగా మీనాక్షి నటరాజన్‌ ఎంపీగా నామినేషన్‌ దాఖలు చేసే సమయంలో, ఆమెపై పెండింగ్‌లో ఉన్న ఓ కేసుకు సంబంధించిన వివరాలు అకస్మాత్తుగా పొరుగు రాష్ర్టానికి లీక్‌ కావడం సంచలనం రేపింది. సొంత పార్టీలోని ఓ వర్గమే కావాలని ఈ సమాచారాన్ని బయటకు పొకించిందనే అనుమానాలు బలంగా వ్యక్తమవడంతో, ఆమె తీవ్ర మనస్తాపానికి గురై రాష్ట్ర నాయకత్వంపై అధిష్ఠానానికి ఫిర్యాదు చేసేవరకు వెళ్లినట్టు తెలిసింది.