పారిశ్రామిక పతనం

• కాంగ్రెస్‌ పాలనలో కరోనా కంటే దారుణం
• టీజీఐపాస్‌ అధికారిక డాటాతో నిగ్గుతేలిన నిజాలు
• పడిపోయిన పారిశ్రామిక యూనిట్లు, పెట్టుబడులు
• 2024-25లో 38.5% తగ్గిన ఉపాధి అవకాశాలు
• కాగితాల వరకే పరిమితమైన దావోస్‌ ఒప్పందాలు
• గ్లోబల్‌ సమ్మిట్లు, ఈవెంట్ల పేరుతో ప్రజాధనం వృథా

బీఆర్‌ఎస్‌ హయాంలో పెట్టుబడుల స్వర్గధామంగా విలసిల్లింది హైదరాబాద్‌. కాంగ్రెస్‌ పాలనలో అంతా తలకిందులైంది. దావోస్‌ ఎంవోయూలు, ఊదరగొట్టిన పెట్టుబడులు కట్టుకథలేనని తేలిపోయాయి. ప్రచార యావతో సమ్మిట్లు, ఈవెంట్ల పేరుతో ప్రజాధనం వృథా అయ్యిందే తప్ప వచ్చిన కంపెనీలు, ఇచ్చిన కొలువులు అంతంతే. కరోనా సమయంతో పోల్చితే రెండేండ్ల కాంగ్రెస్‌ పాలనలోనే రాష్ట్ర పారిశ్రామిక రంగం మరింత పతనమైందని అధికారిక గణాంకాలే చెప్తున్నాయి.

హైదరాబాద్‌, నవంబర్‌ 10 (నమస్తే తెలంగాణ): బీఆర్‌ఎస్‌ ప్రభుత్వంలో విరుచుకుపడిన కరోనా మహమ్మారి సంక్షోభ సమయం కంటే పారిశ్రామిక ప్రగతి ప్రస్తుత రేవంత్‌ పాలనలో మరింత దిగువకు పడిపోయింది. ఇదే సమయంలో ఉపాధి కల్పన కూడా దారుణంగా పతనమైంది. 2023-24 ఏడాదితో పోలిస్తే,ఉద్యోగ కల్పన కాంగ్రెస్‌ అధికారంలోకి వచ్చీరాగానే అంటే 2024-25 ఆర్థిక సంవత్సరంలో ఏకంగా 38.5% మేర క్షీణించింది. ఇదేదో ప్రతిపక్ష నేతలు చేస్తున్న ఆరోపణలు ఎంతమాత్రం కానేకాదు. తెలంగాణ పారిశ్రామిక ప్రాజెక్టుల అనుమతులు, స్వీయ సర్టిఫికేషన్‌ వ్యవస్థ టీజీఐపాస్‌ వెల్లడించిన అధికారిక గణాంకాలతో ఈ విషయం సుస్పష్టమైంది.

కరోనా సమయంలో..
రాష్ట్రంలో పారిశ్రామిక పెట్టుబడులు, ఉద్యోగావకాశాలకు సంబంధించి టీజీఐపాస్‌లో ఏటా నమోదవుతున్న అధికారిక గణాంకాలను పరిశీలిస్తే, కాంగ్రెస్‌ ప్రభుత్వ వైఫల్యం స్పష్టంగా కనిపిస్తున్నది. కరోనా సంక్షోభ సమయంలో లాక్‌డౌన్‌ వంటి క్లిష్ట సమయాల్లోనూ అప్పటి బీఆర్‌ఎస్‌ సర్కార్‌ పారిశ్రామికాభివృద్ధికి, ఉపాధి కల్పనకు ప్రత్యేక చొరవ తీసుకొన్నది. ఈ కారణంగానే కరోనా సంక్షోభం ప్రారంభమైన 2019-20 ఆర్థిక సంవత్సరంలో కూడా తెలంగాణ ప్రభుత్వం 2,591 పరిశ్రమల యూనిట్లకు అనుమతులు ఇవ్వగా, రూ.11,930.48 కోట్ల పెట్టుబడులు రావడంతోపాటు 59,261 మందికి ఉపాధి లభించింది. అనంతరం లాక్‌డౌన్లు, కఠిన ఆంక్షలు ఎదురైన 2020-21 విపత్తు కాలంలోనూ రాష్ట్రం 15.6% పెరుగుదలతో 2,994 పారిశ్రామిక యూనిట్లను సాధించి, 57,096 మందికి ఉపాధి కల్పించింది. ఆ ఏడాది రూ. 8,539. 75 కోట్ల పెట్టుబడులు నమోదయ్యాయి.

