ఫోన్ చూడొద్దని తల్లి మందలించిందని మనస్తాపం.. ఇద్దరు పిల్లలను టీవీ ముందు కూర్చోబెట్టి వివాహిత ఆత్మహత్య

సెల్ఫోన్ ఎక్కువగా చూస్తున్నావంటూ తల్లి మందలించడంతో మనస్తాపానికి గురైన ఓ వివాహిత ఆత్మహత్య చేసుకుంది. భర్త పనికి వెళ్లిన తర్వాత ఇద్దరు చిన్నారులను టీవీ ముందు కూర్చోబెట్టి ఆమె తీసుకున్న తీవ్ర నిర్ణయం కుటుంబంలో విషాదాన్ని నింపింది. ఈ ఘటన హయత్నగర్ పోలీస్ స్టేషన్ పరిధిలో చోటుచేసుకుంది.
నాగర్కర్నూల్ జిల్లా కల్వకుర్తి మండలం ఎల్లమ్మ రంగాపురం గ్రామానికి చెందిన కిష్ణయ్య, అలివేలు దంపతుల రెండో కుమార్తె లక్ష్మీదేవి (25)కి ఏడేళ్ల క్రితం నల్గొండ జిల్లా నాంపల్లి మండలం టీపీగౌరారం గ్రామానికి చెందిన పగిళ్ల లక్ష్మణ్తో వివాహమైంది. ఉపాధి కోసం హైదరాబాద్కు వచ్చిన ఈ కుటుంబం హయత్నగర్ బొమ్మలగుడి సమీపంలో నివాసముంటోంది. లక్ష్మణ్ పెయింటర్గా పనిచేస్తుండగా.. లక్ష్మీదేవి తన తల్లిదండ్రులతో కలిసి ఉంటోంది.
ఇటీవల భర్త ఈఎంఐ పద్ధతిలో లక్ష్మీదేవికి కొత్త సెల్ఫోన్ కొనిచ్చాడు. అప్పటి నుంచి ఆమె ఎక్కువ సమయం ఫోన్ చూస్తుండటంతో తల్లి అలివేలు గురువారం మందలించింది. ఫోన్ చూస్తూ పనులు పట్టించుకోవడం లేదని, ఏదైనా పని చేసుకోవాలని సూచించింది. దీంతో లక్ష్మీదేవి తీవ్ర మనస్తాపానికి గురైంది.
శుక్రవారం ఉదయం భర్త పనికి వెళ్లిన తర్వాత ఏడేళ్ల కుమార్తెను పాఠశాలకు పంపకుండా, మూడేళ్ల కుమారుడితో కలిసి టీవీ ముందు కూర్చోబెట్టింది. అనంతరం గదిలోకి వెళ్లి ఆత్మహత్య చేసుకుంది. కొద్దిసేపటి తర్వాత కుటుంబ సభ్యులు గమనించి చూడగా ఫ్యాన్కు ఉరేసుకుని కనిపించింది.
సమాచారం అందుకున్న హయత్నగర్ పోలీసులు ఘటనా స్థలానికి చేరుకుని వివరాలు సేకరించారు. మృతదేహాన్ని పోస్టుమార్టం నిమిత్తం ఆసుపత్రికి తరలించి కేసు నమోదు చేశారు. ఇద్దరు చిన్నారులను వదిలి తల్లి మృతిచెందడంతో కుటుంబ సభ్యులు కన్నీరుమున్నీరయ్యారు.
Comments (0)