కరోనా అనంతరం రాకెట్‌ వేగం
కరోనా అనంతరం పరిస్థితులు కుదుటపడిన వెంటనే అప్పటి బీఆర్‌ఎస్‌ ప్రభుత్వ కృషితో పారిశ్రామిక రంగంలో బలమైన వృద్ధి కనిపించింది. దీన్ని ధృవీకరిస్త్తూ.. 2021-22లో పరిశ్రమల యూనిట్లు 17.7% పెరిగి 3,523కు చేరగా, పెట్టుబడులు 64.3% పెరిగి 14,0 31.59 కోట్లకు చేరాయి. ఉద్యోగాలు ఏకంగా 54.3% పెరిగి 88,110కి ఎగబాకాయి. 2022-23లో పెట్టుబడులు 25% వృద్ధితో రూ. 17,538.95 కోట్లకు చేరాయి. ఆ తర్వాతి సంవత్సరం 2023-24లో పెట్టుబడులు ఏకంగా 40.8% పెరిగి రూ.24,6 90.69 కోట్ల రికార్డు స్థాయిని తాకగా, ఉద్యోగాల సంఖ్య 3.5% వృద్ధితో 80,583గా నమోదైంది.

అంకెల గారడీతో డ్రామా
ప్రస్తుత 2026-27 ఆర్థిక సంవత్సర వివరాలను పరిశీలిస్తే.. రాష్ట్రంలో 1,351 పారిశ్రామిక యూనిట్లు, రూ.17,998.26 కోట్ల పెట్టుబడులు రాగా, 36,704 మందికి ఉపాధి అవకాశాలు లభించినట్టు డాటాలో చూపిస్తున్నప్పటికీ, అది ఏ నెల వరకూ అనేది మాత్రం నిర్దిష్టంగా వెల్లడించలేదు. మరోవైపు రూ.1,45, 546.09 కోట్ల అంచనా పెట్టుబడులు, 86,250 మందికి ఉపాధి అంచనాలతో కూడిన సుమారు 1,152 ప్రతిపాదనలు ఇంకా పరిశీలన దశలోనే ఉన్నాయి. ఇవి కేవలం పెండింగ్‌లో ఉన్న ప్రతిపాదనలు మాత్రమేనని వీటిని వాస్తవ రూపం దాల్చిన పెట్టుబడులుగా, ఉపాధి అవకాశాలుగా పరిగణించలేమని పరిశీలకులు స్పష్టం చేస్తున్నారు. గత ప్రభుత్వ హయాంలో 2023-24 నాటికి ఏటా 80 వేలకుపైగా లభించిన ఉద్యోగాలతో పోలిస్తే కాంగ్రెస్‌ పాలనలో ఉపాధి అవకాశాలు భారీగా పడిపోవడం యువతను తీవ్ర నిరాశకు గురిచేస్తున్నట్టు విశ్లేషకులు అభిప్రాయపడుతున్నారు.

అవన్నీ అబద్ధపు ప్రచారాలే
ప్రభుత్వం చేస్తున్న పెట్టుబడుల ప్రచారాలకు, క్షేత్రస్థాయి ఫలితాలకు మధ్య ఉన్న భారీ వ్యత్యాసాన్ని ప్రస్తుత డాటా ఎత్తిచూపుతున్నది. గత రెండేండ్లుగా దావోస్‌లో జరిగిన వరల్డ్‌ ఎకనామిక్‌ ఫోరమ్‌, పలు గ్లోబల్‌ సమ్మిట్ల ద్వారా తెలంగాణను పెట్టుబడుల గమ్యస్థానంగా ప్ర చారం చేస్తూ లక్షల కోట్ల రూపాయల ఒప్పందాలు కుదిరినట్లు ఆర్భాటపు ప్రకటనలు గుప్పిస్తున్నది. కానీ టీజీఐపాస్‌ అధికారిక పోర్టల్‌లో నమోదైన తాజా గణాంకాలను బట్టి ఇవన్నీ అబద్ధాలేనని సుస్పష్టమవుతున్నది. ఈవెంట్‌ మేనేజ్‌మెంట్ల ద్వారా అబద్ధపు ప్రకటనలు గు ప్పించడం తప్పితే, ఆ పెట్టుబడులు క్షేత్రస్థాయి లో ఎకడా కనిపించడంలేదని, యువతకు ద కిన కొత్త ఉద్యోగాలు కూడా ఏమీలేవని ప లువురు ఆరోపిస్తున్నారు. లక్షల కోట్ల ఎంవోయూలంటూ గొప్పలు చెప్పుకోవడం అంతా పచ్చి బూటకమని ప్రభుత్వ వెబ్‌సైట్‌ డాటా యే స్పష్టం చేస్తున్నదని విపక్ష నేతలు అంటున్నారు.

కాంగ్రెస్‌పాలనలో కల్లోలం
బీఆర్‌ఎస్‌ పాలనలో ఓ వెలుగు వెలిగిన పారిశ్రామికాభివృద్ధి కాంగ్రెస్‌ అధికారంలోకి వచ్చిన తర్వాత పూర్తిగా తలకిందులైంది. 2024-25లో పరిశ్రమల యూనిట్లు 19.6% తగ్గి 2,005కు, పెట్టుబడులు 52.5% క్షీణించి రూ.11,719.90 కోట్లకు పడిపోయాయి. ఉపాధి కల్పన 38.5% క్షీణించి కేవలం 49,523కు పరిమితమైంది. అనంతరం 2025-26లో యూనిట్ల సంఖ్య 7.7% పెరిగి 2,160కి చేరినప్పటికీ, పెట్టుబడులు మరో 12.7% తగ్గి రూ.10,236.76 కోట్లకు పరిమితమయ్యాయి. ఉపాధి 3% మాత్రమే పెరిగి 51,005కి చేరింది. ఇది విపతర కరోనా కాలంలో నమోదైన 59,261 (2019-20), 57,096 (2020-21) ఉద్యోగాల కంటే చాలా తకువ కావడం గమనార్హం.

రాష్ట్రాభివృద్ధి మరింత కుంటుపడే ప్రమాదం
ఒకవైపు రెవెన్యూ ఆదాయంలో తిరోగమనం, మరోవైపు ఉత్పత్తి రంగాల్లో కుంగుబాటు, ఇంకోవైపు నిరుద్యోగ సమస్య తీవ్రరూపం దాల్చడం వెరసి కాంగ్రెస్‌ పాలనలో రాష్ట్రం తీవ్ర ఆర్థిక అనిశ్చితిలోకి కూరుకుపోతున్నదని ఆర్థిక రంగ నిపుణులు హెచ్చరిస్తున్నారు. ప్రభుత్వం ఇప్పటికైనా ప్రచారాలు, ప్రకటనల మోజు వీడి గ్రౌండ్‌ లెవెల్‌లో పారిశ్రామిక ప్రోత్సాహం, స్థిరమైన ఉద్యోగాల కల్పనపై స్పష్టమైన కార్యాచరణతో ముందుకురావాలని హితవు పలుకుతున్నారు. లేకపోతే మరింత కుంటుపడే ప్రమాదం ఉన్నదని హెచ్చరిస్తున్నారు.

కరోనా కాలంతో పోలిస్తే, కాంగ్రెస్‌ పాలనలో తగ్గిన పరిశ్రమలు : 1,420
కరోనా కాలంతో పోలిస్తే, కాంగ్రెస్‌ పాలనలో తగ్గిన ఉద్యోగాలు : 15,829

కరోనా వచ్చిన రెండేండ్లలో బీఆర్‌ఎస్‌ పాలనలో ఇలా..
రాష్ర్టానికి వచ్చిన పరిశ్రమలు : 5,585
కల్పించిన ఉద్యోగాలు : 1,16,357
కాంగ్రెస్‌పాలనలో రెండేండ్లలో ఇలా
రాష్ర్టానికి వచ్చిన పరిశ్రమలు : 4,165
కల్పించిన ఉద్యోగాలు : 1,00,528

ఏటా సగటున వచ్చిన పరిశ్రమలు
బీఆర్‌ఎస్‌ పాలనలో : 2,223.2
కాంగ్రెస్‌ పాలనలో : 1,838
తేడా : 385.2